VOV4.K’ho- Nhai 11 nam 2020, đơs tàm Quốc hội, ồng Nguyễn Xuân Phúc Thủ tướng Chính phủ sồr tam 1 tơmàn tờm chi tơlir tàm 5 nam, bơh nam 2021- 2025. Ngai 31/12/2020, Thủ tướng kĭ ai ngui Chỉ thị sồ 45 bè lam lơh srơh “Sa tềp tam chi” mờ tơnguh tai broă lơh sền gàr, bơtàu tơnguh brê bơh bồ nam 2021 tơn. Bal mờ gùt lơgar, ală càr tàm tiah Tây Nguyên kung gam jơh nùs lơh jăt Broă lơh tam 1 tơmàn tờm chi tơlir- Tài bơh dùl Việt Nam tơlir.

Pa do, tàm ƀòn dờng Gia Nghĩa, Ủy ban Nhân dân càr Dăk Nông neh bơyai lơh Dơ̆ lơh jăt Broă lơh tam 1 tơmàn tờm chi tơlir. Bal mờ tơngume “Tài dùl Việt Nam tơlir”, broă lơh neh gơhòi gơ jà rlau 200 nă kuang bàng, cau lơh phan, cau lơh broă, đoàn viên, ơruh pơnu mờ làng bol tàm ƀòn dờng Gia Nghĩa tus bal lơh jăt. Tơnơ̆ dơ̆ lam lơh, rlau 300 tờm chi sao jù neh geh jơh tơl nă cau tàm sơmbăt tê bal tam tàm ală gơl gùng gơwèt tiah ntrờn ơm kis pa Dăk Nur B, sơnah ƀòn Nghĩa Trung, ƀòn dờng Gia Nghĩa. Ồng Lê Trọng Yên, Phó Chủ tịch Ủy ban Nhân dân càr Dăk Nông pà gĭt, broă lơh tam chi tơlir bơh càr dê geh pơn jăt tai geh lơh pràn, gơhòi gơ jà uă mpồl cau tàm mpồl bơtiàn tus lơh bal. Ồng Lê Trọng Yên, đơs: Càr geh lơh ală gùng dà broă lơh nàng dong kờl tam chi rah rài, tam chi lơh broă sa sươn sre brê bơnơm pơgồp bal, dơ̆ pe là tam brê tơrgùm bal, dơ̆ puan là bơtàu tơnguh pràn bè tam brê lơh sa. Ală tờm chi geh sền là tờm chi geh uă bơta kuơ, gơ là tờm chi brê mơkung là tờm chi lơh broă sa sươn sre sơl, pơnyơu bè kau su, điều, tờm macca, ală tờm chi pa yal do bol añ geh tam tàm ală bă ù geh trồ tiah gơdờp. Càr Dăk Nông lơh ngan tus nam 2025 geh tơnguh bă ù geh chi che bơh càr dê gơguh tus rlau 40%.

Ơruh pơnu Dăk Nông jơh nùs tam chi

Lồi nhai 3 pa do, càr Gia Lai kung neh bơyai lơh dơ̆ lam lơh tam chi “Tài dùl Việt Nam tơlir” tàm xã Biển Hồ, ƀòn dờng Pleiku. Tàm do, ồng Võ Ngọc Thành, Chủ tịch Ủy ban Nhân dân càr Gia Lai pà gĭt, càr wèt tus kơnau kờñ bơ̆t bơtàu càr gơ gơs “Tiah kơh bơnơm tơlir tài pràn kơldang să jañ”; tam chi, tam brê ờ mìng là broă tiah ơm kis, mờ gam gơrềng tus bơtàu tơnguh lơh sa- mpồl bơtiàn, niam chài mờ nhơl chờ tai. Tàm 5 nam do, càr neh tam 20 rbô lồ brê mờ tờm chi rah rài. Kơrnoat Pơrjum dờng cau ala măt Đảng bộ càr Gia Lai dơ̆ XVI, tơngai lơh broă bơh nam 2021- 2025 kung geh jơnau kờñ tam pa 40 rbô lồ brê, tơnguh jơh khà chi che geh tàm brê bơh càr dê gơguh tus 47,75% tàm 5 nam tus. Tus bal dơ̆ bơyai lơh tam chi drim ngai hơ̆, ồng Lưu Trung Nghĩa Kuang ătbồ Sở Nông nghiệp mờ Phát triển Nông thôn càr Gia Lai pà gĭt: Sở Nông nghiệp mờ Phát triển Nông thôn geh cribơyai mờ Ủy ban Nhân dân càr sồr ală kơnhoàl, thị xã, ƀòn dờng bơyai lơh dơ̆ tam chi; rơndăp ù tiah tam chi jăt rơndăp ù tiah, kuơmàng ờ huan geh, geh bơta kuơ bè ù tiah chi che phan bơna ƀòn lơgar, bè tiah ơm kis mờ sền gen nàng bơtờp sơntìl gen.

