Dơ̆ lơh ală broă lơh tàm hìu bơsram ơm sa bic tơn bàr kấp tàm sàh tiah nhàr lơgar Ea Súp, càr Dăk Lăk di gơlan lơyài mờ tơngai geh ai lài tài kal ke bơh trồ tiah tàm kàl mìu. Mơya, mờ “jơnau sồr bơh plai nùs” cau ling ală mpồl ling klàng tàm càr Dăk Lăk neh gŏ măt di tŭ, gam ngai sơlơ sơrlèt mờ trồ tiah ờ niam dong kờl cau lơh “dong kờl” tơngai lơh broă, nàng gàr niam ală broă lơh geh lơh gơs di mờ tơngai neh geh ai.

Ồng Nguyễn Ngọc Quý, Phó Kwang Lam bồ dờng Công ty CP Bơ̆t bơtàu Dăk Lăk, do là mpồl lơh sa kă bro dờp lơh 2 nơm hìu bơsram tiah nhàr lơgar mờ kờñ geh tus 450 nă cau lơh broă. Ồng Quý mblàng là, bơh tŭ dờp lơh hìu bơsram, mpồl lơh broă do mìng rơwah geh di pơgăp 300 nă cau lơh. Khà gam tai ờ tơl 30 nă cau git lơh broă, 20 nă cau măi rơndeh pơn diang, măi chŏ mờ di pơgăp 100 nă cau lơh broă jơng tê. “Công ty ờ tơl di pơgăp 150 nă cau lơh broă tàm anih lơh broă. Tŭ do, jăt priă tàm drà kă bro, cau dờp lơh hìu bơsram pal ơpah cau lơh broă mờ khà priă geh bơh 600 tus 700 rơbô đong tàm 1 ngai 1 nă, mơya kung gam ờ jòi geh cau lơh wơl, ờ tơl cau lơh broă nàng lơh. Di dơ̆ do, ală rơndăp broă lơh tàm càr Dăk Lăk lơh uă, tàm tŭ mpồl cau lơh broă ngai sơlơ ờ gal”.

Tàm 3 càr là Gia Lai, Dăk Lăk, Lâm Đồng geh 15 hìu bơsram bàr kấp ơm sa bic tơn tiah nhàr lơgar gam lơh hìu bơsram, jơnau kờñ cau lơh broă nàng gàr di mờ tơngai geh ai tàm pơgăp 2 rơbô 200 nă, geh cau lơh broă chài, cau git măi, cau chài mờ cau lơh broă bè ờs. Do ờ hềt di là khà uă, mơya neh sơrlèt uă ir mờ jơnau geh bơh ală cau dờp lơh hìu bơsram dê. Bơta do ai geh bơta kal ke tus mờ jơnau kờñ gơguh lơh sa 2 sồ bơh ală càr dê, tŭ càr lơi kung gam rơcang mŭt lơh ală rơndăp broă lơh dờng git nđờ rơbô tơmàn đong.

Cục Gùng ù gờl Việt Nam yal, tus bồ nhai 7, Rơndăp broă lơh bơnah broă sồ 2 tàm Rơndăp broă lơh gùng rơndeh lòt mhar Khánh Hoà – Buôn Ma Thuột mìng rơ̆p lơh gơs rơlao 70,6% bơta kwơ lơh broă. tơnơ̆ mờ rơlao dùl nhai bơh dơ̆ lòt sền ngai 22 nhai 5 nam 2026, khà geh lơh mìng gơguh tai 3,62%, ndrờm mờ di pơgăp 307 tơmàn đong. Ồng Dương Văn Đắc, Đơng lam dùl anih lơh broă tàm do pà git, ờ tơl cau lơh broă là dùl tàm ală bơta tờm bơh bơta gơtìp lơyài do. “Cau lơh broă tŭ do mùl màl ờ hoan geh ngai, kal ke tàm broă ơpah. Cau lơh broă bè ờs tàm do tŭ do ờ gơtùi ơpah. Tŭ do, tŭ ờ tơl cau lơh broă, công ty pal ntrờn cau bơh tàm ală tiah lơh broă ndai bè bơh càr Nghệ An ha là ală càr ndai nàng tus lơh broă. Ală cau lơh broă geh bơta jăk chài uă kung bè hơ̆ sơl, pal ntrờm đah ală tiah lơh broă bal tàm công ty”.

6 nhai bồ nam 2026, gơguh lơh sa tàm càr Dăk Lăk, Gia Lai, Lâm Đồng, Khánh Hoà… ndrờm ờ geh jăt mờ jơnau neh geh ai. Geh bơta do lài ngan jăt jơnau yal bơh ală càr dê là lơyài tàm broă tơm ntrờn ù tiah, lơh ală rơndăp broă lơh ờ hềt gơtùi lơh broă. Mơya, sền bơh mpồl cau lơh broă, geh bal tŭ bơsong gơkòl bè ù tiah, ală càr kung kal ke kờñ tơl cau lơh broă nàng lơh ală rơndăp broă. Bơta do rơ̆p sơlơ gơrềng tus mờ ală rơndăp broă lơh mŭt lơh broă.

