Ală ngai do, tàm uă bă sre lơh kòi tàm sàh Tuy An Đông, sàh Hoà Thịnh, sơnah ƀòn Phú Yên, tềl tơngŏ bơh dà tih dà cò kung gam gŏ ngan: ù bồr, siồ siă gơtìp tơrgùm lơh kòl tàm rơbòng dà, uă gơl rơbòng dà gơtìp tơrlah. Jơnau kơlôi rơcang ngan rơlao là rơbòng pơlam dà ờ hềt gơtùi ngui, tàm tŭ tơngai sih kòi neh jơla pơn drờm mờ tơngai bơh kàl lơh sa dê.

Mò Trần Thị Rạn, cau ơm kis tàm sơnah ƀòn Phú Yên pà git, jăt mờ tơngai kàl lơh sa geh ai, broă sih kòi neh jơla rơlao mờ ală nam lài, mơya tài dà tih dà cò neh lơh pơrdô jơh ha là lơh tơrlah jơh ală phan lơh broă bơh làng bol lơh broă sa dê, den tàng ală làng bol ờ git pal sơn đờm kàl lơh sa pa mờ broă lơh bè lơi. “Nam do tài dơ̆ do di lah lơh den kung ờ geh sơntìl nàng lơh sơl, gơbam dà jơh bloh, kòi kung gơbam jơh, phe kung gơbam dà sơl, phan lơi kung gơbam dà lơm jơh. Tŭ do mìng kơnờm Dà lơgar dong kờl geh sơntìl nàng lơh mơ”.

Ờ mìng ờ tơl sơntìl kòi, uă tiah tàm tiah lơh sre Tuy Hoà, bă sre gam gơtìp tàm bơta “ờ geh dà” tơn tơnơ̆ mờ kàl gơbam dà. Ồng Nguyễn Văn Khoa, ơm tàm thôn 4, sàh Tuy An Đông pà git, bơtơ̆t Tam Giang, do là bơtơ̆t dơng dà tờm ngan ai tiah lơh sre tàm do in neh gơtìp tơrlah, lơh broă lơh sa ờ gơtùi lơh tai. “Broă lơh sa tŭ do là bơtơ̆t Tam Giang neh gơtìp tơrlah, đơs ngan làng bol ờ gơtùi lơh sre tai tài ờ geh dà. Gùt sàh geh tus mờr 1 rơbô lồ ù lơh sa gơtìp aniai; rơbòng dà kung rơ kơnrañ jơh tài ờ geh dà tus. Làng bol kờñ ngan gờñ geh lơh niam wơl bơtơ̆t dơng dà nàng gơtùi lơh sa. Di lah ờ lơh bơtơ̆t den rơ̆p ờ gơtùi lơh sre”.

Dơ̆ mìu càl dờng sồ 13 pơgồp bal mờ dà tih dà cò lồi nhai 11 neh lơh aniai uă ngan tus mờ broă lơh bơtơ̆t rơbòng dà tàm tiah đah măt tơngai lik càr Dăk Lăk dê. Jăt ồng Nguyễn Văn Chiến, Phó Kwang lam bồ Kông ty TNHH MTV Thủy nông Đồng Cam pà git, jơh ală phan lơh broă tàm Đồng Cam mờ bơtơ̆t Tam Giang ndrờm gơtìp aniai jơh, gơrềng tơn tus mờ di pơgăp 19 rơbô lồ ù lơh sre tàm tiah đah măt tơngai lik càr dê.

Tềng đăp mờ bơta do, Kông ty neh hòi jà uă ngan cau lơh broă, pơgồp bal mờ kông ty nàng mhar lơh niam wơl ală khà broă neh gơtìp ờ niam tàm gùt tiah. “Tus tŭ do, jơh ală bơta ndrờm gơtìp tơrlah jơh, neh dơ̆ lĕ bal lơh wơl. Kông ty kung bè Mpồl Atbồ bơcri priă đah măt tơngai Lik càr dê neh hòi jà uă ngan bơta pràn, ală mpồl lơh broă tus nàng lơh niam wơl rơbòng dà ală bơta gơwèt kông ty atbồ, gờñ lơh gơs, gàr niam broă ai dà drơng tàm broă lơh sa lài mờ ngai 31 nhai 12”.

Gơnoar atbồ ală tiah tàm càr Dăk Lăk kung gam lơh ngan “tàm pơrlòng mờ kàl lơh sa”. Tàm tŭ ală sàh gam bal mờ làng bol kờp bơta hoàc huơr, bơyai lơh wàs ală tiah gơtìp tơrlah, dà bồr den ală mpồl lơh broă gơwèt Sờh Broă lơh sa suơn sre mờ Tiah ơm kis gam tơrgùm bơsong ală broă lơh bơtơ̆t rơbòng dà gơtìp tơrlah.

Gam bè sơntìl kòi, mò Đặng Thị Thủy, Phó Kwang lam bồ Sờh Broă lơh sa suơn sre mờ Tiah ơm kis càr Dăk Lăk pà git: “Khà sơntìl kòi nàng sih tam tàm kàl Prang ai làng bol in tŭ do geh tơl bơh khà sơntìl prăp gàr bơh dà lơgar dê, bơh ală broă dong kờl bơh Dà lơgar bal mờ khà tă pơgồp bal bơh ală mpồl lơh sa kă bro, cau geh nùs nhơm niam. Den tàng, làng bol bañ kơlôi rơcang tàm broă ờ tơl sơntìl nàng lơh sa”.

Gơtùi gŏ, tơnơ̆ mờ dà tih dà cò, bơta kal ke dờng ngan bơh tiah lơh sre Tuy Hoà, càr Dăk Lăk dê ờ mìng hoàc huơr tàm ƀlàng sre, mờ gam gơrềng nền nòn tàm tơngai lơh niam wơl bơtơ̆t rơbòng dà bal mờ broă ai sơntìl kòi. Bơta mờ làng bol kơ̆p kờñ sùm tŭ do là dà gờñ tus tàm rơbòng dà, sơntìl di thàn tàm broă sih, nàng tiah lơh sre kòi Tuy Hoà, càr Dăk Lăk geh hòn tơlir niam tơnơ̆ mờ ală ngai rềs àr bơh trồ tiah lơh aniai.