Tơnơ̆ tŭ Anih duh broă làng bol càr Lâm Đồng geh jơnau lơh nền ring bal lơh Jơnau neh lơh nền lơh tơrlòng lài lơh ală broă lơh lòt nhơl lơh broă lơh sa suơn sre tàm ù tiah do dê tàm lồi nam 2015, tus nam 2018, gah lòt nhơl càr Lâm Đồng neh pơgồp bal mờ ală mpồl lơh broă geh gơrềng lơh dơ̆ sền sơ wì mờ dờp 33 tiah lòt nhơl lơh broă sa suơn sre. Bơh hơ̆, phan bơna lòt nhơl broă lơh sa suơn sre tàm càr Lâm Đồng neh hời rơ hời lơh jat bơta pràn, gơ hòi gơ jà rlau 7 tơlak dơ̆ năc tus sền mờ sền gĭt, cèng wơl priă lơh geh uă ai làng bol tàm tiah do in.

Mơya, tài bơh gơtìp uă bơta kơryan tài bơh ală jơnau cih bơh adat boh lam dê gam ngui tŭ do, kung bè ờ hềt geh broă lơh bơto pơlam ngan ngồn bơh ală Ƀộ, gah broă, Dà lơgar geh gơrềng gơ lam tus broă bơtàu tơnguh lòt nhơl lơh broă sa suơn sre tàm càr Lâm Đồng gơtìp uă kal ke. Ngan là ală jơnau cih bè broă jàu lơh tàm ù broă lơh sa, tam gơl ù broă lơh sa gơ gơs ù ờ di broă lơh sa, rơndăp broă ngui ù, bơta lơh uă lơh geh rơkàng glòm,... Jat mò Lê Thị Quỳnh Như, cau tờm Suơn dờng Cún tàm sơnah ƀòn 7, ƀòn dờng Dà Làc yal, ală bơta kal ke do gơ lam tus broă bơtàu tơnguh lơh broă sa suơn sre tàm tiah do dê gơ lơh bè gơ mut tàm bơta gơ kòl. “Suơn dờng lơh  broă sa suơn sre geh ròng phan poan jơng, phan he kờñ, geh ală phan bơna krơi is bơh Dà Làc dê bè zơu tơi, blơn sùt, biăp tam tàm dà... den kung geh uă năc lòt nhơl tus sền mờ sền gĭt. Mơya, pal geh tiah ròng ngài, tiah tam phan lơh geh bơh broă lơh sa, tiah ràng tơlik, tiah wă rò năc, tiah tơrgùm hìu jă brê, tiah tăc dà hùc,... ală broă lơh do sồr pal geh nàng wă rò năc mơya tŭ mut lơh den gơtìp gơkòl wơl tàm bơta lơh tìs rơndăp tăp sèng bơt bơtàu”.

Đơs pơndŭt pơrjum, ồng Phạm S, Phó Củ tịc Anih duh broă làng bol càr Lâm Đồng đơs nền, bơta ƀuơn, bơta pràn bơtàu tơnguh lòt nhơl lơh broă sa suơn sre bơh càr dê là dờng ngan mơya tàm tŭ lam lơh jat neh gơtìp uă bơta kơryan, tàm hơ̆ kal ke dờng ngan rlau jơh là kòl yan ală Adat Lòt nhơl, Adat Ù tiah mờ Adat bơt bơtàu. Nàng sơlơ tơnguh tai lòt nhơl lơh broă sa suơn sre bơtàu tơnguh pràn, cèng bơta bơtàu tơnguh mhar tàm tơngai tus, càr gam sồr ală anih lơh broă geh gơnoar lơh broă lơh ngui ù uă jơnau kờñ ai lòt nhơl lơh broă sa suơn sre in geh bal ală jơnau cih loh làng, ngan ngồn nàng yal mờ kấp geh gơnăp gơnoar in ring bal. Bè broă lơh, lơh jat jat tàm ală Adat Ù tiah nam 2024 mờ ală sră nggal geh jơnau cih nền cê lơh jat geh gơrềng. Ồng Phạm S, pà gĭt: “Ală rơndăp broă lơh lòt nhơl lơh broă sa suơn sre geh ù bơt bơtàu halà dùl rơndăp broă lơh is den sồr là lơh jat bè dùl rơndăp broă lơh bơcri priă mờ pơyoa Sở Broă rơndăp lơh mờ Bơcri priă in sền sơ wì jat di broă rơndăp tăp sèng. Mpồl dơ̆ 2 là ù Broă lơh sa ờs mờng mờ bol he ngui uă jơnau kờñ bơh cau dồ nă să dê den pơyoa ai Cơdŭ lơh broă Phan kwơ geh is mờ Tiah ơm kis, Anih duh broă làng bol kấp kơnhoàl in ring bal. Gơwèt mờ ù broă lơh sa uă jơnau kờñ bơh mpồl cau dê ngui den kung lơh jơh ală tơngume pơyoa Sở Phan kwơ geh is mờ Tiah ơm kis in sền sơ wì, yal mờ anih lơh broă geh gơnoar lơh nền. Bàr tơngume do krơi is, dồ nơm là rơndăp broă lơh geh tam gơl jơnau kờñ bơt bơtàu, bơta gam wơl là ù uă jơnau kờñ den lơh broă lơh bơt bơtàu jat bơta tă sờr, crăp wơl, ờ gŏ di tam gơl jơnau kờñ tài ngan ngồn là ù broă lơh sa dê”.

Ồng Phạm S jàu Sở, ală tiah geh gơrềng, pơn jat tai kờp sền ală tiah lòt nhơl lơh broă sa suơn sre neh geh dờp, bơto pơlam ală mpồl lơh broă bơtơl, lơh sir ală bơta nàng dan sền sơ wì mờ dờp broă lơh lòt nhơl lơh broă sa suơn sre; tơrgùm wơl ală jơnau đơs tă pơgồp, jơnau đơs jơnau dan bơh ală cau ala mat dê nàng bơtơl, lơh sir ală tơngume, broă jàu mờ yal mờ Anih duh broă làng bol càr in sền sơ wì, bơtơl, tam gơl broă lơh di pal mờ bơta geh ngan, nàng kờñ pơn jat tai ngui niam ală bơta ƀuơn, bơta pràn gam geh tŭ do, bơtàu tơnguh lòt  nhơl lơh broă sa suơn sre jat di mờ gùng dà pơlam neh geh ai.