Bơh lồi nhai 3 nam 2026 tus tŭ do, trồ tơngai duh jŏ jòng neh lơh 757 lồ kòi kàl mrềr prang tàm ală tiah ƀlàng sre gơwèt ală sàh Hòa Thịnh, Hòa Mỹ, Tây Hòa mờ Phú Hòa 2 gơtìp ờ tơl dà. Nam lài, mìu càl rơbŭt dờng lơh tơrlah jơh ală rƀòng dà, bơtơ̆t rbòng dà den tàng tơngai sih tam kòi kàl mrềt prang 2025-2026 jơla 1 nhai pơndrờm mờ pah nam dê, lơh tơngai wă kòi bun mờ kòi lik gơ di tàm tơngai trồ prang ờ geh dà uă.

Nàng dong tờm kòi, sùm 10 ngai do, Kông ty nă să is Dà broă lơh sa suơn sre Đồng Cam neh dơ̆ lĕ bal pờ 7 trạm ƀồm dà. Bal mờ ală trạm ƀồm dà kơ̆, măi ƀồm dà ing kung geh mut ngui jơh sơl. Dà tàm ală dà dờng geh ngui uă ngan nàng ƀồm dà bơtơl tàm ală rbòng dà ală tiah in. Ồng Nguyễn Văn Nhành, Phó Lam bồ Kông ty nă să is Dà broă lơh sa suơn sre Đồng Cam pà gĭt:

 "Gơwèt mờ bă tiah ờ tơl dà rlau 700 lồ gơwèt ală rbòng dà đah jum den broă lơh là ƀồm dà di tŭ nàng ờ gơtìp gơrềng tus cồng nha tơnhào. Jat jơnau kờp dŭ lài bơh tŭ do tus lồi nhai 4 là trồ tơngai duh uă ngan den tàng poh do mờ poh tơnơ̆ tai là tŭ tơngai kal ke ngan, den kông ty kung gam ƀồm dà sùm, tŭ mờ tờm kòi gar neh să kràñ rao den kông ty rơ̆p tơrmù broă ƀồm dà wơl”.

Nàng broă tam pà dà lơh jat geh cồng nha, ală mpồl drơng dà broă lơh sa suơn sre ơm lơh broă jơh ngai mang, dùl gah ngui ală trạm ƀồm dà nàng rcang pleh ro kơnrañ, dùl gah pơgồp bal mờ mpồl dà broă lơh sa suơn sre bơh ală Mpồl lơh broă bal broă lơh sa suơn sre lam lơh ai dà di pal jat gùng dà bơh ngài tus rềp; tơrmù ƀà bơta cau lơh broă sa suơn sre gơ jal ai is dà lơh tìs mờ broă rơndăp lơh tam pà dà. Ồng Đặng Quốc Hoàn mpồl dà broă lơh sa suơn sre tàm tiah Hòa Đồng, Hòa Mỹ pà gĭt:

"Rcang lài pleh mờ trồ prang soăt dà den oh mi pal ơm lơh broă 100% nàng ƀồm dà ngai mang tus ală tiah ƀlàng sre jơnhoa, ngài mờ ală ƀlàng sre ờ geh dà”.

Pơhìn trồ prang soăt dà gam uă ngan rơ hời gơwèt mờ tiah kơh bơnơm càr Dăk Lăk dê, tŭ uă tơnau dơng dà rơhời soăt. Mờr 1 nhai do, 5 ngai dùl dơ̆ ală hìu bơnhă làng bol tàm thôn Hoà Sơn, sàh Sơn Hòa pal ƀồm dà mờ măi ƀồm, ƀồm dà bơh ală tơrlung dà nàng dong tờm kòi. Jat làng bol, ală tơnau dà ờ gam, mìng geh broă lơh tờ tơrlung dà nàng ƀồm dà hơ̆ sồng geh dong tờm kòi bulah gĭt là hoàc huơr uă ngan:

"Ƀồm dà dùl dơ̆ rao, dơ̆ do là dơ̆ 2 di lah ờ ƀồm dà là kòi ờ gơtùi geh gar”

Tềng đăp bơta trồ tơngai duh uă ngan bè tŭ do, Sờh Broă lơh sa suơn sre mờ Tiah ơm kis càr Dăk Lăk neh sồr ală anih lơh broă, mpồl lơh broă lòt sền, sền sơwì di pal bơta dà tàm tơl broă lơh bơt bơtàu rbòng dà kung bè lam lơh lơh gùng dà broă lơh, broă rơndăp lơh ngui dà geh cồng nha, di pal, gàr niam di pal mờ bơta geh ngan jơnau kờñ ngui dà bơh tơl kơnhoàl ù tiah, tơl tiah dê, is ồn là ală tiah yal tơngĭt lài uă trồ prang dờng soăt dà, ờ tơl dà; mơkung geh broă lơh tam phan di pal, tơrmù ƀà hoàc huơr tài bơh trồ prang dờng soăt dà lơh gơlik.