Dùl tàm ală broă lơh geh pơnrơn ngan tus mờ gùng dà broă lơh do là Mpồl lơh broă bal lơh sa suơn sre măi mok pa Xanh Cao Nguyên, sàh Cư̆ Mgar dê. Mpồl lơh broă bal do neh lơh geh cồng nha bơta kwơ plai màk kơl jăp tàm bă ù ơnàng rơlao 50 lồ, mờ di pơgăp 50 nă cau bal mờ git nđờ jơ̆t cau lơh broă tàm ƀòn. Broă lơh ndrờm bal ală gùng dà broă lơh sồ bè phan tuh dà lơh broă is, phan lơh broă par ờ geh cau măi ƀồm phơng, jòi anih tam điện tử mờ broă tam phan jăt broă lơh hữu kơ pơdar bal neh dong kờl tơrmù priă tă, tơnguh bơta niam mờ rề ơnàng drà kă bro phan. Tŭ do, phan geh lơh bơh plai màk mpồl lơh broă bal dê neh tus tàm uă drà kă bro bè lơgar Tây, Australia, Mỹ, Hàn Quốk, Canada mờ Lo.

Ồng Nguyễn Thanh Bình, Lam bồ Mpồl lơh broă bal Xanh Cao Nguyên pà git: “Cồng nha bơh broă ngui măi mok pa là tàm broă lơh sa gơmù bơnah cau lơh broă, broă lơh tờm tàm broă lơh sa mờ bơta dờng pràn. Tơl bă suơn bơh mpồl lơh broă bal dê ndrờm geh bơh 5 tus 10 lồ ù, den tàng lơh broă geh tơl bơta niam. Bơdìh hơ̆ tai, broă tơnhào, lơh ing, prăp gàr kung ƀuơn rơlao, dong kờl tơnguh uă khà geh bal mờ bơta phan phan geh lơh, di pal mờ ală jơnau kờñ tăc mờ lơgar bơdìh”.

Bơh tàm mùl màl ală broă lơh, ală cau jăk đơs là tam gơl sồ tàm broă lơh sa suơn sre mìng mùl màl geh cồng nha tŭ geh tơrbŏ bal nền nòn đah ală gùng dà broă lơh, kơlôi sơnơng mờ làng bol lơh broă sa. Jăt Tiến sìh Đặng Bá Đàn, Phó Kwang lam bồ Anih tờm Dong kờl Pơlam broă lơh sa suơn sre Dà lơgar tiah Tây Nguyên mờ Đah jum Tàm gùl lơgar đơs, tŭ do bơta tờm bơh broă tam gơl sồ tàm broă lơh sa suơn sre neh geh tơl, broă lơh kwơ màng là ai ală cồng nha kơlôi sơnơng bal mờ broă ngui tus mờ làng bol dê mhar rơlao, ƀuơn wă mờ ƀuơn lơh.

Tiến sìh Đặng Bá Đàn đơs nền: “Geh uă ngan gùng dà broă lơh bơh Đảng, dà lơgar dê kung bè càr dê tàm broă kơlôi sơnơng bơta chài mờ tam gơl sồ. Bơta tờm là pal geh pơgồp bal jơh nàng lơh geh bơta pràn tơrgùm bal, ai broă tam gơl sồ bơh cồng nha kơlôi sơnơng, bơh ală broă lơh tus mờ làng bol dê niam ngan. Bơh broă sih phơng, sơnka sền gàr phan tam tus mờ broă jòi gŏ tiah tam phan geh lơh, jơh ală bơta ndrờm ngui măi mok sồ nàng gàr ală jơnau tơngŏ di pal, gơdờp mờ jơnau kờñ lơgar Việt Nam mờ dunia dê”.

