Tàm tiah dà lềng Vũng Rô, àng drim gờñ bồ nam pa sơn đờm mờ àng mat tơngai sòl bơh đah mat tơngai lik. Rơya dà lềng gơ nsừc, càl nam pa khồm rơlĕ, cèng bal mờ bơta hang mờng kwèng ngan. Ơhò sok sền bơh Pôs ling sền gàr tiah nhàr lơgar mpồng nhàr lơgar anih ơhò ơm Vũng Rô dê sơn đờm lik lòt tàm dà lềng tàm dùl dơ̆ ơm gak pa. Gơ wèt mờ kwang bàng, cau ling tiah do, sa tềp ờ wil tơl ală ngai bơtòm tơrgùm mat mờ hìu bơnhă, mờ là ală dar lòt sok sền jŏ jòng, ală dơ̆ ơm gak gùt mang nàng dà lềng in ring lơngai, tiah hờ gah dà lềng geh kơnhăp kơ̆. Thượng úy Đỗ Đức Kiên, Lam bồ Mpồl gròi sền, Pôs ling sền gàr tiah nhàr lơgar Mpồng nhàr lơgar anih ơhò ơm Vũng Rô, Mpồl đơng lam Mpồl ling sền gàr tiah nhàr lơgar càr Dăk Lăk pà git: “Kwang bàng, cau ling Pôs ling sền gàr tiah nhàr lơgar Mpồng nhàr lơgar anih ơhò ơm Vũng Rô sùm git loh nùs nhơm geh kơnòl, sùm rơcang lài jơh nùs lam lơh ală broă lơh mờng chài lơh broă, is ồn là broă lơh git ală broă gơlik geh tàm ƀòn lơgar, di tŭ kơryan, bơsong ală broă sơ gràm tus lơngap lơngai cíñ trị, rơndap tap sèng ring lơngai mpồl bơtiàn. Gơ wèt mờ añ den do là nam dơ̆ 4 añ dan ơm gak sa tềp, den broă do añ lơh jơh nùs ngan, cèng chờ hờp chờ hờn, lời wơl tĕ bơta kah kơlôi tus hìu bơnhă, lơh ngan sền gàr lơngăp lơngai, niam ờdo ờdă tàm ƀòn lơgar, tài dùl sa tềp ram mhŭ, ring lơngai làng bol in”.

Tàm nggùl tiah rơya dà lềng, ală cau ling sền gàr tiah nhàr lơgar kung gam kơ̆ dơn jat sền tơl nơm ơhò plung, tơl tềl tơnggŏ dềt, ờ lời huĭ khat dùl jơnau pơhìn lơi. Gơ wèt mờ khi, sền gàr ring lơngai tiah dà lềng ờ mìng là kơnòl broă, mờ gam là jơnau sồr bơh plai nùs dê tai. Cau ling Trương Huy Hoàng, Pôs ling sền gàr tiah nhàr lơgar Mpồng nhàr lơgar anih ơhò ơm Vũng Rô đơs: “Bol hi kung kah hìu ngan sơl, mơya oh mi neh kwèng bloh, mìng kờñ ƀòn lơgar lơngăp lơngai, ơhò plung lòt hờ dà lềng ƀuơn ƀuài den hơ̆ là bơta chờ hờp bồ nam bơh oh mi bol hi dê. Añ nting bơr hìu bơnhă mờ jơh gùt làng bol geh dùl sa tềp chờ hờp, bềng lìu pràn kơldang să jan, lơngap lơngai, bơtàu tơnguh”.

Lòt bal mờ kơnòl broă sền gàr gơnoar tờm, ală cau ling sền gàr tiah nhàr lơgar gam là anih kơldìng kơ̆ kơnhăp ngan bơh cau lơh ka dê pah tŭ lòt lơh broă tàm dà lềng. Bơh pơlam lơh sră pơ àr, mblàng yal ờ ai tras, kup phan tàm dà lềng jat jơnau sồr IUU, tus dong kờl rềs àr tàm dà lềng, rùp să cau ling sền gàr tiah nhàr lơgar neh gơ gơs mờng kwèng ngan, đềt mềr ngan. Ồng Hà Thanh Hùng ơm tàm sơnah ƀòn Phú Yên, càr Dăk Lăk yal bè nùs nhơm đah cau lơh ka mờ ală cau ling sền gàr tiah nhàr lơgar: “Gơ wèt mờ ală oh mi ling sền gàr tiah nhàr lơgar bol hi gờm chờ ngan bơh ù gờl kung bè bồt dà lềng, tŭ ơhò plung bol hi dê geh bơta ờ niam lơi halà siơŭ siar bơta lơi den oh mi ling sền gàr tiah nhàr lơgar dong kờl jơh nùs ngan. Gơ wèt mờ ală ngai nam pa den oh mi ling sền gàr tiah nhàr lơgar neh lơh gơlik tơl bơta niam dong ală cau lơh ka, ală cau lơh broă tàm dà lềng bè bol hi, jơh nùs dong kờl mờ tơngkah ală bơta mờ dà lơgar ờ ai lơh”.

