VOV4.K’ho – Tàm jơnau cih lài, bol a` neh đơs tus bơta geh ngan chơt bu\ dà tàm Daklak mờ ală bơta jê sồt, roh rui, hoàc huơr tus mờ cau tờm, hìu bơnhă ală oh dê. Tềng đap bơta geh ngan do, Daklak neh mờ gam mut lơh uă broă lơh kờ` tơr mù [à rềs àr bu\ dà tàm kơnòm dềt. Tàm hơ\, càr sền gròi uă ngan tus broă bơto re dà kơnòm dềt in mờ ală broă lơh bè pờ ơdu\ bơto re dà ờ sa priă, hòi jà mpồl lơh sa kă bro bơcri priă, tă pơgồp balm ờ mpồl bơtiàn lơh tơnau re dà. Pơn jat tai tơngume “Bu\ dà kơnòm dềt tàm Daklak – git loh bơta jê sồt, at tê bal lơh broă”, cau ai tơnggit jơnau đơs H’Xíu geh jơnau cih yal bè ală broă lơh ngan tàm càr, kờ` tơr mù [à rềs àr do tàm càr.
Tơnau re dà Hoà Phát là tơnau re dà bơh cau dùl nă să is lơh sơn rờp ngan tàm kơnhoàl Cư Mgar, càr Daklak geh tơlik mat mờ ngui ngan ngồn bơh lồi nam 2014. Tus tu\ do, tơnau re dà do neh geh ngai sơlơ uă kơnòm dềt mờ làng bol tus bơsram re dà, pơlam tàp pràn să jan. Bi Nguyễn Đức Hoà, cau tờm tơnau re dà Hoà Phát yal: “Rơndap broă lơh a` dê kung geh dà lơgar ai ơpah ù mờ geh dong kờl priă ơpah ù. Bè broă bơsram re dà, den bơh sơn rờp pah nam geh mờr 100 nă oh tus bal, tơnơ\ do den ngai sơlơ gơguh uă mờ gơguh uă hời rơ hời jat pah nam. Kuơ màng, nam do kơnhoàl lam lơh broă lơh hòi jà tă pơgồp tàm ală hìu bơsram, den go\ khà kơnòm bơsram lòt bơsram re dà gơguh uă.”
Tàm xã Cư Suê, kơnhoàl Cư Mgar, tiah geh rlau 60% làng bol kòn cau ơm kis, dùl anih tàp pràn să jan tơr gùm bal geh [làng coh plai, nhơl bơlai, tơnau re dà, mờ priă bơcri lơh rlau 11 tơmàn priă bơh cau dùl nă să is bơcri lơh kung neh lơh jơh mờ ngui rlau 1 nam do. Xã bal mờ mpồl lơh sa kă bro bơyai lơh tơlik mat, yal tơnggit nàng hòi jà làng bol jun oh kòn tus bơsram re dà. Ồng Nguyễn Văn Ninh, Phó Chủ tịch UBND xã Cư Suê đơs, broă lơh bơh anih tàp pràn să jan tơr gùm bal dê, ngan là tơnau re dà neh pơgồp bơnah dong tơr mù khà bu\ dà tàm xã tàm pơgap 1 nam do: “Hòi jà gùt mpồl bơtìan tă pơgồp lơh tơnau re dà là dùl tàm uă broă lơh geh càr Daklak mut lơh kờ` tơrmù bà rềs àr bu\ dà tàm kơnòm dềt. Tàm hơ\, kơnhoàl Cư Mgar là tiah lơh lài tàm broă lơh jat srơh do, mờ 19 tơnau re dà tàm 6 xã, thị trấn mờ 9 hìu bơsram, tơnơ\ rlau 4 nam mut lơh. Tàm nam 2017, kơnhoàl gam bơyai lơh bơto pơlam bơta chài re dà ai rlau 150 nă cau pơgru bơto tàp pràn să jan in mờ bơyai lơh pơr lòng re dà nhai rlô bơkang ai ơruh pơnu, kơnòm pa tàu in nàng tơnguh cồng nha bơto re dà, dong bơtàu tơnguh srơh re dà tàm làng bol.”
