Uă jơnau đơs tàm pơrjum bơyai đơs là, tam gơl tơlir mờ lơh jat ală jơnau sồr ESG tŭ do là jơnau sồr ờ gơtùi pleh klàs, sồr pal lơh nàng mpồl lơh sa kă bro in gàr geh sùm sră blơi phan, pờ ơnàng drà kă bro mờ tơnguh bơta pràn jak tàm pơrlòng. Nàng lơh geh bơta do, mpồl lơh sa kă bro pal tơrmù tuh nhơm ƀơ̆ bơdìh, atbồ song dơ pă, ngui geh cồng nha phan kwơ tàm ù, tam gơl niam ală bơta lơh broă mờ song dơ pă ală jơnau yal...

Jat ală cau gĭt wă jrô broă lơh, mpồl lơh sa kă bro pal sền tam gơl tơlir là dùl bơnah bơcri lơh ai gơguh tai kơ̆ kơnhăp, ờ gŏ di sền do là priă tă gơlik geh. Tŭ do, mpồl lơh sa kă bro gơtùi sơnđờm bơcri priă lơh ală broă lơh geh priă tă lơyah, cèng wơl cồng nha uă bè tềm pềr năng lượng, atbồ dà tuh sồ siă, lơh ngan ngồn sồ jơnau yal tơngĭt lơh sa mờ tơnguh cồng nha atbồ.

Ồng Nguyễn Thành Long, cau gĭt wă jrô bè ală ESG đơs là, ală tiah pal geh ală tiah lơh sa mờ măi mok niam mờ phan bơna bơt bơtàu ồs đèng niam, dà tàm pơ dar mờ bơsong dà ƀơ̆ tuh tơlik ring bal, lơh geh bơnàng jă nàng mpồl lơh sa kă bro in lơh jat ESG geh cồng nha mờ tơrmù priă tă tam gơl. “Mờ phan bơna tăc tus câu Âu, geh 6 mpồl tờm gam gơtìp gơrềng tơn là lòs, sơmang, trà, phơng hidro. Tŭ do neh geh priă tă cacbon ngan ngồn mờ pal đo nhơm tuh phan bơna dê, jòi gĭt tiah tờm tềl tơngĭt cacbon tàm tơl phan bơna, tơl bơnah phan. Ală mpồl lơh sa kă bro pal rcang gờñ nàng ờ gơtìp lời wơl bơh ngkời”.

Ồng Phạm Anh Tuấn , Chủ tịch Anih duh broă Làng bol càr Gia Lai đơs nền:  Tơngai bơh nam 2026- 2030, càr sền gĭt rơ̆p lơh pràn tam gơl sồ, tam gơl tơlir, bơtàu tơnguh lơh sa mờ măi mok lơh gơlik phan, năng lượng lơh gơlik wơl mờ broă lơh sa suơn sre ngui măi mok pa. Tŭ do, càr geh uă bơta ƀuơn  nàng bơtàu tơnguh lơh sa tơlir mờ bơta pràn dờng bè năng lượng sàng goh, ală bơta bơtàu tơnguh măi mok tàm pơ dar. Chủ tịch Anih duh broă Làng bol càr Gia Lai hơ gơnoar atbồ rơ̆p tam gơl pràn bơh kơlôi sơnơng atbồ tus drơng broă, lòt bal mờ mpồl lơh sa kă bro lam lơh ală rơndăp broă lơh. “Càr Gia Lai rơ̆p geh broă lơh lòt bal mờ mpồl lơh sa kă bro tàm tam gơl tơlir. Dà lơgar rơ̆p dong kờl ală broă geh ngan bơh bàr pe broă dong kờl. Mơya kwơ màng ngan rlau jơh là bơta gĭt wă bơh cau lam bồ gơnoar atbồ, mpồl lơh sa kă bro pal gŏ do là jơnau sồr pal tam gơl nàng kis gơs. Càr rơ̆p pơn jat tai đơng lam, kơ̆ nùs lơh ngan lam lơh tam gơl tơlir tàm càr mờ nùs nhơm mhar rlau, kràñ cê jơh nùs rlau mờ geh cồng nha rlau.