Uă ngai do, tàm Hìu gơsơ̆t phan ròng lơh poăc tơrgùm bal Nhơn Bình, (gơwèt Kông ty TNHH Lơh gơlik, Lơh phan sa Quy Nhơn) sơnah ƀòn Quy Nhơn Đông, broă sền gròi phan ròng geh lơh nền nòn. Lài mờ tŭ ai tơmŭt tàm hìu gơsơ̆t, sur geh tơrgùm hờ bơdìh. Tàm do, cau tờm ròng pal yal tơl jơnau bè broă ròng, tiah ròng mờ khà sur. Mpồl lơh broă geh gơnoar bơyai lơh sền sur nền nòn.

Ồng Nguyễn Quang Thái, Phó Kwang Lam bồ kông ty pà git, bơdìh mờ broă sền bơh kwang bàng lơh sơnơm phan ròng, mpồl lơh sa kă bro kung geh broă sền is nàng jăt sền bơta niam gơsơ̆t phan ròng lơh poăc: “Di lah gŏ sur geh tơngŏ gơtìp kòp den kông ty rơ̆p yal tus mờ anih lơh broă geh gơnoar, gah lơh sơnơm phan ròng nàng bơsong di jăt mờ jơnau geh ai”.

Jăt mò Nguyễn Thị Ngân Hà, Lơh broă tàm anih xét nghiệm mờ Sơm kòp phan ròng, Ci kụk ròng phan mờ Lơh sơnơm phan ròng càr Gia Lai pà git, bơta kòp jê ndul gơjroh sur câu Phi gam tơngŏ kơlôi rơcang ngan. Mìng tàm dùl nhai do, càr Gia Lai neh gŏ 5 tiah gơtìp kòp, kờp jơh neh geh git nđờ rơhiang nơm sur gơtìp kòp pal tơ̆p pơrgŭc. Den tàng, broă sền gròi gơsơ̆t sur lơh poăc gàr niam poăc sur, sơlơ pal geh lơh jăt nền nòn: “Bol añ atbồ sur bơh 9 jơ drim, sền gròi sur tus 9 jơ mang mờ bol añ sền wơl jơh nàng gàr niam sur tus 1 jơ 30 àng drim ngai tơnơ̆ gơsơ̆t rơ̆p geh bơta niam mờ pràn kơl dang tus tàm hìu gơsơ̆t lơh poăc mờ ai tăc tus tàm drà kă bro”.

Jơh gùt càr Gia Lai tŭ do geh 11 hìu gơsơ̆t phan ròng lơh poăc tơrgùm bal mờ mờr 800 hìu gơsơ̆t phan ròng dềt. Gah lơh broă geh gơnoar càr Gia Lai neh mờ gam sồr ală tiah tơnguh broă sền gròi, sền jơh tàm ală hìu gơsơ̆t phan ròng lơh poăc, kung bè ală hìu tăc poăc sur, iar ơda tàm gùt càr. Lơh jăt broă mblàng yal nền nòn ală gùng dà broă rơcang kơrian kòp tus mờ làng bol, tàm hơ̆ uă ngan là ală hìu ròng sur. Jơnau kờñ là tơnguh uă jơnau git wă mpồl bơtiàn bè bơta ngòt rơngơ̆t bơh kòp gơtờp, krơi is ngan là ală broă tìs tàm broă pơn diang, kă bro sur bal mờ poăc sur blơi ờ di mờ gùng kă bro tờm, do là bơta di gơlan lơh gơtờp kòp uă ngan.

Ồng Huỳnh Ngọc Diệp, Lam bồ Ci kụk Ròng phan mờ lơh sơnơm phan ròng càr Gia Lai pà git tai: “Tàm bơta kòp gơtờp bè tŭ do, bol añ neh sồr Anih ròng phan mờ lơh sơnơm phan ròng bơh ală tiah pơgồp bal mờ gơnoar atbồ ală tiah nàng tơnguh broă sền gròi broă gơsơ̆t phan ròng lơh poăc dềt tàm ală ƀòn lơgar ờ hềt geh hìu gơsơ̆t phan ròng tơrgùm bal. Tàm broă sur blơi bơh bơdìh tus mờ gŏ geh tơngŏ sur kòp, bol añ bơyai lơh tam cah is. Tơnơ̆ mờ hơ̆ jăt mờ tơl dơ̆ sền ală bơta kòp gơtờp, tàm hơ̆ uă ngan là kòp jê ndul gơjroh sur câu Phi den bol añ rơ̆p bơyai lơh bơsong jăt jơnau geh ai bè tơ̆p pơrgŭc, ngui bơta duh mờ ală broă lơh pơn jăt tai di jăt mờ jơnau geh ai”.

Bơdìh mờ broă sok sền gơsơ̆t phan ròng lơh poăc, tơnguh broă jăt sền kòp bơtờp, nàng kơrian kòp jê ndul gơjroh sur gơtờp mhar, bơh nhai 7, càr Gia Lai neh lơh ing 4 anih sok sền kòp gơtờp tàm phan ròng ală gah lơh broă tàm ală tiah geh uă, pơgồp bơnah lơh kràñ sok sền.