Bal mờ ală bơta ƀươn bè anih ù tiah, trồ tiah, nhơm trồ tiah, phan kwơ geh is brê bơnơm rơ̆ ru, li la, Tây Nguyên neh bơtàu tơngguh gơgơs tiah lơh gơlik phan kă bro bơh broă lơh sa sươn sre dờng ngan rlau jơh bơh gùt lơgar dê. Kơphê gơgơs là chi tam jŏ nam tờm ngan bơh Tây Nguyên dê bal mờ mờr 668 rbô lồ. Do kung là tiah tam kau su dờng dơ̆ 2 tơnơ̆ tiah đah jum măt tơngai lik dà lơgar dê bal mờ rlau 250 rbô lồ. Bal mờ hơ̆, kơnhoàl ù tiah Tây Nguyên geh rlau 4 tơlak nơm phan puan jơng, 30 tơlak nơm phan bàr nơm jơng…

Pơrjum neh ai tơlik ală broă lơh bơsong nàng lơh geh cồng nha ală bơta pràn, bơta ƀươn bè bơtàu tơngguh broă lơh sa sươn sre bơh kơnhoàl ù tiah Tây Nguyên dê. Tàm hơ̆, tơrgùm tàm ală broă lơh bơsong nàng kờñ tă bơsong ală gơkòl, bơta gơ kơryan nàng lơh pràn hòi jà bơcri priă tàm gah broă lơh sa sươn sre, pờ tơlik pơlam gùng bơtàu tơngguh broă lơh sa sươn sre ai ală càr tiah Tây Nguyên in tàm bơta pa, tŭ tơngai pa.