Ală ngai mờr Satềp nam pa nam Ơseh 2026, jăt bàr gah dà dờng Dà Ñim, làng bol tam biăp, kơnuh, plai chi tàm ală sàh D’ran, Ka Đô, Dơn Dương…càr Lâm Đồng kung gam lơh ngan lòt lơh broă. Mơya, ala mờ nùs nhơm chờ hờp tơnhào biăp drơng tàm drà kă bro Satềp bè ală nam lài, tŭ do, làng bol tàm do tơrgùm lơ-òr wơl ù, crăp wơl phan tuh dà mờ tam phan tam pa. Ồng Phạm Bích, tàm thôn Đường Mới, sàh D’ran pà git, mìu dà tih dà cò lồi nam 2025 neh lơh uă bă ù tam biăp jăt gah dà dờng Dà Ñim do gơtìp gơbồr ù, geh tiah gơtìp dà cò uă ngan. broă lơh geh wơl suơn tài bè hơ̆ den tàng roh uă ngan bơta pràn bal mờ priă tă lơh.

Tềng đăp măt, uă hìu làng bol rơwah gùng dà broă lơh niam wơl ù tus tàm tiah lơi den tam wơl tàm tiah hơ̆: “Geh cau den tam plai kơsu, rơpung, sơbê, blơn sut, mrĕ dờng. Bè tàm do den là ù nàng tam xà lăc. Tàm àng kơnhai 1 do hơ̆ sồng geh tơnhào. Tŭ do den ờ geh tơnhào tàm Satềp, ờ geh thàn geh”.

Tàm dơ̆ mìu dà tih dà cò lồi nam 2025, sàh D’ran là dùl tàm ală sàh gơtìp aniai uă ngan bơh tiah tam biăp Đơn Dương dê mờ mờr 300 lồ ù tam biăp gơtìp dà cò pơrdô jơh. Ồng Trương Quang Kiên, Phó Củ tịc Anih duh broă Làng bol sàh D’ran pà git, tàm broă brồ guh wơl lơh sa, gơnoar atbồ sàh neh lơh broă bal mờ làng bol, dong kờl làng bol bơsong bơta ờ tơl ù nàng dă, ù mƀùr nàng lơh wơl suơn. Mờ sàh kung dan geh ală broă dong kờl nàng làng bol gờñ tơrbŏ wơl lơh sa: “Kấp ủy Đảng, gơnoar atbồ neh hòi jà mờ lơh broă mờ ală mpồl lơh broă anih priă jền ai tơl bơta niam nàng làng bol in càn priă mờ sa priă cồng ờ uă nàng brồ guh wơl lơh sa tơnơ̆ mờ dà tih dà cò. Kấp ủy, gơnoar atbồ sàh neh lam làng bol lơh wơl ù tiah tam phan nàng tam ală bơta phan di jăt mờ kàl lơh sa, ală bơta biăp ờ jŏ tơngai nàng geh priă. Tus tŭ do broă bơsong tơnơ̆ mờ rềs àr bơh trồ tiah tàm bă ù lơh sa rơlao 70%”.

Bŭ lah Satềp do, uă hìu tam biăp tàm tiah tam biăp tờm ngan Đơn Dương dê ờ geh phan nàng tăc tàm drà, mơya tàm ală bă suơn neh geh tŭ gơtìp ù lŭ bồr, ală bơta tơlir niam bơh biăp neh sơn đờm gŏ wơl. Do là bơta tơngŏ bơh broă kis wơl, pờ geh nùs nhơm kơ̆p gơn bè ală kàl lơh sa pa mờ nùs nhơm chờ hờp rơ̆p gờñ tus wơl mờ làng bol lơh broă sa tàm tiah tam biăp tờm càr Lâm Đồng dê.