Bal mờ àng mat tơngai sòl àng drim gờñ tàm tiah nhàr lơgar tiah dà lềng, nam pa neh mpờl gŏ tàm ală rơkàng hìu pa tàm càr Dăk Lăk geh Mpồl ling sền gàr tiah nhàr lơgar dong kờl lơh gơs. Ală ngai sa tềp, nùs nhơm tàm ală hìu pa lơh gơs sơlơ chờ hờp chờ hờn rlau. Tơnơ̆ ală nhai, ală ngai bòl glar kal ke tài dà tih dà lìu dờng ngan, hìu pa ờ mìng là anih jơm tơngai, jơm mìu, mờ gam là anih kơldìng nàng làng bol in sơn đờm wơl rài kis. Ồng Trần Thế Lâm ơm tàm thôn Hiệp Đồng, sàh Hoà Xuân, càr Dăk Lăk đơs: “Bol hi chờ hờp ngan, ưn ngài ngan Đảng, Cíñ phủ, Dà lơgar mờ ală oh mi ling sền gàr tiah nhàr lơgar neh dong kờl hìu bơnhă lơh gơs hìu. Ờ sơnơng là gơtùi geh hìu bè sa tềp nam do, bè do den chờ hờp ngan”.

Tàm ală ngai bồ nam pa gam teh mpồng tus tơl thôn, ƀòn tiah dà tih dà lìu càr Dăk Lăk, bơta chờ hờp sơlơ wil tơl rlau tŭ git nđờ rhiang nơm hìu pa neh thàn lơh gơs, ala ală hìu neh geh tŭ tơrlah tơrlơm tơnơ̆ trồ tiah lơh aniai. Broă lơh Quang Trung neh dong càr lơh niam wơl 892 nơm hìu mờ lơh pa 606 nơm hìu, lơh gơlik tai anih kơldìng nàng làng bol in iang nùs gàr kơ̆ rài kis, wă rò dùl nam pa ram mhŭ rlau. Lòt bal mờ làng bol tàm gơl gùng hơ̆, Mpồl ling sền gàr tiah nhàr lơgar càr Dăk Lăk là mpồl geh mat bơh gờñ, pơgồp bal bơta pràn kơ̆ dơn mờ kơnòl bal mờ nùs nhơm. Đơs bè bơta do, Đại tá ồng Đỗ Quang Thấm, Cíñ ủy Mpồl ling sền gàr tiah nhàr lơgar càr Dăk Lăk pà git: “Bol hi git nền do ờ mìng là kơnòl tềng đap mat, mờ gam là kơnòl jŏ jòng, đềt mềr mờ làng bol. Bol hi rơp pơn jat tai pơgồp bal mờ gơnoar atbồ ƀòn lơgar nàng làng bol gờñ lơh wơl broă lơh sa, gàr bè ờs wơl rài kis, đềt mềr mờ ƀòn lơgar, mờ tiah nhàr lơgar, bal mờ Mpồl ling sền gàr tiah nhàr lơgar sền gàr kơ̆ kơnhăp gơnoar tờm kơnhoàl ù tiah, lơngăp lơngai tiah nhàr lơgar”.

Nam pa gam rê tus tàm ală ơhò lòt lơh broă tàm dà lềng bồ nam, tàm ală rơkàng hìu pa lơh wơl tơnơ̆ dà tih dà lìu, mờ tàm ală gơl gùng lòt sok sền tiah nhàr lơgar. Tàm tiah nhàr lơgar hơ̆, nam pa ờ mìng mpờl gŏ tàm bơta niam bơkàu mai, bơkàu đào mờ gam tàm bơta pin dờn geh bơt bơtàu, tàm ală sap ñŏ iang nùs bơh làng bol dê tŭ sa tềp tus, nam pa rê. Mờ bơh ală bơta dềt rơhền mờng kwèn hơ̆, nam pa tiah nhàr lơgar càr Dăk Lăk dê gơ gơs wil tơl rlau – nam pa bơh kơnòl, bơh nùs nhơm ling klàng làng bol dê, kơnhăp kơ̆ bơta pin dờn tiah nhàr lơgar.