Mò Trương Thị Trí, Lam bồ cơl dŭ Đơng lam lơh jăt Công ty TNHH WGR Industries càr Gia Lai pà git, mờ priă bơcri lơgar bơdìh (FDI) rơlao 1 rơbô 500 tơmàn đong, mpồl lơh sa kă bro gam kờñ rơlao 1 rơbô 100 nă cau lơh broă. Mơya, bŭ lah neh ngui uă ngan broă dong kờl nàng hòi jà cau lơh broă tus, mơya kung mìng rơ̆p rơwah geh 800 nă cau: “Gùt dar hìu măi, tàm bơta ngài 70 kơi sồ, công ty neh lơh ală dơ̆ rơwah cau lơh broă mờ tŭ do neh jơh cau lơh broă. Tŭ do, công ty gam lơh ală broă dong kờl nàng rơwah tàm dơlam is bơh oh mi gam lơh broă tàm do geh cau pròc mhàm, cau kwèng bơh ală càr đah Tô mờ đah Jum. Bơdìh hơ̆ tai, công ty kung lơh pràn broă rơwah cau lơh broă tàm internet mpồl bơtiàn bè Zalo, Facebook mờ geh bal TikTok tai”.

Ờ tơl cau lơh broă ờ mìng gơtìp tàm tiah lơh sa mờ măi mok, bơ̆t bơtàu kờñ geh bơta ngăc ngar krơi is. Bơh tàm ală tiah tam phan jŏ tơngai tơrgùm uă, là bơta mờng geh bơh ală càr tàm Tây Nguyên dê, bơta ờ tơl cau lơh broă kung ngai sơlơ gŏ loh làng ngan. Ồng Trần Văn Muôn tàm thôn 1, sàh Sơn Hoà, càr Dăk Lăk pà git, bŭ lah priă ơpah lơh broă ngai sơlơ gơguh uă, mơya nam do cau tam tào kung gam kal ke ngan kờñ ơpah geh cau nàng sreh tào: “Priă sreh tào bè ờs añ gam pal ơpah là 1 rơbô 500 đong tàm 1 căp, gam tào gơtìp ồs sa cau pal ơpah bơh 2 rơbô tus 2 rơbô 500 đong tàm 1 căp. Dùl căp bè ờs mìng geh bơh 10 tus 12 nrang tào. Di lah pơn drờm mờ nam lài den priă ơpah kas rơlao 20%, mờ đơs bal kung kal ke nàng ơpah geh cau”.

Tây Nguyên tŭ do geh di pơgăp 655 rơbô lồ ù tam kơphe, 102 rơbô lồ ù tam tiêu mờ 105 rơbô lồ ù tam tờm sầu riêng, 120 rơbô lồ ù tam tào…, ală càr tàm tiah do kờñ tus git ndờ jơ̆t tơlăk ngai lơh broă, ndrờm mờ rơlao 500 rơbô nă cau lơh broă tàm jơh kàl tơnhào. Tàm tŭ hơ̆, cau tàm tiah do tơn mìng di pal geh di pơgăp 2 bơnah 3.

Ồng Nguyễn Phú Lập, Phó Chủ tịch Ală mpồl ala măt Cau lơh broă càr Dăk Lăk đơs là, ală nam lài, khà cau lơh broă ờ tơl tàm ală kàl tơnhào geh bơtơl bơh alăb càr đah Tô mờ tiah tàm Gùl lơgar dê. Mơya, làng bol ngai sơlơ ờ bài mờ priă geh jăt kàl lơh sa, den tàng neh ntrờn tus mờ ală tiah geh broă lơh sa dờng là Ƀòn dờng Hồ Chí Minh mờ ală càr đah Jum măt tơngai lik dà lơgar dê nàng geh priă kơl jăp rơlao: “Kàl pic plai kơphe mìng geh tàm 60 ngai, mờ bơta pràn geh bơh 450 tus 500 rơbô đong tàm 1 ngai, kờp jơh priă lơh geh bơh cau lơh broă dê mìng geh di pơgăp bơh 28 tus 30 tơlăk đong tàm 1 kàl tơnhào. Khà priă geh dờp do kung mìng ndrờm mờ priă nhai ală cau do lơh broă tàm ală tiah lơh sa mờ măi mok tàm 2 nhai. Pic plai kơphe neh glar bòl rơlao, mờ mìng geh tàm tơngai ờ jŏ, den tàng cau lơh broă rơwah tus mŭt lơh broă tàm ală tiah lơh sa mờ măi mok là ƀuơn wă ngan. Càr Dăk Lăk den tiah, mpồl lơh sa kă bro broă lơh ờ hềt geh uă, mờ priă geh kung ờ uă bè ală càr, ƀòn dờng đah Jum dà lơgar dê”.

Ală bă suơn tam tào ìs gời lơh ñòp jơh tài ờ geh cau sreh, broă lơh gùng rơndeh lòt mhar pal “bơtơl ing” cau chài bơh tàm tiah tàm Gùl ha là bơh tiah đah Tô dà lơgar tus, ală broă lơh tàm hìu măi ờ hềt gơtùi lơh broă mờ broă gơkòl tơngai lơh broă tàm ală hìu bơsram ơm sa bic tơn bàr kấp tiah nhàr lơgar gam geh làng bol kơ̆p gơn sùm. Jơh ală pà gŏ: ờ tơl cau lơh broă tàm ală càr tiah Tây Nguyên neh tus tàm bơta uă ngan. “Jơnau kờñ” do ờ mìng bơh is kàl tơnhào ha là ală cau dờp lơh mờ bơta di gơlan lơh gơkòl jŏ jòng, pơhìn tơn tus mờ jơnau kờñ gơguh lơh sa tàm nam 2026 bal mờ tơngai lơh pràn mờr tus bơh tiah do dê!