Làng bol Gia Lai lơh jăt dơ̆ tam chi

Tàm dơ̆ lam lơh tam chi “Tài dùl Việt Nam tơlir” tàm ƀòn dờng Pleiku, kuang đơng lam bồ Ngân hàng Nông nghiệp mờ Phát triển Nông thôn Việt Nam neh jàu 5 tơmàn đong dong kờl kes priă sền gàr tơl niam rài kis mpồl bơtiàn bơh càr dê in mờ 1 tơmàn đong lơh priă nàng tam chi. Ai tàm càr Dăk Lăk, lơh jăt srơh tam chi, lơh gơlik brê, lơh broă tài tiah ơm kis, Đoàn viên ơruh pơnu Ngân hàng Nông nghiệp mờ Phát triển Nông thôn càr Dăk Lăk neh bơyai lơh tam rlau 300 tờm sao jù tàm Sươn nhơl ƀòn dờng Buôn Ma Thuột. Do kung là broă lơh gơ ơm tàm broă rơndăp lơh tam 1 rbô tờm chi tơlir tàm ală sươn nhơl, gùng drà, sơnĕ gùng lòt rê, tiah ƀòn brê bơnơm, brê rơcăng gàr bồ tô dà bơh Ngân hàng Nông nghiệp mờ Phát triển Nông thôn càr Dăk Lăk dê.

Ồng Phan Thông Thái, Kuang ătbồ Công đoàn, Phó Kuang ătbồ Ngân hàng Nông nghiệp mờ Phát triển Nông thôn càr Dăk Lăk pà gĭt: Bol añ geh broă lơh tam 1 rbô tờm chi, tàm hơ̆ bol añ tam pà tus 19 công đoàn kơnă hơđơm, công đoàn gơwèt bal nàng tam tàm 8 kơnhoàl mờ ƀòn dờng. Mờ khà mờr 200 rbô nă năc càn priă den bol añ gơn kơnờm mblàng yal ai pơgăp 20% den là neh niam ngan rao. Tài bơh hơ̆, den khi mblàng yal wơl sơlơ uă rlau tai, khi geh mblàng yal ai hìu bơnhă, ai oh kòn, jơi nòi, khà ca geh kơno yal là uă ngan.

Đơs tàm dơ̆ bơyai lơh “Sa tềp tam chi bồ nam pa Tân Sửu 2021 pa do tàm càr Phú Yên, ồng Nguyễn Xuân Phúc Thủ tướng Chính phủ pà gĭt, bal mờ ală broă lơh broă bơh gah lơh broă sa sươn sre mờ ală tiah dê tàm broă lơh ngan prăp gàr mờ tơnguh uă khà chi che geh tàm brê, jơnau sồr tam 1 tơmàn tờm chi tơlir geh ờ gŏ di mìng pơgồp bơnah glòm tơlir ù tiah lời gời, bơnơm ờ geh chi che, mờ gam geh lơh tơlir niam tiah drà mờ tiah ƀòn lơgar Việt Nam dê. Ồng Nguyễn Xuân Phúc Thủ tướng Chính phủ đơs: Do là broă lơh geh kuơ ngan gĭt lơh bè jơnau Bác Hồ bol he dê neh geh tŭ yal loh, broă do ờ hoan roh uă priă jền mơya bơta kuơ den uă pơgồp bơnah kuơmàng tàm broă lơh niam wơl rài kis làng bol dê mờ bol he kah wơl tai tàm bơta bòl glar ờ ru ngan bơh broă lơh dê tàm rài tam lơh gơ lòt jăt bal mờ bơ̆t bơtàu dà lơgar mơya să tờm Bác Hồ bol he dê là cau bơh sơnrờp lam lơh sa tềp tam chi tam ngai 28/11/1959 tài dùl Việt Nam tơlir niam rlau sàng goh niam bơnĕ rlau halà dùl Việt Nam tơlir là jơnau đơs tờm bơh Broă lơh 1 tơmàn tờm chi tơlir dê”.

Thủ tướng tus bal Dơ̆ lơh jăt Broă lơh tam 1 tơmàn tờm chi tơlir tàm Nghệ An

Tàm lồi nhai 3 pa do, tàm Tiah tềl lời wơl kah yau Ơruh pơnu lam lài Truông Bồn, xã Mỹ Sơn, kơnhoàl Đô Lương, càr Nghệ An, ồng Nguyễn Xuân Phúc Thủ tướng Chính phủ pơn jăt tai tus bal Dơ̆ lơh jăt Broă lơh tam 1 tơmàn tờm chi tơlir- Tài dùl Việt Nam tơlir. Đơs sùm, bơta tơlir là bơta bơh bơta pas gơs, bơta bơh kis gơs rơ̆ rài bơtàu tơnguh kơ̆ kơl jăp jŏ jòng dê ngan den tàng bè hơ̆, Thủ tướng hòi jà ală mpồl cau, cau dùl nă să pơn jăt tai dong kờl, dùl nùs bal mờ ală tiah, ală anih lơh broă nàng lơh gơrề, tơnguh srơh sa tềp tam chi, glòm tơlir ù tiah lời gời, dòr bơnơm ờ geh chi che tàm gùt lơgar.

            Quốc Học tơrgùm cih- Cau mblàng Lơ Mu K’Yến