Bàr pe ngai do, ồng Võ Đình Việt ơm tàm thôn Lạc Nghiệp, xã Tu Tra, kơnhoàl Đơn Dương, càr Lâm Đồng gơlơh bè gam nggui tềng hơđang gơnru ồs tài bơh ờ gam tơl pràn tai jòi priă tơm priă cồng anih priă jền dê. Tơnơ̆ tŭ cĭt vaccine rơcăng kơryan kòp as sồt tềng kơltau geh pơnời Navet-LpVac, bơh Kông ty Navetco dê, mpồl kơnrồ dà toh 80 nơm bơh hìu bơnhă ồng Võ Đình Việt dê gơtìp kòp jê ndul gơjroh kơn jơ̆ ngan. Tàm hơ̆, 11 nơm neh chơ̆t, 12 nơm gơtìp gơ yò bun, 5 nơm gam mờr chơ̆t, ală kơnrồ gam wơl sùm gơbàn kòp wơl, ờ gam tơl pràn ai dà toh bè tŭ sơnrờp. Bơdìh hơ̆ tai, nàng dong kờl sơm kòp mpồl kơnrồ in, hìu bơnhă ồng neh tă rlau 1 tơmàn đong priă blơi sơnơm tơm ba. Jăt ồng Võ Đình Việt yal, hoàc hươr phan bơna gơ wèt mờ mpồl kơnrồ dà toh là dờng ngan mơya Kông ty Navetco geh wơl bơnah tơm wơl gam lơyah rlau pơndrờm mờ giă kơnrồ ờ hềt lơh puăc tàm drà đah bơdìh. Ồng Võ Đình Việt, đơs: Añ geh jơnau đơs là dan tơm 50 tơlak đong dồ nơm kơnrồ chơ̆t, ai kơnrồ gơ yò bun den tơm wơl bol hi in pal 30 tơlak đong. Tài bơh kơnrồ neh gơ yò bun den ờ gam tơl pràn tai nàng păt dà toh, sồr tơm wơl 30 tơlak đong là tơnơ̆ do bè ờs den añ tăc kơnrồ dà toh hơ̆ geh bơh 10 tus 15 tơlak đong, bal mờ priă tơm wơl 30 tơlak đong tai den añ hơ̆ sồng geh tơl pràn ròng wơl. Mờ dilah ờ tơm wơl geh 30 tơlak đong mờ bè bơta gam ai den bol hi mìng sang jơh sươn ròng kơnrồ lơm, mbè rơgơi mờ gơtùi ròng hơ̆, kơnrồ mbơh geh mờ ròng tai.

Khà giă tơm wơl pa ngan rlau jơh mờ Kông ty Navetco ai, gơ wèt mờ kơnrồ dà toh gơtìp chơ̆t geh khà tơm wơl 60 rbô đong dồ kĭ kơnrồ ờ hềt lơh puăc, 70 rbô đong dồ kĭ kơnrồ rơcăng geh bun, 80 rbô đong dồ kĭ kơnrồ me ờ geh bun mờ 85 rbô đong dồ kĭ kơnrồ me geh bun…Jăt ồng Trần Quang Huy, cau ròng kơnrồ dà toh tàm thôn Lạc Nghiệp, xã Tu Tra, kơnhoàl Đơn Dương đơs, khà giă tơm wơl do bơh Kông ty Navetco dê mìng ndrờm 1/3 lơm pơndrờm mờ khà hoàc hươr bơh làng bol lơh broă sa dê. Ồng Trần Quang Huy, đơs: Hoàc hươr là bơdìh mờ bơta kơ̆p kờñ bơh làng bol mờ kông ty dê mơya đah kông ty kung pal sền swì, dong kờl nàng bol ròng wơl geh pơgăp bơh 70- 80%, tơl nă cau kong hoàc hươr dồ êt. Mờ dilah tŭ do làng bol kong hoàc hươr uă ir, kông ty tơm wơl dồ êt ir, priă tăc jơh mpồl kơnrồ, pơgồp bal mờ priă dong kờl gơ gam ờ tơl priă tơm priă anih priă jền dê den mbơh ai priă mờ bol hi ròng wơl tai, ròng siam lơh sa ih.

Jăt ồng Trần Văn Hiếu, Kwang ătbồ Mpồl Làng bol lơh broă sa thôn Bồng Lai, xã Hiệp Thạnh, kơnhoàl Đức Trọng dê đơs, Kông ty Navetco ai is khà giă tơm hoàc hươr ờ jăt tàm khăt dồ bơnàng jă lơi. Mìng kờp is kơnrồ dà toh ròng lơh me tàm drà tŭ do geh giă rlau 70 tơlak đong dồ nơm roa, tàm tŭ khà giă tơm wơl ờ hềt tơl blơi nggùl nơm kơnrồ dà toh den làng bol ờ jai geh wơl kơnrồ nàng ròng wơl. Bơtơl tàm hơ̆ là Kông ty Navetco mìng kờp tơngai tơm wơl dong kờl bơh ngai geh kòp bơh sơnrờp tàm kơnrồ tus ngai 26/09/2024 là ờ dipal, tài bơh tus tơngai do kơnrồ kung gam sơl jơnau gơbàn wơl kòp mờ chơ̆t. Ồng Trần Văn Hiếu, đơs: Broă rơndăp lơh giă tơm wơl mờ kông ty dê ai ờ geh dồ bơnàng jă jak chài lơi. Kông ty đơs neh iăt kơno jơnau đơs ală anih tăc kơnrồ ròng lơh me den làng bol den là pal đơs loh hơ̆ là mpồl lơi nàng geh bơta tàm lùp loh làng, tài bơh giă blơi kơnrồ dà toh tŭ do ờ gŏ lơyah ờ. Pơnyơu bè Dalat milk, giă kờp bal là bơh 70 tus 85 tơlak đong dồ nơm kơnrồ; ai kông ty kơnrồ dà toh câu Á Thái Bình Dương den kờp bal bơh 85 tus 86 tơlak dồ nơm. Mờ ală rơndăp broă lơh Dà lơgar dê tơn bè rơndăp broă lơh bơtàu tơngguh kơnrồ pa do tàm kơnhoàl Cát Tiên, càr Lâm Đồng den dồ nơm kơnrồ giă kung neh bơh 75 tus 85 tơlak đong rao mờ ờ gŏ geh kơnrồ lơi giă lơyah bè kông ty đơs ờ.

Kờp tus tơngai do, anih lơh broă geh gơnoar càr Lâm Đồng cih dờp geh rlau 6 rbô 800 nơm kơnrồ dà toh gơtìp kòp jê ndul gơjroh tơnơ̆ tŭ cĭt vaccine rơcăng kơryan kòp as sồt tềng kơltau geh pơnời Navet- LpVac bơh Kông ty Navetco dê ai, tàm hơ̆ geh mờr 500 nơm kơnrồ neh gơtìp chơ̆t. Nàng dong kờl cau ròng phan in, ngai 20/08 pa do, Anih duh broă Làng bol càr Lâm Đồng neh ai lơh jăt Jơnau lơh nền tơnggơs mpồl lơh broă dong kờl tơm wơl hoàc hươr tàm mpồl kơnrồ dà toh gơtìp kòp jê ndul gơjroh tài bơh cĭt vaccine rơcăng kơryan kòp as sồt tềng kơltau geh pơnời. Bulah bè hơ̆, bơh tŭ hơ̆ tus tŭ do, mpồl lơh broă do kung gam ờ hềt geh broă lơh lơi tàm broă dong kờl tơm wơl hoàc hươr ai làng bol lơh broă sa in.