VOV4.K’ho- Tàm dơ̆ gơtìp kòp Covid-19 dơ̆ 4 do, càr Dăk Lăk gŏ rơlao 1 rơbô 300 nă cau kòp Covid-19, là càr geh khà cau gơtìp kòp uă ngan tàm Tây Nguyên. Khà cau gơtìp kòp gơguh mhar ngan, lơh kal ke tus mờ gah lơh sơnơm ngai sơlơ uă, den tàng tơl nă cau lơh sơnơm, y, bác sĩ pal kong mờ uă bơta kal ke krơi is. Mơya tàm broă lơh lơi, ală cau do gam lơh ngan ai jơh bơta pràn nàng pơrlòng mờ tơngai pơgồp bal tàm broă kơrian kòp gơtờp. Uă cau neh pal sơbì jơh broă is hìu nhă nàng lơh gơs kơnòl să tờm.

Tàm tiah tam cah is tơrgùm bal Hìu bơto bơtê sền gàr bơta lơngăp lơngai dà lơgar gơwèt hìu bơsram Đại học Tây Nguyên, geh dùl nơm jơnang duh khoai pal geh lơh den tàng geh ai lŏ Trần Thị Hương (deh nam 1983) là cau điều dưỡng lơh broă tàm hìu sơnơm Y học cổ truyền Dăk Lăk gam lơh kơnòl tàm do duh khoai cau bèp gơtìp chơ̆t tàm ngai 01 nhai 9.

           Bơh tàm tiah tam cah is tơrgùm bal, lŏ Trần Thị Hương chu ñàng duh khoai bèp neh gơtìp chơ̆t

Dà măt gơhòr uă tŭ lŏ mìng gơtùi duh khoai huềng soàn bèp bơh ngài; Rùp ies hờ ƀòn lơgar tờm càr Nam Định mìng geh gŏ bơh dơ̆ hòi mờ zalo tàm điện thoại. Lŏ Hương kơ̆p kờñ là, kòp Covid-19 gờñ geh kơrian nàng lŏ gơtùi rê hờ ƀòn lơgar tờm nàng chu ñàng ƀồc bèp in: “Kàl rơlô bơkang pa do añ mòng lah cèng oh kòn rê nàng chờ mờ mò ồng, tài mò, ồng neh dờng sơnam bloh, mơya tài kòp gơtờp den tàng ờ gơtùi rê, tŭ do ồng gơtìp chơ̆t ni sơna tai den tàng dơ̆ pơrgon ờ gơtùi lơh jăt. Kơ̆p kờñ là ală cau geh tus bal tam dră nàng kơrian mờ kòp gơtờp nàng añ gơtùi rê hờ ƀòn lơgar tờm chu ñàng bèp in”.

           Lŏ Nguyễn Thị Kim Tuyền gam ai mẫu xét nghiệm mhar ală cau F1 bơh kơnhoàl Krông Ana in

15 nam lơh broă tàm Khoa Xét nghiệm-Kham kòp bơh rùp-Gròi sền gơnoar pràn bơh Anih tờm gròi sền kòp tê jê să càr Dăk Lăk, lŏ Nguyễn Thị Kim Tuyền neh pal gơtìp mờ uă bơta kòp tàm să jan. Mơya pal tus tàm tŭ cau tàm mpồl jòi cau tìp rềp sồ 3, là mpồl cau tờm lam lài tàm broă tam dră mờ kòp Covid-19 hơ̆ sồng lŏ wă jơh ală broă lơh gơtìp glar bòl, ngòt rơngơ̆t mờ pal phi să tŭ lơh broă tai.

Lŏ Tuyền pà git, rơlao 3 nhai do, tŭ kòp Covid-19 tàm càr Dăk Lăk gơtìp kal ke, bŭ lah àng drim gờñ ha là trồ mang, tŭ tàm tiah lơi geh cau gơtìp kòp là mpồl lơh broă bơh lŏ dê tus nàng jòi. Bŭ lah pal lơh broă sùm tàm trồ ngai, trồ mang bal mờ phan soh ndơ̆p să, mơya git broă ai mẫu xét nghiệm geh kuơ màng ngan tus mờ broă tam dră mờ kòp, den tàng ală lŏ pal lơh ngan pah tŭ jơ nàng lơh gơs kơnòl mhar ngan. Rài kis să tờm, kơnòl lơh pơ-ùr, lơh mè pal lời ing hờ tơnơ̆: “Tơngai den ni sơna, geh tŭ àng drim, geh tŭ lơh broă tus nggùl bơnang. Tŭ lơi lơh gơs broă hơ̆ sồng geh sào, geh tŭ bơh 1 tus 2 jơ àng hơ̆ sồng sào, sào ing lơm. Ƀùi drim ngai tơnơ̆ kung ờ geh tơngai trŭ sa lơi, den tàng pal sa ƀan mì ha là hùc 1 khàr dà. Tŭ do den neh geh zalo, he hòi, he gŏ rùp kòn, di lah ờ, ờ git bè lơi. Kờñ sền gàr kòn mờ bơklao den he pal lơh bè hơ̆, tài broă lơh tai”.

Ală y, bác sĩ tàm tiah sơm kòp cau kòp Covid-19 gơtìp jroă gam lơh ngan nàng dong klàs geh bơta kis cau kòp in

Bơh ngai 15 nhai 8, tŭ Khoa Truyền nhiễm hìu sơnơm Tiah Tây Nguyên geh tam gơl gơs tiah sơm kòp cau kòp Covid-19 gơtìp jroă tiah Tây Nguyên in, geh 21 nă cau, tàm hơ̆ geh cau lơh sơnơm, bác sĩ, điều dưỡng, hộ lý mờ kỹ thuật viên neh pal lơh broă uă rơlao dơ̆ nàng dong kờl ală cau kòp geh klàs mờ bơta chơ̆t.

Bác sĩ chuyên khoa II Trịnh Hồng Nhựt, kuang atbồ Khoa hồi sức tích cực sơndră mờ khih, drơng broă lơh tàm tiah sơm kòp cau kòp Covid-19 jroă tàm Hìu sơnơm Tiah Tây Nguyên pà git ală cau kòp geh cèng tus tàm do ndrờm geh bơta kòp lài mờ broă di gơlan gơtìp chơ̆t là uă ngan. Bơta kis mờ bơta chơ̆t mùl màl rềp ngan, ală y bác sĩ bơh tiah sơm kòp Covid-19 jroă sùm lơh ngan pah tŭ jơ, nàng lơh ngan jai pha tàm dơ̆ tam dră do: “Bol añ jòi tơl bơta geh bal màng kis să jan phan bơna, geh bal bơta ngăc ngar tàm broă lơh, geh bal nùs nhơm niam bơh cau lơh sơnơm nàng tam dră tơl tŭ mờ tơl jơ gàr màng kis cau kòp tềng đăp mờ bơta chơ̆t jê”.

Dơ̆ tam dră wơl mờ kòp Covid-19 gam jŏ mờ gam uă kal ke, ală cau ling tàm tiah sơnrờp tam dră mờ kòp càr Dăk Lăk gam sùm pal lơh ngan ai bồ tơngoh ngăc ngar, nùs nhơm kơ̆ dơn pràn kơl dang, ngai kung bè mang jòi cau neh tìp rềp, sền gàr màng kis cau kòp bal mờ làng bol. Ală cau do là ală cau khin cha jăk chài tàm tiah tam dră ờ geh săp gar phào bơrtoh.

Cau cih Nam Trang-Cau mblàng Ndong Brawl