Tus tŭ do, tàm sàh neh geh uă broă lơh bơtơ̆t rơbòng dà geh lơh bè:  tơnao Sông Quao, Suối Đá, Cẩm Hang, rơbòng 812 – Châu Tá… Geh dà, làng bol lơh ngan rồ ù, rề ơnàng bă ù lơh sa suơn sre mờ tam uă bơta phan tam. Ồng Lê Xuân Sang, tàm thôn Liêm An, sàh Hồng Sơn pà git, 3 nam pa do, kơnờm mờ dà tuh geh tơl den tàng hìu nhă ồng lơh 1 lồ 2 sào sre lơh 3 kàl.

Pa do, ồng neh tam gơl jơh bă ù lơh kòi nàng tam tờm sen, tăc gar mờ tăc ngkòng sen. “Lài do tàm do mìng lơh kòi sre, dùl nam 3 kàl mơya kòi ờ geh tơnhào uă sơl. Tŭ do tam tờm sen di lah kờp tàm 1 sào kung geh bơh 15 tus 16 tơlăk đong sơl. Dùl nam tơnhào geh tus 3, 4 dơ̆. Tờm sen bơcri priă ờ hoan uă rơlao mờ kòi, di lah geh tơnhào uă ngan là tàm kàl do, tơnơ̆ satềp, jơh satềp, nam lài priă tăc sen tus 52 rơbô đong tàm 1 kĭ, nam do gam 17 rơbô đong tàm 1 kĭ”.

Hìu nhă ồng Nguyễn Kế Lộc kis tàm thôn bal mờ ồng Sang sơl, kung tam gơl 1 lồ ù sre lơh kòi nàng tam tờm sen mờ gŏ geh kwơ rơlao. “Lơh sre 1 lồ ù ờ geh tơnhào uă, geh tŭ ờ tơl priă tă. Gam tam tờm sen, di lah bè ờs bơcri priă bơh 2 tus 3 tơlăk đong tàm 1 sào 1 kàl lơh. Tus tàm kàl bè ờs den tă ờ uă, gam tŭ do den sơlơ̆u wơl tài trồ tiah, priă tă uă rơlao mờ kung gam geh priă cồng, cau lòt blơi tus tàm hìu nàng lùp tơn”.

Tài geh priă cồng, den tàng bơdìh mờ broă tam tờm sen tàm ù sre hìu tờm dê, uă hìu làng bol tàm do gam lòt ơpah ù tàm tiah ndai nàng rề ơnàng bă ù lơh sa. Bơh tàm broă tam tờm sen tàm 2, 3 bă sre thòng, tŭ do tờm sen tàm thôn Liêm An neh rề ơnàng git nđờ rơhiang lồ, bơkào sen lì poan kàl, kung kơnờm mờ dà geh bơh bơtơ̆t dơng dà dê sơl. Ồng Nguyễn Ngọc Chín, Kwang atbồ thôn Liêm An, sàh Hồng Sơn pà git, broă lơh tam tờm sen tàm ƀòn do là broă lơh tam gơl phan tam geh cồng nha, ala bă ù lơh kòi sre ờ geh cồng nha. Tờm sen sơntìl Đài Loan geh gơdờp uă ngan tài kơnờm mờ bơta pràn ơ̆t mờ trồ tiah prang, hòn gơs niam, ai geh tơnhào uă bơh gar bal mờ ngkòng, lơh geh ù tiah niam.

Ồng Nguyễn Ngọc Chín pà git: “Cồng nha di lah pơn drờm mờ lơh kòi tàm do den bơh 4 tạ tus 5 tạ tàm 1 lồ ù sre. Mơya tăc geh priă dŭt ndơl den cồng nha lơh sa ờ geh uă. Den tàng bơh tàm bơta do, làng bol lơh is hơ̆ sồng jòi bơsram bal. lài ngan là geh 2, 3 hìu tam, tơnơ̆ mờ hơ̆ gŏ lơh cồng nha den hơ̆ sồng bơtàu tơnguh jơh bơh 4 tus 5 nam do bloh. Tus tŭ do, mìng is thôn Liêm An tàm pơgăp 260 lồ ù tam tờm sen jơh gùt ƀòn”.

Tŭ do jơh gùt sàh Hồng Sơn geh rơlao 300 lồ ù tam tờm sen, mìng is tàm thôn Liêm An neh geh rơlao nggùl, mìng là tam gơl bơh ù sre lơh kòi. Mùl màl broă tam tờm sen tàm bă ù sre lơh kòi ờ geh cồng nha tàm ală tiah ndai tàm đah jum măt tơngai lik càr Lâm Đồng (càr Bình Thuận lài do) neh geh bơh uă nam lài bè Bắc Bình, Hải Ninh, Hàm Liêm, Đức Linh… Ală bă sre tam tờm sen geh uă cau năc lòt gan mờ tus sền nhơl, den tàng neh geh làng bol kơlôi tus mờ jơnau lơh lòt nhơl tàm bă ù tam tờm sen. Ồng Nguyễn Minh Sơn, cau lơh broă tàm Cơl dŭ Lơh sa sàh Hồng Sơn, càr Lâm Đồng pà git tai: “Bè gùng dà broă lơh, sàh rơ̆p pờ geh ală ơdŭ bơto nàng tơnguh cồng nha ai tờm sen in, hơ̆ sồng pơgồp bal mờ broă bơtàu tơnguh lòt nhơl tam phan lơh broă sa suơn sre. Tài bă ù tam tờm sen geh tŭ bơtàu tơnguh uă den rơ̆p ai geh ù tiah niam bơnĕ”.

Bă ù tam tờm sen tàm Liêm An, sàh Hồng Sơn rềp tơn tềng gùng sồ 1 mờ geh tơrbŏ mờ gùng lòt tàm ƀòn niam bơnĕ ngan, rơndeh ôtô gơtùi mŭt tus tơn tàm ƀlàng sre. Do là ală bơta pràn nàng sàh gơtùi dong kờl làng bol lơh broă lòt nhơl.