Anih duh broă Làng bol sơnah ƀòn Đông Gia Nghĩa pà git, sơnah ƀòn neh tơng gơs mpồl lơh broă sơrbac mhar mờ lam lơh ală broă lơh kơryan kòp jat jơnau sồr. Bơh sền swì, geh 40 nơm sur bơh hìu bơnhă ồng Mai Thanh Sự dê tàm jơnum làng bol ơm kis tiah drà Đồng Tiến geh tềl tơnggŏ duh să, ờ bài sa, gơlik mhàm tềng kơl tau mờ chơt nisơna.

Tơnơ̆ tŭ geh cồng nha, gơnoar atbồ ƀòn lơgar neh đal git tiah geh kòp, lam lơh tơp pơrgŭc jơh khà sur kòp jat jơnau sồr, mờ kung lam lơh wàs kloh niam, ƀồm sơnơm lơh kloh khuẩn tiah ròng phan mờ dà sơnơm, vôi ƀòk. Bal mờ broă kơryan kòp, sơnah ƀòn Đông Gia Nghĩa sơlơ jat sền tàm tiah geh kòp mờ ală tiah rềp bal, mblàng yal, pơlam làng bol ngui ală broă lơh ròng phan ờdo ờdă sinh học, ờ pơndiang, tac bro halà lơh poac sur kòp.