VOV4.K’ho - Tàm pơrjum lơh jăt kơnòl tàm ală nhai lồi nam geh bơyai lơh drim òr (30/06) tàm Hà Nội, Thứ trưởng Bộ Nông nghiệp mờ Phát triển Nông thôn ồng Phùng Đức Tiến đơs tờm, bơ̆t bơtàu wơl broă lơh sa suơn sre là kơnòl tờm lơh sùm nàng geh sùm broă gơguh bơh gah do dê mờ lơh jăt “tơngu me dơ̆ lĕ bal” jăt jơnau đơng lam bơh Thủ tướng Chính phủ tàm bơta kòp Covid-19 gơtờp gam uă kal ke.

6 nhai do, ală khà broă bơh gah lơh sa suơn sre ndrờm lơh geh mờ sơrlèt mờ rơndăp broă geh ai: Khà gơguh lơh sa geh 3,83%; gơguh 3,71% khà bơta kuơ, priă geh bơh broă tăc phan geh lơh bơh broă lơh sa suơn sre, brê bơnơm, phan tàm dà gơguh 28,3% mờ geh 24 tơmàn 230 dolar Mỹ, broă lơh sa suơn sre di pal là broă lơh sa tờm bơh gah lơh sa dê, kuơ màng tàm ală tŭ kal ke tài gơrềng bơh kòp Covid-19.

Cồng nha 6 nhai do bơh gah lơh sa suơn sre là broă tus bal pràn ngan bơh jơh ală mpồl lơh broă chính trị kung bè broă tus bal pràn bơh ală càr, ƀòn dờng, mpồl lơh sa kă bro, mpồl tam klăc ală gah lơh broă, phan geh lơh mờ làng bol lơh broă sa, bơh tŭ hơ̆ rơhời geh bơ̆t bơtàu mờ ai geh bơta niam tàm broă lơh sa suơn sre.

Cau mblàng Ndong Brawl