VOV4.K’ho- Kờñ sền sơwì ală bơta ƀuơn, kal ke, cribơyai broă lơh bơsong, ngui tŭ niam nàng gàr sùm bơta bơtàu tơnguh kơ̆ kơljap gah lơh ka ti tàm tŭ tơngai pa, drim ngai 16/7 tàm Hà Nội, Bộ Nông nghiệp mờ Phát triển Nông thôn bơyai lơh pơrjum pờ tơn tàm internet bè “Broă lơh bơtàu tơnguh gah lơh ka ti nam 2021 mờ lơh jat Kơrnuat bơh Thủ tướng Chính phủ dê bè broă ring bal broă rơndap lơh bơtàu tơnguh phan tàm dà Việt Nam tus nam 2030, broă wèt sền tus nam 2045”. Tàm 6 nhai bồ nam do, khà ka ti ròng tàm tơnau dà dà hang bơrlŭ mờ dà ờs geh 371 rbô tấn, gơguh 12% pơndrờm mờ bal dùl tŭ nam 2020.

Bơdìh mờ ală cồng nha lơh geh, jơnau đơs bal bè gah lơh ka ti lơgar Việt Nam dê ai gŏ, gam pal kong mờ uă kal ke mờ bơta aniai tŭ bơtàu tơnguh pràn, broă gơlik geh bơh kòp Covid-19 dê kal ke mờ tàm pơrlòng kă bro dunia ờ gơtùi git lài. Lam lơh broă rơndap lơh bơtàu tơnguh phan tàm dà Việt Nam tus nam 2030, broă wèt sền tus nam 2045 neh geh Thủ tướng Chính phủ ring bal geh wèt tus jơnau kờñ gơguh phan tàm dà geh bơh 3 tus 4% tàm dùl nam; kờp jơh khà lơh geh 9 tơlak 800 rbô tấn; priă lơh geh bơh tac hờ lơgar ndai bơh 14 tơmàn tus 16 tơmàn dolar Mỹ mờ ai geh broă lơh rlau 3 tơlak 500 rbô nă cau in.

Cau mblàng K’Duẩn