Tàm bơta trồ tơngai duh tàm ƀlàng sre thô Mỹ Xuân 1, sàh Hoà Thịnh, bi Nguyễn Hải Triều bal mờ 3 nă cau lơh broă gam măi rơndeh tơwès kòi, tơnhào 5 sào sre kòi neh dum. Bi Triều kah wơl, dơ̆ dà tih dà cò dờng ngan bơh lài tus tŭ do tàm nhai 11 nam 2025 neh pơrdô jơh phan bơna hìu nhă dê bal mờ kòi sơntìl nàng sih tam tàm kàl prang. Tơnơ̆ tŭ lơh wơl bă sre, hìu nhă geh dong kờl 30 kĭ kòi sơntìl, 50 kĭ phơng nàng lơh sa wơl. Tơnơ̆ rơlao 3 nhai sih, sơnka sền gàr, 5 sài sre kòi tŭ do neh tus tơngai tơnhào. “Hìu añ lơh 5 sào sre, ngui sơntìl kòi BĐR999 mờ Đài Thơm. Cồng nha nam do gơguh di pơgăp 20% pơn drờm mờ kàl lài. Đơs ngan là geh di pơgăp 4 tạ tàm 1 sào. Tơnhào kòi rê den he klah tàm 10 ƀào nàng lời sa, gam tai den tăc nàng geh priă tơm priă phơng, priă sơnơm mờ tơngai cau lơh broă”.

Tàm bă sre Hoà Tân Đông, sơnah ƀòn Đông Hoà, ồng Trần Văn Hữu bal mờ 2 nă kòn kung gam jal mhar tơnhào mờr 1 lồ sre kòi neh dum. Lơh sre kàl prang nam do, kơnờm mờ trồ tiah niam mờ broă sơnka sền gàr niam, cồng nha tơnhào kòi gơguh loh làng ngan. Ồng Hữu pà git: “Trồ tiah nam do niam, mìu niam nhàc niam, cồng nha kòi tàm kàl lơh sa do geh uă, tàm pơgăp bơh 300 tus 350 kĭ tàm 1 sào sre, gơguh di pơgăp 20% pơn drờm mờ kàl lơh sa nam lài. Hìu añ lơh 1 lồ sre den kung pal geh bơh 3 tấn 3 tạ tus 3 tấn 5 tạ kòi. Hìu nhă chờ hờp ngan”.

Ồng Nguyễn Thanh Minh, Kwang lam bồ Mpồl lơh broă bal Lơh sa suơn sre Hoà Đồng, sàh Hoà Thịnh pà git, tơnơ̆ mờ dơ̆ dà tih dà cò dờng ngan tàm nhai 11 nam 2025, bơnah uă hìu làng bol gơtìp hoàc huơr uă tŭ kòi sơntìl mờ phơng hữu kơ gơtìp dà cò pơrdô jơh, lơh ờ niam uă ngan tus mờ lơh sa tàm kàl prang. Lơh jăt jơnau sồr bơh Anih duh broă Làng bol càr Dăk Lăk dê bal mờ kơnờm tàm broă dong kờl bơh ală cau geh nùs nhơm niam, Mpồl lơh broă bal neh di tŭ ai 126 tấn kòi sơntìl bơkah, mờ bơyai lơh bơto nàng làng bol in git. Kơnờm mờ hơ̆, kàl lơh sa nam do geh cồng nha niam; Mpồl lơh broă bal kung rơcang tơrbŏ bal tăc kòi, pơgồp bal tàm broă kơl jăp drà tăc ai làng bol in.

Ồng Nguyễn Thanh Minh pà git: “Bồ kàl, Mpồl lơh broă bal neh pơgồp bal mờ Anih tờm Tam phan mờ Sền gàr phan tam càr Dăk Lăk (tiah 6) bơyai lơh bơto ai làng bol in bè bơta chài rơcang kơrian mờ tu kòp, bơto sồr ală broă sơnka sền gàr kòi nàng geh cồng nha uă rơlao. Tŭ do, Mpồl lơh broă bal pơn jăt tai pơgồp bal mờ mpồl bơto pơlam mờ dong kờl broă lơh sa suơn sre sàh, Cơl dŭ Lơh sa sàh mờ pơgồp bal 7 mpồl lơh sa kă bro nàng blơi kòi, dong kờl drà blơi kòi ai làng bol in. Gơwèt mờ kàl pơn jăt tai, Mpồl lơh broă bal rơ̆p pơgồp bal mờ Anih duh broă Làng bol sàh Hoà Thịnh nàng lơh broă rơndăp lơh pơn jăt tai dong kờl sơntìl kòi ai làng bol lơh broă sa suơn sre in di jăt mờ Jơnau sồr sồ 112 bơh Cíñ phủ dê”.

Lơh sa kàl prang 2025-2026, sàh Hoà Thịnh mờ sơnah ƀòn Đông Hoà sih tam mờr 4 rơbô lồ sre. Kơnờm mờ geh dong kờl sơntìl bal mờ dùl bơnah phơng sih hữu kơ, làng bol neh mhar brồ guh lơh sa. Kòi hòn gơs niam, cồng nha tơnhào kờp dŭ geh bơh 300 tus 400 kĭ tàm 1 sào ù. Tềng đăp mờ bơta di gơlan trồ tiah ờ niam ni sơna, ală tiah kung neh rơcang lơh jăt gùng dà broă tơnhào gờñ nàng tơrmù ờ uă ngan hoàc huơr.

Ồng Huỳnh Mỹ Phong, Củ tịc Anih duh broă Làng bol sơnah ƀòn Đông Hoà, càr Dăk Lăk pà git: “Nàng lơh geh cồng nha lơh sa kàl prang nam do, lơh jăt gùng dà broă lơh “lir tàm hìu rơlao mờ dum tàm sre”, Anih duh broă Làng bol sơnah ƀòn neh sồr ală Mpồl lơh broă bal lơh jăt broă rơndăp lơh tơnhào kòi ai làng bol in tŭ kòi neh dum geh bơh 85 tus 90%, tơrmù uă ngan broă kòi dum gơjrùh tàm sre. Mờ kung nàng pleh mờ trồ mìu càl pràn ni sơna lơh kòi gơpừ, pă tờm, gar kòi di gơlan gơtìp căt bồ măt tơn tàm ƀlàng sre”.

Bơh tàm ală bă sre neh geh tŭ gơtìp dà tih dà cò lơh aniai, tŭ do kàl tơnhào, sơnyùr kòi geh uă neh tus wơl tàm ală sàh đah Măt tơngai lik càr Dăk Lăk dê; ờ mìng cèng geh nùs nhơm chờ hờp geh tơnhào uă mờ gam ai tơngŏ bơta pràn gơdờp bal mờ bơta pràn brồ guh kơ̆ kơl jăp bơh bơh làng bol lơh broă sa dê. Broă tus bal di tŭ bơh gơnoar atbồ, Mpồl lơh broă bal mờ ală mpồl dong kờl neh lơh geh anih kơl dìng kơl jăp nàng làng bol sơrlèt mờ kal ke nàng geh dùl kàl tơnhào kòi hờm ram.