Do là dùl tàm ală broă lơh tờm bơh Lơh chờ Sầu riêng càr Dăk Lăk nam 2026 dê, geh mờr 400 hìu ràng tăc bơh rơlao 140 mpồl lơh sa kă bro tàm lơgar, 20 mpồl lơh sa kă bro lơgar bơdìh. Tàm tiah ràng, broă sền ngăc ngan tus tàm ală phan jăt gùng dà broă lơh bơtàu tơnguh lơh sa suơn sre tơlir mờ kơl jăp, kung là gùng dà broă lơh bơh gah lơh sầu riêng càr Dăk Lăk dê. Uă mpồl lơh broă neh cèng tus ală gùng dà broă lơh gơguh jăk, ngui măi mok sinh học nàng dong kờl làng bol lơh broă sa suơn sre tàm broă tam kloh niam bơh tàm broă sơnka sền gàr.

Ồng Nguyễn Thanh Điền, ala măt dùl mpồl lơh sa kă bro ai gùng dà broă lơh sinh học tàm broă lơh sa suơn sre pà git, mpồl lơh broă do tus bal broă lơh mờ jơnau kơ̆p kờñ tam pà ală bơta gơguh jăk tàm broă atbồ tu kòp lơh aniai tàm tờm sầu riêng. “Bơh drà ràng tơlik do, làng bol lơh broă sa suơn sre gơtùi jòi sền loh rơlao tai bè ală gùng dà broă lơh mờ bol añ cèng tus, tàm hơ̆ uă ngan là ală gùng dà broă lơh sinh học tàm broă atbồ tu kòp lơh aniai. Bơh tŭ hơ̆ dong kờl làng bol iang nùs lơh sa, tơnguh uă bơta niam phan geh lơh bơh broă lơh sa suơn sre mờ pơgồp bal tàm broă bơ̆t bơtàu broă lơh sa suơn sre Việt Nam bơtàu tơnguh kơl jăp”.

Broă tus bal bơh 20 mpồl lơh sa kă bro bơh ală lơgar dê kung neh ai geh tai dùl anih tơrbŏ bal ai broă lơh do in. Bơh ală hìu ràng tăc phan, lơgar bơdìh geh dơ̆ nàng jòi sền tơn phan geh lơh, gam mpồl lơh sa kă bro lơgar Việt Nam geh tơl bơta nàng tìp mờ ală jơnau kờñ mùl màl bơh ală drà kă bro blơi phan. Bal mờ sầu riêng, ală phan OCOP mờ phan bơkah krơi is ƀòn lơgar dê kung geh yal tàm broă lơh do sơl, ai geh dơ̆ niam nàng ală cau tờm lơh sa yal khà măt kă bro mờ rề ơnàng drà kă bro.

Mò Nguyễn Thị Thu An, Kwang Lam bồ Sờh Lơh sa mờ măi mok mờ Kă bro phan càr Dăk Lăk pà git, bơh ală broă lơh geh tơrbŏ tơn, càr kơ̆p kờñ bơta kwơ phan geh lơh bơh broă lơh sa suơn sre ờ mìng geh tàm khà tăc, mờ gam geh tơnguh ndrờm bal bơta niam, măt kă bro, broă lơh gơs phan ngui sa mờ broă di pal mờ jơnau kờñ bơh tơl drà kă bro dê. Do là gùng lòt nàng sầu riêng bal mờ ală phan OCOP càr Dăk Lăk dê rơhời tus bal nền nòn rơlao tàm mpồl geh kwơ tàm lơgar mờ ală lơgar dê. “Lài jơh là pal yal geh sầu riêng càr Dăk Lăk tus mờ cau ngui sa, tơrbŏ bal mờ ală cau blơi mờ lơh geh uă jơnau yal càr dê sùm ai tơl bơta niam nàng ală mpồl lơh sa kă bro lơh broă kă bro phan, kung bè tơrbŏ bal, jòi sền nàng git wă nền nòn rơlao bè bơta niam bal mờ drà kă bro nàng gơtùi ai phan geh lơh bơh sầu riêng do par ñhoa, par ngài rơlao”.