Pa sền bơta duh tàm tiah tam bơsềt đông trùng hạ thảo, bi Đoàn Quốc Anh Khôi, Kwang atbồ mpồl lơh broă bal Đông trùng hạ thảo Kon Tum pà git, kờñ bơsềt đông trùng hạ thảo hòn gơs niam, broă tam pà bơta duh tàm cơl dŭ kung bè phan ƀồm dà bè mhoal là kwơ màng ngan. Den tàng, bi neh tơrgùm ală bơta phan lơh broă pa, gơguh jăk nàng lơh gơs phan geh bơta niam uă.

Bal mờ hơ̆, mpồl lơh broă bal kung sền kwơ tàm broă ngui măi mok pa tàm broă lơh, yal rùp rài, hòi jà blơi phan geh lơh mờ broă ai phan geh lơh tơmŭt tàm drà kă bro điện tử. Kơnờm mờ hơ̆, neh tìp mờ uă cau kờñ blơi tàm lơgar, priă geh uă rơlao bơh 2 dơ̆ tus 3 dơ̆ pơn drờm mờ lài do. Bi Đoàn Quốc Anh Khôi pà git: “Sền gŏ làng bol tam gơl gùng dà broă blơi phan den mpồl lơh broă bal neh lơh livestream mờ tăc tàm jơh ală drà kă bro điện tử tŭ do geh tàm lơgar Việt Nam den kung geh đao priă ai mpồl lơh broă bal in sơl mờ lơh gơguh priă geh bơh 15 tus 20% ai ală cau tàm mpồl in pah nhai”.

Jơnau ngui “tam gơl sồ” ờ gam krơi is mờ ală cau tàm Mpồl lơh broă bal Lơh sa suơn sre, Lơh sa mờ Kă bro phan Sáu Nhung gam sơnđan là (Mpồl lơh broă bal Sáu nhung) dê, do là dùl Mpồl lơh broă bal lơh sa suơn sre geh bơta pràn bè ală phan geh lơh bơh kơphe tàm kơnhoàl Đăk Hà, càr Kon Tum dê. Bơh tŭ mpồl lơh broă bal lơh pràn broă bơcri priă, ngui ală bơta phan gơguh jăk bơh măi mok pa tàm broă lơh, lơh gơs phan geh lơh, kă bro phan geh lơh neh tơnguh uă cồng nha lơh broă, bơta pràn tàm pơrlòng, cồng nha lơh sa kă bro. Lŏ Ngô Thị Mai, cau tàm mpồl lơh broă bal Sáu Nhung pà git: “Tŭ tus bal tàm mpồl lơh broă bal, geh broă bơcri priă bè măi mok pa uă rơlao mờ lài do. Bă ù hìu añ gam tuh dà tềm pềr ƀồm bè mìu tềng tờm, phan tuh dà do tềm pềr dà, phơng sih mờ cau lơh broă. Sền gàr jăt broă lơh hữu kơ kung cèng geh suơn tam phan bơtàu tơnguh kơl jăp”.

Jăt ồng Nguyễn Tri Sáu, Củ tịc mpồl duh broă atbồ mpồl lơh broă bal Sáu Nhung đơs, tŭ do mpồl lơh broă bal geh rơlao 100 nă cau mờ kờp jơh bă ù tam ơnàng rơlao 300 lồ kơphe. Broă ngui măi mok pa ờ mìng bơsong geh broă atbồ mpồl lơh sa kă bro, ai geh nùs nhơm pin dờn bơh cau ngui sa in, mờ gam cèng geh uă ngan bơta kwơ ndai bè geh tìp bal mờ uă cau blơi, pah nam priă geh tàm broă tăc phan tàm internet sùm gơguh tàm khà rơlao 10%, tàm hơ̆ uă ngan là phan geh lơh bơh kơphe klài. Dùl bơta kwơ dờng ndai là ngui măi mok pa jơh ală broă lơh, neh dong kờl broă prăp gàr sră nggal mhar niam, ƀuơn jòi, tơmù sră pơ-àr ngan. Ồng Nguyễn Tri Sáu đơs: “Bol añ sùm git ai phan geh lơh bơh mpồl lơh broă bal dê jăt mờ gùng dà broă bơcri priă lài ngan là lơh bơkah nàng gơguh khà măt kă bro. Bol añ sền gròi tàm ală broă mblàng yal, yal phan bơh ală gah lơh broă nàng cau blơi in git phan geh lơh bơkah. Dơ̆ bàr tai là lơh geh uă ală bơta phan tŭ do bol añ neh lơh geh jơi kơphe hùc tơn, kơphe klăc pơnai, kơphe klăc nàng mum”.

Ồng Nguyễn Lâm Cảnh, Củ tịc Mpồl tam klăc mpồl lơh broă bal càr Kon Tum pà git, tam gơl sồ là gùng dà pal geh lơh bơh broă bơtàu tơnguh, lơh sa mpồl bal kung geh bal tàm gùng dà broă lơh do sơl. Mơya, tŭ do khà ală mpồl lơh broă bal tàm càr ngui măi mok pa tàm broă lơh, đơng lam gam ờ uă mờ dềt ngan.

Ồng Nguyễn Lâm Cảnh pà git: “Nàng lơh geh niam broă do den Mpồl tam klăc kung neh pơgồp bal mờ ală gah lơh broă ai ală mpồl lơh broă bal in tus bal ală dơ̆ ràng tơlik hòi jà kă bro phan, bơh tŭ hơ̆ ai geh bơta git gơ̆p bal đah ală mpồl lơh broă bal mờ ală mpồl lơh sa kă bro nàng tăc phan geh lơh. Dơ̆ bàr là dong kờl ai ală mpồl lơh broă bal in tơnguh bơta bơkah phan geh lơh, bơh tŭ hơ̆ ai geh ală phan geh lơh geh tơl niam jăt jơnau kờñ bơh drà kă bro dê nàng tơnguh uă bơta kwơ phan geh lơh bơh tiah lơh sa mpồl bal dê”.

Kờñ tơnguh uă bơta pràn tam gơl sồ bơh ală mpồl lơh broă bal, tàm tơngai tus, Mpồl tam klăc Mpồl lơh broă bal càr rơ̆p pơgồp bal mờ ală anih lơh broă gơrềng bal bơyai lơh bơto, bơtê, cri bơyai mìng dùl tơngu me nàng tơnguh uă jơnau git wă, bơta ngăc ngar ai kwang bàng atbồ mpồl lơh broă bal in bè bơta kwơ bơh broă ngui măi mok pa; bơyai lơh lòt sền ală mpồl lơh broă bal neh ngui măi mok pa, bơh tŭ hơ̆ geh bơsram bal, lơh geh uă tàm gùt càr.