Tơnau dà Ia Lâm, sàh Gào là dùl tàm ală tơnau ai dà kuơmàng ngan làng bol in, tŭ do neh soat jơh tơn. Nàng dong kis ală suơn chi tam ro tài trồ tơngai duh, uă hìu bơnhă làng bol pal ơpah măi chŏ, tờ jrô tàm tơnau nàng jòi dà cat gam wơl. Mơya, khà dà mìng dồ êt lơm do kung mhar ngan soat jơh. Bi Nguyễn Phát ơm tàm thôn O Grang, sàh Gào yal tàm bơta ờ git lơh bè lơi:

“Tŭ do kơ geh dà lơi mìng ƀồm geh 5, 7 tờm den he ƀồm đau, tàm pìt gơp mờ ƀồm nàng gơtùi dong tờm chi lơi den dong. Dà den sơlơ ngai sơlơ soat mhar ngan”.

Ờ mìng tơnau dà Ia Lâm, jơh 5 tơnau, bơtơt dơng dà tàm sàh Gào ndrờm neh soat jơh lơm. Ồng Bùi Văn Thoả bal mờ uă hìu bơnhă làng bol gam ƀồm dà bơh tơnau dà Ku Tong pà git, làng bol gam ƀồm wơl dà gam dồ êt dut ndơl. Jat ồng Thoả, dilah trồ pơn jat tai tơngai duh, mìng tàm dùl tơngai lơyah lơm den tơnau rơp soat jơh:

“Làng bol tŭ do kơlôi rơcang ngan, ờ geh dà ƀồm, kal ke ngan. Bàr pe hìu bơnhă làng bol tàm do kung khoàng tơrlung dà sơl, mơya ờ gŏ geh dà”.

Bơta ờ tơl dà ƀồm chi tam in tàm càr Gia Lai gam gơ rề jat pah ngai, ngan là tàm tiah đah mat tơngai mut càr dê. Ồng Rơ Mah Hêng, Phó Củ tịc Anih duh broă Làng bol sàh Ia Tôr pà git, tềng đap mat sàh tơrgùm mblàng yal, hòi jà làng bol ngui ală broă lơh ƀồm dà tềm pềr nàng gàr bè ờs broă lơh sa:

“Trồ tơngai duh bè do den ngan là rơp ờ tơl dà ƀồm, tài dà tŭ do mìng geh dà tơrlung mờ dà croh, ờ geh tơnau bơtơt dơng dà. Bol hi pơn jat tai mblàng yal, hòi jà làng bol ngui broă lơh ƀồm dà tềm pềr, gàr tơl dà ƀồm chi tam in”.

Mùl màl ai gŏ, bơta ờ tơl dà ƀồm chi tam in tàm càr Gia Lai sùm gơlik geh wơl pah nam tàm lồi tơngai prang duh, ngan là tiah đah mat tơngai mut càr dê. Tàm tơngai pa tơmut bal, đơng lam Tỉñ ủy càr Gia Lai neh sồr sơn đờm lam lơh broă lam lơh tam gơl pràn rbòng dà mờ kờp jơh priă bơcri lơh gơguh tus 17 rbô tơmàn đong, tàm tơngai lơh broă bơh nam 2025 tus nam 2030. Ai tềng đap mat den ală sàh pal lơh niam wơl jơh ală bơtơt rbòng dà gam geh. Ồng Nguyễn Văn Phương, Cơldŭ Lơh sa sàh Gào pà git:

“Sàh kung dan càr dong priă jền nàng lơh niam wơl ală tơnau dà, bơtơt dơng dà tàm sàh. Bè hơ̆ den he kung rơp lam lơh tuah wàs rbòng dà, tơnau dà nàng geh tơl dà ƀồm ai chi tam jŏ nam tàm tiah do in. Bè jŏ jòng den lòt sền ală dà croh nàng lơh ală tơnau dềt dơng dà nàng tơnguh khà dà cat kung bè lơh gơlik ală tiah ƀồm dà dềt tàm sàh”.