Lâm Đồng tŭ do geh 16 rơbô lồ mắc ca, geh tus 34% kờp jơh bă ù tam mắc ca bơh jơh gùt lơgar dê, kờp dŭ khà lơh geh nam 2025 geh pơgăp 13 rơbô 700 tấn, priă cồng lơh geh kờp bal bơh 100 tus 300 tơlak đong dùl lồ dùl nam jat broă lơh tam phan. Nàng mắc ca gơ gơs dùl tàm ală phan tam cèng wơl priă lơh geh uă ai càr in, Lâm Đồng gam lơh jat rơndăp ù tiah tam, ai bă ù tam mắc ca jơh gùt càr tus nam 2030 gơguh 37 rơbô lồ, khà lơh geh 48 rơbô tấn, khà lơh gơlik rlau 90%.

Jat ồng Nguyễn Hà Lộc, Phó Kwang lam bồ Sờh Broă lơh sa suơn sre mờ Tiah ơm kis càr Lâm Đồng pà gĭt, bal mờ ală phan tam ndai, mắc ca bơtàu tơnguh bè dùl gah phan geh bơta ƀuơn, bơta pràn uă ngan bơh càr dê. Nàng lơh geh jơnau kờñ geh ai, bơdìh mờ tơnguh uă bơta niam tờm sơntìl, lơh pràn lơh bal tam mắc ca jat ală mpồl, càr rơ̆p sền gròi bơtàu tơnguh jat gùng dà broă lơh sa suơn sre măi mok pa mờ ngui măi mok lơh gơlik jrô nàng kờñ tơnguh uă bơta kwơ gah phan dê, dong kờl cau lơh broă sa tam phan jat gùng dà kơ̆ kơl jăp jŏ jòng.