Tơnau re dà bơh mpồl bơtiàn tă pơ gồp lơh tàm xã Cư Suê, kơnhoàl Cư Mgar
Bal mờ broă hòi jà gùt mpồl bơtìan tă pơgồp lơh tơnau re dà, Daklak lơh ngan mut lơh uă broă lơh ring bal ndai. Pa do, UBND càr Daklak neh geh công văn bè broă sơlơ rơcang sơndră rềs àr sồt să mờ bu\ dà tàm kơnòm dềt. Càr sồr Sở Nông nghiệp mờ Phát triển nông thôn, Sở Giao thông Vận tải, Sở Xây dựng càr, gơnoar atbồ ală tiah lòt sền, kờp sền, top [àng đơs lài, [àng ờ ai, pơng gàr kơryan, sền gàr tàm ală bơtơt rbòng dà, broă lơh drơng rài kis làng bol in, geh bal mờ ală [làng um cau tus is nàng gàr ờ do ờ dă kơnòm bơsram in tàm kàl rlô bơkang mờ nhai mìu nhàc dà ko\ dà cò. Ală tiah sơlơ lam sồr làng bol, lơh pơng gàr kơryan gùt dar tơrlung dà, tơnau dà rềp hìu.
Sở Giáo dục mờ Đào tạo mờ Tỉnh đoàn Daklak kung pơgồp bal mờ ală tiah bơyai lơh uă ơdu\ bơto re dà ờ sa priă ai kơnòm dềt gơwèt ală cau geh sră dong kờl bơh dà lơgar tàm ală xã, kơnhoàl tiah sar lơgar ngài tàm càr, dong uă kơnòm dềt geh tus bal mờ bơto ală bơta chài kuơ màng tàm dà ală oh in. Oh Trương Phú Long, kơnòm bơsram hìu bơsram kấp 2 Nguyễn Tất Thành, kơnhoàl Cư Mgar geh tus bal bơsram re dà tàm nhai rlô bơkang nam do đơs: “Oh bơsram re dà neh 10 ngai do. Oh kờ` ngan bơsram re dà tài bơsram re dà dong oh pràn kơldang, dong klàs is să tờm tu\ gơtìp dà bam rlau bồ.”
Daklak pờ uă ơdu\ bơto re dà ờ sa priă
Ồng Nguyễn Duy Tuyết, Kuang atbồ Phòng sền gàr, sền gròi kơnòm dềt mờ ring bal cau klau cau ùr, gơwèt Sở Lao động – Thương binh mờ Xã hội càr Daklak đơs là, bal mờ ală broă lơh neh mờ gam geh mut lơh, pal tơnguh git wă mpồl bơtiàn dê tàm broă sền gròi kơnòm dềt: “Rềs àr bu\ dà gơlik geh kung tài bơh bơta ờ huan sền gròi bơh mè bèp dê. Den tàng, tàm do, jơh mpồl chính trị lơh broă bal, nàng mblàng yal kung bè dong kờl, priă jền càr dê là dùl bơnah mơya jơnau git wă mpồl bơtìan dê là pal sền gàr is hìu bơnhă he, kòn sau he dê, den broă lơh rơcang sơndră bu\ dà do hơ\ sồng geh lơh niam mờ bol he gơtùi hời rơ hời tơrmù bơta do.”
Bơh ală ơdu\ do dong kơnòm dềt geh bơto re dà tàm nhai rlô bơkang
Bơta lơh broă bal bơh jơh mpồl chính trị neh pơgồp bơnah lơh tơr mù khà kơnòm dềt chơt tài rềs àr sồt să, ngan là tài bu\ dà. Jat tơr gùm kờp, 6 nhai bồ nam do, càr neh tơrmù geh 12 nă, hơ\ là gơmù rlau nggùl pơn drờm mờ 6 nhai bồ nam lài. Kờ` kơryan geh cồng nha rlau tai rềs àr bu\ dà, bal mờ broă mut lơh ală broă lơh bơh càr dê bè hòi jà gùt mpồl bơtiàn tă pơgồp lơh tơnau re dà, pờ ơdu\ bơto re dà, ală mè bèp mờ hìu bơsram pal sùm tơngkah, đơs lài bè rềs àr bu\ dà kơnòm dềt in tu\ ơm tàm hìu, tàm hìu bơsram. Bơh hơ\, kơnòm dềt ờ mìng geh bơta chài, mờ gam git rơcang gàr is mờ rềs àr bu\ dà.
Cau mblàng K’Duẩn
Viết bình luận