Deh mờ dờng tàm tiah ƀòn kăc màng xã Ia Hrung, kơnhoàl Ia Grai, càr Gia Lai, Ksor Phiếu tơnggơs hìu bơnhă mờ bàr nơm mpàng tê soh. Kơnòm gĭt kong bòl glar kal ke lơh sa mờ gĭt tềm pềr, den tàng rài kis bàr nă ùr bơklau pa bau ngai sơlơ tơl ngui tơl sa rlau. Tŭ do, Ksor Phiếu là dùl tàm ală hìu geh rài kis lơh sa pas sơm tàm ƀòn bal mờ mờr 2 lồ kơphê tam bơrlŭ bal mờ tiêu mờ ròng tai 17 nơm kơnrồ.

Nam lài, kơphê geh giă, hìu bơnhă ồng geh priă jền rlau 400 tơlak đong. Uă hìu tàm ƀòn neh lùp bơsram mờng chài tam chi jŏ nam mờ ròng siam phan puan jơng bơh Kwang ătbồ thôn ồng Ksor Phiếu dê mờ rài kis lơh sa khi dê kung bơtàu tơngguh rlau. Tŭ do, 200 hìu bơh ƀòn dê, hìu lơi kung geh lơm ti vi, rơndeh măy. Uă hìu bơnhă neh lơh geh hìu đam niam tre ngan. Làng bol tàm ƀòn neh geh rài kis kơ̆ kơl jăp. Mơya gùng lòt rê tàm ƀòn ờ hềt ƀươn soh. Nam 2023, Kwang ătbồ thôn ồng Ksor Phiếu neh kơlôi gơlik broă là kơnờm mpồl lơh oh mi bal bơh ƀòn dê là Kông ty Kơphê Ia Grai bal mờ ală hìu kă bro tàm ƀòn lơgar dong kờl priă jền mờ lam lơh ală gùng che đèng pờ àng gùng ƀòn. Kơnờm bè hơ̆ mờ broă lòt rê tàm trồ mang làng bol dê ƀươn ngan. Ồng Ksor Tí, kis tàm ƀòn Blo Dung, đơs: Bơh ngai ồng Ksor Phiếu geh pồ lơh Ƀí thư Ci ƀộ mơkung là Kwang ătbồ thôn, ồng neh lơh uă dơ̆ pơrjum nàng mblàng yal làng bol in, is ồn là ơruh pơnu ờ gŏ di măy rơndeh tŭ neh ñô  bơñul, hòi jà làng bol sang tĕ jơnau bau gờñ. Ai tàm bơtàu tơngguh lơh sa, mìng là tam kơphê mờ lơh sre, tŭ do, gơ wèt mờ tam kơphê dồ kàl sùm lơh geh bơh 5 tus 6 tấn gar. Mờ broă lơh pờ àng gùng ƀòn, tàm ală ngai do, mpồl lơh oh mi bal kung neh dong kờl mờ crăp 5 nơm pil năng lượng măt tơngai nàng pờ àng gùng ƀòn.

Sùm sùm pah nhai, ồng Ksor Phiếu bơyai lơh pơrjum làng bol tàm ƀòn nàng tàm lùp tơn ală kal ke bơta gơkòl tàm rài kis. Tàm ală dơ̆ pơrjum ƀòn pa do, ồng Ksor Phiếu kung song dơ pă đơs broă bè broă dồ bơnah ơruh pơnu kơnòm pa tàu gam lơh tìs Adăt Lòt rê gùng ù gờl. Ồng kung bal mờ Mpồl sền gàr is lơngăp lơngai rơndăp tăp sèng ƀòn Blo Dung dê tus tơn tàm tơl hìu sồr kĭ hơ ờ lơh tìs adăt boh lam lơngăp lơngai lòt rê tàm gùng. Thiếu tá ồng Vũ Hùng Cường, Kwang ătbồ Kwang àng xã Ia Hrung, đơs: Mpồl Kwang àng mờ ală oh mi tàm thôn, ƀòn, is ồn là ồng Ksor Phiếu jơh nùs ngan tàm broă lơh do, sồr ală hìu làng bol hơ bơto bơtê adăt boh lam ai ală sau in den ală sau neh lơh jăt niam. Is ồn là mè bèp neh rơcăng lài jun kòn lòt bơsram ala tài jàu rơndeh ai ală sau in lòt bơsram.

Kwang ătbồ thôn Blo Dung ồng Ksor Phiếu gam jơh nùs tus bal tơrña bơyai ală dơ̆ tam pìt tam phàm, tam lah tàm gơjrañ tàm mpồl bơtiàn. Hòi jà làng bol tus bal rơcăng dră wơl ală cau lơh tìs; sang jơh bơhiàn mờng kwèng bau gờñ, bau mờ cau rềp jơi nòi bal nàng bơ̆t bơtàu rài kis niam chài tàm tiah làng bol ơm kis. Ồng Ksor Phiếu đơs là: là dồ nă đảng viên, là kwang ătbồ thôn broă lơi he kung pal lơh krơh lơh lài, làng bol hơ̆ sồng đòm jăt. Ồng Ksor Phiếu, đơs: Añ tơngkah ơruh pơnu lòt rơndeh pal lơh jăt Adăt Lơngăp lơngai lòt rê tàm gùng bè ndau sơgơn gàr bồ, ờ geh ñô ơlak ƀièr tŭ măy rơndeh. Pal tơl sơnam den hơ̆ sồng geh bau, sang tĕ ală bơhiàn bơngơl gơla mờ hòi jà ală hìu bơnhă là ai ală sau in lòt bơsram wil tơl. Dồ broă tai kwơmàng ngan là pa do sùm gơlik geh dơ̆ broă kơnòm dềt gơtìp dà bŭ tàm uă tiah, den tàng añ kung sùm bơto tơngkah sùm làng bol pal sền gròi trăng gàr tus oh kòn kòn sau he dê uă rlau tai nàng pleh gơtìp ală dơ̆ broă jê sồt muăt jrùm ndrờm bè hơ̆.

Ồng Thái Hồng Cương, Ƀí thư Đảng ủy xã Ia Hrung đơs là: Ală cồng nha bè bơtàu tơngguh lơh sa- mpồl bơtiàn tàm ƀòn Blo Dung geh bơnah tă pơgồp ờ dồ êt bơh ồng Ksor Phiếu dê. Ồng Thái Hồng Cương, đơs: Gơ wèt mờ ồng Ksor Phiếu mờ gơnoar broă là Ƀí thư mơkung là Kwang ătbồ thôn den ồng kung sùm lơh jăt lam lơh ală tơnggume broă dong kờl bơh Đảng dê, adăt boh lam bơh Dà lơgar dê di tŭ ai làng bol in. Bơh ală dơ̆ pơrjum cribơyai ci ƀộ, pơrjum cribơyai pơgồp bal ală thôn, ƀòn, ồng hòi jà làng bol sang tĕ ală bơhiàn bơngơl gơla. Tus tŭ do, tàm ƀòn, broă lơh bơtàu tơngguh lơh sa- mpồl bơtiàn mờ gàr niam lơngăp lơngai cíñ trị sùm kơ̆ kơl jăp.

Ksor Phiếu sùm geh làng bol ƀòn Blo Dung, xã Ia Hrung, kơnhoàl Ia Grai, càr Gia Lai pin dờn kờñ gơboh mờ sền dờng màng ngan.