Ală tàm gơl pràn bơh tàm ƀòn lơgar gam pơgồp bal lơh geh bơnàng jă gơguh lơh sa ai gùt gah lơh sa suơn sre càr in. Nam 2025, priă geh bơh tàm broă lơh sa suơn sre, brê bơnơm, phan tàm dà càr Dăk Lăk dê geh di pơgăp 32 rơbô 800 tơmàn đong, gơguh rơlao 4,5% pơn drờm mờ tŭ do nam lài, pơn jăt tai ai tơngŏ gơnoar tờm bơh gah lơh sa càr dê. Nam 2026, gah lơh sa suơn sre lơh ngan lơh geh gơguh lơh sa 5,86% mờ tam gơl sồ geh sền là “bơta tờm: kwơ màng nàng lơh sa suơn sre ờ mìng gơguh lơh sa kơl jăp mờ gam lơh pràn kơl dang rơlao tàm tơngai pa.

Mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk pà git, gah do gam lơh jăt broă tam gơl sồ tàm gah lơh sa suơn sre mờ gùng dà broă lơh “lơh sồ jơh bơh tờm”, ai làng bol lơh broă sa suơn sre mờ mpồl lơh broă bal lơh tờm. “Anih duh broă làng bol càr neh jào ai gah do in tơngai bơh nam 2026 tus 2030 khà priă mờr 140 tơmàn đong nàng dong kờl lơh ală broă lơh bdè ngui bơta chài măi mok kung bè tam gơl sồ tàm jơh ală tiah tàm càr. Mờ kung jào ai geh do in 2 kơnòl broă tờm là: Lơh rùp ù tiah sồ lơh sa suơn sre mờ lơh phan jòi tiah tam loh làng, ndrờm bal mờ wèt tus jơnau kờñ bal mờ bơngă lơh sa càr Dăk Lăk dê tàm tơngai tus”.

Nam 2026, càr Dăk Lăk ai jơnau kờñ gơguh lơh sa bơh 10% rơlao hờ đang, lơh sa sồ rơ̆p pơgồp bal pơgăp 1 bơnah 3 bơta kwơ, tàm hơ̆ lơh sa suơn sre ngui măi mok pa là bơta tờm kwơ màng. Ală bơta tờm lơh sa, sră rùp ù tiah lơh sa suơn sre sồ, ngui bơta ngăc ngar kòn bơnus lơh gơs, jơnau yal tơngit dờng tàm broă atbồ mpồl ai phan mờ tơrbŏ bal kă bro gam geh lơh pràn lơh jăt bal.

Ồng Đỗ Hữu Huy, Phó Ƀí thư Tỉñ ủy càr Dăk Lăk đơs là: “Kờñ tơnguh uă bơta kwơ gơguh tàm broă lơh sa suơn sre den pal bơcri priă di pal ai broă ngui bơta chài măi mok in. Tam gơl broă lơh sa suơn sre tus mờ lơh sa sồ, ai broă lơh sa kă bro mŭt tàm drà kă bro điện tử, tăc phan tàm internet ờ mìng mhar rơlao mờ gam tơnguh bơta niam bal mờ bơta kwơ phan geh lơh. Do là gùng dà broă lơh pal geh nàng lơh sa suơn sre bơtàu tơnguh kơl jăp”.

Gơwèt mờ càr Dăk Lăk, tam gơl sồ tàm broă lơh sa suơn sre ờ mìng là gùng dà broă lơh tềng đăp măt nàng lơh mùl màl jơh jơnau kờñ gơguh lơh sa bàr sồ tàm nam pa Ơseh 2026, mờ gam là gùng dà broă lơh jŏ jòng nàng tơnguh uă priă geh, bơta niam kis ai làng bol lơh broă sa, bơ̆t bơtàu dùl gah lơh sa suơn sre pa, tơlir mờ tơrgùm bal. tàm pơn jăt nam pa, nùs nhơm chờ hờp hơ̆ gam geh bơh tàm ală bă suơn, mìr, sre làng bol kis tàm càr Dăk Lăk dê.