Kàl mìu nam 2026 tàm Gia Lai neh tus wơl, ală dà croh soăt dà neh geh hiòng dà hòr, ală tơnau dơng dà, bơtơ̆t rbòng dà sơnđờm broă lơh tàm pơ dar dơng dà pa. Mơya, bơta kơlôi rcang lơngăp lơngai tàm kàl mìu càl rơbŭt dờng kung gơguh pah ngai.

Tàm tiah đah mat tơngai mut càr Gia Lai, uă tơnau dơng dà bè Tân Sơn, Ia Mlah, Biển Hồ B, Ia Dréh halà Ia Ring, Ia Năng… neh gơlik geh bơta gơmŭt dà tàm bơtơ̆t kơryan dà, rơhiăt dà bơh tàm bơtơ̆t, ờ diơng van rbòng ai dà, rơđàng bê tông yuh dà tih dà lìu mờ lơh ờ diơng ală bơta broă lơh bơt bơtàu. Ngan ngồn pà gŏ bơnah dờng ală broă lơh bơt bơtàu geh lơh bơh bàr pe jơ̆t nam lài, lòt gan uă nam nhai ngui mơya ờ hềt geh bơcri priă lơh niam wơl ndrờm pal. Bàr pe tơnau dơng dà gơtìp bồr bŏ, tơrmù bơta pràn dơng dà; uă bơta phan gơbàn ờ diơng gơrềng tus broă ngui mờ gròi sền hiòng dà tàm kàl mìu dà tih dà lìu.

Ồng Rơ Châm Tin, Phó Chủ tịch Anih duh broă Làng bol sàh Ia Grai geh jơnau đơs jơnau dan: "Nàng gàr niam mờ ngui niam tơnau dơng dà den tàm tơngai tus kơ̆p kờñ gah lơh broă ờs mờng bơh càr dê lơh dơ̆ lòt sền tơrgùm wơl tàm dơlam tơnau dà, tơnơ̆ hơ̆ geh ală bơta nàng dan mờ ală kấp geh gơnoar dong kờl priă jền lơh niam wơl, lơh kơnhăp wơl, nàng gàr niam lơngăp lơngai broă lơh mờ drơng jơnau kờñ bơh làng bol dê”.

Ờ mìng tàm tiah đah mat tơngai mut càr dê lơm, uă broă lơh bơtơ̆t rbòng dà tàm tiah đah mat tơngai lik càr Gia Lai kung gam tàm bơta ờ diơng sơl. Jat Kông ty TNHH ngui broă lơh bơtơ̆t rbòng dà Bình Định, tàm 63 tơnau dơng dà bơh mpồl lơh broă atbồ tŭ do geh 9 tơnau dơng dà ờ diơng kơn jơ̆ ngan kờñ pal geh lơh niam wơl jal mhar. Ồng Bùi Phi Hùng, Phó Kwang lam bồ Kông ty TNHH ngui broă lơh bơt bơtàu bơtơ̆t rbòng dà Bình Định yal: "Ală broă lơh bơcri priă lơh dờng kờñ pal tơmŭt tàm mat bơcri priă dà lơgar nàng càr halà Dà lơgar in ai priă jền lơh jat. Tŭ lơh niam wơl jơh rơ̆p jàu wơl ai kông ty atbồ in ngui. Bơta pràn bơh kông ty dê tŭ do mìng tơl bơsong ală bơta ờ diơng dềt, bè mpồng van yuh dà tih, mpồng van rbòng dà halà tơrlah dùl gơl rbòng dà cèng bơta gơlik geh sùm lơm”.

Jat gah Broă lơh sa suơn sre mờ Tiah ơm kis càr Gia Lai, uă tơnau dơng dà geh lơh bơh jŏ ngan tŭ do ờ gam tơl bơta pràn lơh geh jơnau sồr ngui tàm bơta trồ tiah ờ niam ngai sơlơ gơguh. Broă bơcri priă lơh niam wơl ờ mìng nàng kờñ tơn jŏ tơngai mut ngui broă lơh dê lơm mờ gam pơgồp bơnah gàr niam lơngăp lơngai ai làng bol tàm tiah đah đơm in tềng đap ală bơta digơlan gơlik geh dà tih dà lìu ờ niam. Càr Gia Lai neh lơh broă rơndăp lơh bơtàu tơnguh bơtơ̆t rbòng dà mờ dà sàng goh ƀòn lơgar tơngai bơh nam 2026 - 2030, pơlam gùng dà tus nam 2035. Tàm hơ̆, càr dan mờ Dà lơgar dong kờl priă lam lơh ală rơndăp broă lơh tờm nàng kờñ lơh kơ̆ wơl, lơh niam wơl ală broă lơh bơtơ̆t rbòng dà gơbàn ờ diơng kơn jơ̆ tàm ù tiah càr dê.

Ồng Cao Thanh Thương, Kwang Lam bồ Sờh Broă lơh sa suơn sre mờ Tiah ơm kis càr Gia Lai pà gĭt: "Bơta lài ngan rlau jơh là pal bơcri priă lơh ală phan bơna bơt bơtàu bơtơ̆t rbòng dà. Tơngai tus, Gia Lai tơrgùm kờp sền, sồr đơs bơcri priă lơh ală bơtơ̆t rbòng dà ai tiah đah mat tơngai mut càr Gia Lai in nàng lơh jat niam bơta ƀuơn, bơta pràn bơtàu tơnguh broă lơh sa suơn sre. Gia Lai kung neh dan mờ Chính phủ mờ ală Bộ, gah sền gròi dong kờl priă jền tơl dờng nàng bơcri priă lơh ală bơtơ̆t rbòng dà ring bal, lơh geh jơnau kờñ bơtàu tơnguh tàm tơngai pa”.

Broă bơcri priă lơh lơh niam ală tơnau dơng dà, bơtơ̆t rbòng dà tàm càr Gia Lai ờ mìng là jơnau sồr bè phan bơna bơt bơtàu lơm mờ gam là broă lơh kwơ màng nàng sền gàr lơngăp lơngai màng kis, jơtài phan bơna bơh làng bol dê. Do kung là ală bơta kờñ pal geh nàng càr Gia Lai in rcang lài drơng mờ trồ tiah lơh aniai, gàr niam bơtàu tơnguh kơnhăp kơ̆ tàm tơngai pa.