Do là dơ̆ sơn rờp Dơ̆ lơh chờ Sầu riêng tàm càr Dăk Lăk geh bơyai lơh tàm kâp càr, geh lơh bơh ngai 15/8 tus ngai 02/9 tàm sơnah ƀòn Buôn Ma Thuột, sàh Krông Pắc, sơnah ƀòn Tuy Hòa bal mờ bàr pe ƀòn lơgar geh bă ù tam sầu riêng uă.

Dơ̆ lơh chờ geh 17 broă lơh, pơn rơ bè: Dơ̆ sơn đờm mut lơh tàm Ƀlàng dờng ngai 10 nhai 3; Anih cribơyai ală mpồl lơh sầu riêng kơnhăp kơ̆; dơ̆ lơh chờ phan sa wèt tus lơh geh bơta dờng ngan rlau jơh Việt Nam mờ 102 phan sa geh trŭ gơm bơh sầu riêng; tiah ràng tơlik mìng gah lơh phan sầu riêng mờ phan OCOP; ală tour lòt sền suơn sầu riêng pơgồp bal mờ lòt nhơl niam chài - brê bơnơm; bal mờ uă broă lơh niam chài đơs crih tamya, ràng tơlik mờ hòi jà kă bro phan.

Tàm dơ̆ pơrjum ƀău, uă cau cih ƀău neh lùp bè cồng nha mùl màl dơ̆ lơh chờ dê gơ wèt mờ cau tam sầu riêng, ngan là bơta pràn digơlan rề ơnàng drà tac phan, gơ hòi gơ jà bơcri priă, hòi jà kă bro phan mờ ală bơta tơl khà nàng sền swì cồng nha tơnơ̆ dơ̆ lơh chờ tơn jơh.

Hơ jơnau lùp do, mò Đặng Thị Thủy - Phó Kwang Lam bồ Sờh Broă lơh sa suơn sre mờ Tiah ơm kis càr Dăk Lăk pà git, ƀòn lơgar gam lam lơh ndrờm bal ală broă lơh atbồ màh sồ tiah tam, anih dap phan, sơlơ tơnguh tai tam gơl sồ, sền swì tơnơ̆, lam lơh gơlik phan jat mpồl lơh bal, bơtàu tơnguh lơh gơlik jrô, logistics mờ li la drà tac phan hờ lơgar ndai nàng kờñ bơt bơtàu gah lơh phan sầu riêng bơtàu tơnguh kơ̆ kơljap jŏ jòng sùm:

“Sờh kung neh geh ală gùng dà, broă rơndap lơh mùl màl nàng tă pơgồp jơnau đơs Anih duh broă Làng bol càr in bè ală broă lơh tơl làm gah lơh phan dê tàm atbồ gah lơh phan sầu riêng. Bol hi gam tă pơgồp jơnau đơs mờ Anih duh broă Làng bol càr ai lơh jat broă rơndap lơh lơh pràn tam gơl sồ, tàm hơ̆ geh broă lơh dờng 30 ngai mang. Dơ̆ 2 là lơh jat ngan ngồn gùng dà sền swì tơnơ̆, tŭ do den gơ wèt mờ broă lơh pà màh sồ tiah tam mờ anih dăp ơn klơm phan den bol hi kung gam lơh pràn, lơh bè lơi nàng gơtùi pleh bơta blac pơrlồm tàm màh sồ tiah tam”.

Sầu riêng là gah lơh phan tờm ngan càr Dăk Lăk dê mờ bă ù tam mờr 45 rbô lồ, khà lơh geh nam 2025 dê geh 390 rbô tấn, priă lơh geh bơh tac hờ lơgar ndai rlau 1 tơmàn 100 tơlak dolar Mỹ.

Jat Mpồl Bơyai lơh, dơ̆ lơh chờ ờ mìng yal tơnggit mat kă bro sầu riêng Dăk Lăk mờ gam wèt tus bơt bơtàu ală gah lơh phan, chồl tơnguh lơh bal lơh gơlik - tac phan, gơ hòi gơ jà bơcri priă tàm broă lơh gơlik jrô, logistics mờ bơtàu tơnguh lòt nhơl broă lơh sa suơn sre. Dăk Lăk gam rơhời ai Dơ̆ lơh chờ Sầu riêng gơ gơs là broă kâp dà lơgar, wèt tus ndrờm pal ală lơgar.

Ồng Trần Hồng Tiến - Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, ală tour lòt sền suơn sầu riêng geh bơt bơtàu ờ mìng drơng dơ̆ lơh chờ in lơm mờ rơp geh kơlôi sơnơng nàng gơ gơs phan lòt nhơl sùm, pơgồp bơnah ai kàl sầu riêng gơ gơs anih pơrgon lòt nhơl pah nam Dăk Lăk dê:

“Ală tour do ờ mìng drơng tàm dơ̆ lơh chờ mờ tơnơ̆ do rơp geh kơlôi sơnơng, sền swì wơl gơ gơs ală tour lòt nhơl sùm pah nam. Digơlan là geh ală nam ờ bơyai lơh chờ, mơya nàng tơl nă cau tus mờ Dăk Lăk gơtùi sền git ală kàl tam, geh sa, geh sền broă sơngka sền gàr, lơh gơlik phan, pik tơnhàu, ơn dăp phan. Tơnơ̆ dơ̆ lơh chờ bol hi kơp kờñ là tơl kàl sầu riêng là tơl nă cau rơp kah tus mờ rơp lòt nhơl Dăk Lăk”.