Mìng gam rlau 1 poh tai, Lơh chờ Sầu riêng Dăk Lăk nam 2026 rơ̆p ngan ngồn sơnđờm lơh bal mờ 17 ròt broă lơh geh lơh dờng. Dăk Lăk wèt tus lơh geh Khà jơnhoa ngan rlau jơh Guinness mờ mpồl rơndeh ƀán tải (hơ̆ là rơndeh pơndiang năc mờ phan) pơndiang sầu riêng jòng ngan rlau jơh dunia, lơh geh bơta kah niam mblàng yal jơnau, yal tơnggĭt uă măt kă bro sầu riêng Dăk Lăk tus drà ală lơgar.

Jơnau kơlôi lơh geh Khà jơnhoa ngan rlau jơh Guinness dunia geh bơh kơ̆p kờñ tơngguh uă bơta đal gŏ bơh sầu riêng Dăk Lăk dê tàm drà ală lơgar. Broă lơh lơh geh Khà jơnhoa ngan rlau jơh Guinness dunia ờ mìng cih tềl dùl tŭ tơngai pa mờ gam lơh gơlik geh bơta gơrề mblàng yal jơnau, gơhòi gơ jà bơta sền gròi bơh sră ƀăo mờ gơ̆p bơyô ală lơgar dê, bơh hơ̆ yal tơnggĭt uă rùp hin sầu riêng kung bè bă ù Dăk Lăk. Ồng Đào Mỹ, Phó Chủ tịch Anih duh broă Làng bol càr Dăk Lăk, Lam bồ Mpồl Bơyai lơh Lơh chờ Sầu riêng Dăk Lăk nam 2026 pà gĭt, tàm bơta gah sầu riêng gam tìp mờ uă bơta lòng, lơh chờ là broă lơh niam chài, mờ là tŭ niam yal tơnggĭt uă măt kă bro, tơngguh uă priă lơh geh mờ anih ơm sầu riêng Dăk Lăk dê tàm drà ală lơgar.