Nàng pơgồp bơnah ai gơguh phan lơh gơs tàm ù tiah càr Dăk Lăk nam 2026 dê geh bơh 10% rlau hơđang, gah Broă lơh sa suơn sre mờ Tiah ơm kis tơlik jơnau kờñ gàr sùm khà gơguh gùt nam bơh 5,86% rlau hơđang. Tàm 5 nhai lồi nam, jơh gùt gah do pơn đơl lơh geh rlau 66 rbô 100 tơmàn đong priă lơh sa. Tàm hơ̆ tơrgùm tàm 2 bơta phan lơh gơs bơh suơn sre tờm ngan là kơphe mờ sầu riêng.

Ồng Đỗ Hữu Huy, Chủ tịch Anih duh broă Làng bol càr Dăk Lăk sồr gah Broă lơh sa suơn sre mờ Tiah ơm kis bơh tŭ do tus lồi nam pal lơh jat jơnau kờp dŭ gơguh tai jat tơl nhai, tơl quý; sùm yal khà kờp, rơcang lài tơngkah gờñ mờ tam gơl mơ tŭ gơlik geh bơta aniai. Cau lam bồ ală anih lơh broă pal rơcang lài tàm broă lơh, lơh jat nùs nhơm “6 loh, 1 lơh sùm”, pơgồp kơnòl mờ tơngai hơ pơrgon bal mờ cồng nha dut ndơl.