Tàm sàh Dam Rong 1, càr Lâm Đồng dê, bi Phạm Văn Hội là dùl tàm ală làng bol lơh broă sa sơnrờp ngan ai gar mắc ca tàm broă lơh gơs nền nòn. Bơh broă tăc plai gam ris gơrềng mờ cau tus blơi, bi neh bơcri priă blơi măi tă kơmhò, phan nàng pơr mờ bơ̆t bơtàu măt kă bro “Mắc ca Hội Dung”. Phan geh lơh bơh gar mắc ca pơr hìu bi dê geh khà phan OCOP 3 sơrmañ, mờ pơgồp bal mờ broă blơi plai mắc ca bơh uă hìu làng bol tàm tiah do nàng lơh, tăc tàm ală drà kă bro dờng bè Hà Nội mờ ƀòn dờng Hồ Chí Minh. Jăt bi Hội đơs, kờñ phan geh tăc ngài den pal sền gròi bơta bơkah bơh tàm suơn tus mờ cau ngui sa: “Lơh gơs nền nòn pal kơlôi sơnơng bơh tàm tŭ gam tàm suơn tus mờ broă lơh dŭt ndơl tus mờ cau ngui sa. Bơta tờm bơh bol añ là bơta bơkah lài ngan hơ̆ sồng gơtùi tăc mờ cau ngui sa tàm tiah ngài”.

Bơh broă lơh bơh bi Hội dê, lơh gơs phan nền nòn gam gơs gùng dà broă lơh geh uă mpồl lơh sa kă bro, mpồl lơh broă bal mờ hìu lơh gơs phan tàm càr Lâm Đồng rơwah lơh nàng tơnguh uă bơta kwơ phan geh lơh bơh broă lơh sa suơn sre dê. Tŭ do gùt càr geh rơlao 500 hìu lơh ing, dăp mờ kờp jơh bơta pràn lơh rơlao 1 tơlăk 53 tấn pah nam, ai geh bơta tờm nàng phan geh lơh bơh tàm broă lơh sa càr dê di pal mờ jơnau kờñ bơh ală mpồl tăc phan pa mờ rề ơnàng drà kă bro tus lơgar bơdìh.

Jăt lŏ Nguyễn Thị Thùy Minh, cau tờm hìu lơh gơs phan geh lơh bơh broă lơh sa suơn sre tàm sơnah ƀòn Lâm Viên – Dà Làc đơs, lơh gơs phan nền nòn gam pờ geh gùng dà broă lơh kơl jăp ai phan geh lơh bơh broă lơh sa suơn sre tàm do dê. Ờ mìng bơsong jơnau gơlời jơnkah phan geh lơh bơh broă lơh sa suơn sre tàm kàl tơnhào, broă lơh gơs phan geh lơh gam dong kờl tơnguh bơta kwơ phan geh lơh, tơnjŏ tơngai prăp gàr, ai geh tai broă lơh cau lơh broă tàm ƀòn lơgar in mờ lơh pràn lơh gơs mpồl pơgồp bal bơh broă lơh tus mờ tăc phan geh lơh. “Tàm kàl tơnhào den gơlik geh jơnkah phan geh lơh bơh broă lơh sa suơn sre, he tăc ờ thàn. Den tàng khà phan geh lơh bơh broă lơh sa suơn sre hơ̆ gơtìp ồm. Den tàng hìu lơh phan bol añ dê rơwah măi mok pơr do nàng ngui geh jŏ ngai rơlao mờ phan kung gam uă bơta rơlao, bơkah rơlao”.

Mùl màl pà gŏ, bal mờ dùl bơta phan geh lơh bơh broă lơh sa suơn sre dê sơl, mơya tŭ geh lơh gơs phan nền nòn den gơtùi tơnguh uă ngan bơta kwơ phan kă bro, mờ dong kờl cau lơh sa rơcang lài rơlao tềng đăp mờ ală bơta tam gơl bơh drà kă bro phan dê. Nàng ai geh bơta pràn gah lơh gơs nền nòn phan geh lơh bơh broă lơh sa suơn sre dê, càr Lâm Đồng neh geh broă rơndăp lơh bơtàu tơnguh lơh gơs biăp plai chi nền nòn tơngai bơh nam 2026 tus 2030. Jơnau kờñ tus nam 2030, khà biăp plai chi neh geh lơh gơs phan nền nòn geh 30% tàm khà phan lơh geh, rơhời ai măi mok lơh gơs phan nền nòn gơs bơta pràn gơguh kwơ màng bơh lơh sa suơn sre càr dê.

Jăt ồng Phạn Nguyễn Hoàng Tân, Kwang Lam bồ Sờh Broă lơh sa suơn sre mờ Tiah ơm kis càr Lâm Đồng pà git, broă lơh gơs phan nền nòn là bơta tờm nàng tơnguh bơta kwơ phan geh lơh, tơnguh bơta pràn tàm pơrlòng mờ pờ geh drà kă bro phan mờ lơgar bơdìh ai càr dê. Ồng Phan Nguyễn Hoàng Tân đơs nền: “Nàng tơnguh bơta kwơ tàm pơrlòng bơh gah dê kung bè bơtàu tơnguh drà kă bro, tàm hơ̆ uă ngan là tăc mờ lơgar bơdìh den he pal ai ală tiah mìng geh tam, lơh gơs phan pal pơgồp mờ bơta niam phan lơh geh. Mờ bal mờ hơ̆ tơnguh khà lơh gơs phan tàm gah lơh sa suơn sre in, nàng ai geh bơta kwơ gơguh mờ tơnguh uă bơta pràn tàm pơrlòng bơh gah do dê”.

Bơh tàm ală hìu lơh gơs phan mìng geh lơh tàm hìu nhă tờm tus mờ ală mpồl lơh sa kă bro bơcri priă blơi phan lơh broă pa, lơh gơs phan nền nòn gam ai geh bơta tam gơl pràn kơl dang tàm bồ tơngoh bơtàu tơnguh lơh sa suơn sre tàm càr Lâm Đồng dê. Tơl bơta phan geh lơh bơh broă lơh sa suơn sre tơnơ̆ mờ tŭ lơh gơs nền nòn ờ mìng pơgồp bal tàm broă tơnguh priă geh ai làng bol in, tơrmù hoàc huơr tơnơ̆ tơnhào mờ gam tơnguh uă bơta pràn tàm pơrlòng, rề ơnàng drà kă bro phan. Do là gùng dà broă lơh kwơ màng nàng phan geh lơh bơh broă lơh sa suơn sre càr Lâm Đồng dê gơguh bơta kwơ mờ bơtàu tơnguh kơl jăp.