VOV4.K’ho- Ƀòn dờng Buôn Ma Thuột, càr Dăk Lăk là dùl tàm ală ƀòn dờng geh khà gơ glòm tờm chi uă ngan rlau jơh gùt lơgar, rlau 8 thơk vuông tàm dùl nă cau. Ală tờm chi tơlir bơh Buôn Ma Thuột gam lơh gơlik ù tiah dipal ngan nàng kis ai làng bol in mờ bơta tờm ngan lời wơl jơnau kah kir gơ wèt mờ nac nhơl chờ. Tờm chi tơlir bơh Buôn Ma Thuột dê tŭ do là cồng nha bơh git nđờ jơt nam gròi sền tus broă tam chi mờ bơta do gam pơn jat tai geh tơnguh tàm ală broă lơh, nghị quyết ai tơlik lài gùng dà bơtàu tơnguh ƀòn dờng tus nam 2030, broă wèt sền tus nam 2045.

Ngai bồ nam pa, bi Nguyễn Thị Loan bal mờ 5 nă kông nhân bơh mpồl 2, kông ty TNHH MTV tiah ơm kis Osaka ai cau lơh broă lơh niam wơl ƀlàng tam bơkàu, tam chi tàm rùp mòn Bác Hồ mờ kơnòm dềt tàm gùng Lê Duẩn, ƀòn dờng Buôn Ma Thuột. Gơ wèt mờ uă làng bol, ală kông nhân bè bi Loan ngan ngồn là ală nghệ ñân, ală cau lơh broă jơh nùs, khi neh pơgồp bơnah gàr sùm bơta niam, gròi sền, sơngka sền gàr chi che, ù tiah ai ƀòn dờng in. Rlau mờ cau lơi jơh, bi Loan chờ hờp ngan tŭ dà kơl hê bơh ală oh mi cau ùr tàm mpồl dê geh làng bol cih dờp: “Đơs bal là geh lơh niam ai tơl nă cau in lòt sền chi che, ù tiah, tơl nă cau sĕ còp gŏ niam, jờng rơ niam là chờ hờp ngan. Añ gŏ añ lơh tàm do pơn iờ să ngan taì he lơh sàng goh, niam bơnĕ, uă cau tus nhơl ñŏ, chờ hờp là he gŏ niam ngan. Nam pa kơp kờñ kòp bơtờp mhar jơh, tơl nă cau geh tìp mat chờ hờp.”

Tơl gơl gùng, tơl ƀồng tam bơkàu, kông viên, ƀlàng dờng ndrờm ai tơnggŏ gùng dà bơtàu tơnguh tơlir, wèt tus bơta kuơ mpồl bơtiàn

Mut tus nam 2022, kòp Kovid-19 tàm Buôn Ma Thuột neh gơtùi gròi sền, rài kis gam hời rơ hời gơ rê wơl mờ bơta bè ờs pa. Lòt jơng tàp pràn să jan tàm ngai bồ nam pa tàm Kông viên Sơn La tềng bồ đap hìu tơn, ồng Trần Đức Hòa ơm tàm gùng Y Ơn, sơnah ƀòn Tân Thành, ƀòn dờng Buôn Ma Thuột chờ hờp ngan tŭ dà lơgar neh sền gròi tă priă lơh broă lơh do. Ồng pà git, bơh dùl ƀlàng ù gời mờ uă bơta broă lơh tìs, ờ niam tàm mpồl bơtiàn, tŭ do tiah do neh gơ gơs dùl kông viên niam mờ gơ geh kuơ rlau gơ wèt mờ làng bol tơnơ̆ kòp bơtờp: “Làng bol chờ hờp ngan, geh anih nàng tàp pràn să jan, geh anih nàng làng bol, ală sau dềt in nhơl ñŏ, geh tŭ tơngai lơh prài bồ tơngoh, ơm rlô tơnơ̆ ngai lơh broă glar bòl. Do là klờm soh ƀòn dờng dê mờ tiah do dê. Añ kung lòt uă tiah mơya pal đơs là Buôn Ma Thuột là tiah geh tờm chi niam ngan rlau jơh tàm gùt lơgar. Dà lơgar kung sền gròi, bơcri priă uă. Ƀòn dờng kung geh broă rơndap lơh niam, rơndap ù tiah niam ngan.”

Brồ guh bơh tềl lời wơl tam lơh mờ thul kơmbuh ù pơr hê dê, tàm dùl tŭ tơngai ờ jŏ, Buôn Ma Thuột neh lơh gơs bơta niam ngan, chài ngan tàm bơtàu tơnguh. Tơl gơl gùng, tơl ƀồng tam bơkàu, kông viên, ƀlàng dờng ndrờm ai tơnggŏ gùng dà bơtàu tơnguh tơlir, wèt tus bơta kuơ mpồl bơtiàn. Lam kòn ùr dềt lòt nhơl tàm ngai bồ nam, bi Trần Thị Yến ơm tàm sơnah ƀòn Tự An, ƀòn dờng Buôn Ma Thuột gŏ gơ lơh niam nùs ngan mờ ală bơta kuơ geh lơh gơlik geh ală tờm chi mờ kông viên, ƀlàng tam bơkàu ndrờm bè ală brê tàm dơlam ƀòn dờng: “Tàm Buôn Ma Thuột añ gŏ geh uă kông viên, tờm chi tơlir. Kuơmàng là ală gơl gùng lòt den geh uă ngan tờm chi dờng, ală tờm chi do lơh nhơm kis tàm tiah sàng goh, ờ huan geh thul kơmbuh, añ gŏ kis tàm do ờdo ờdă, kis tàm do añ kờñ ngan.”

Mờ broă rơndap lơh, rơndap lài ù tiah niam ngan mờ bơta sền gròi tă priă bơcri dipal, Buôn Ma Thuột gam hời rơhời geh bơt bơtàu nàng dipal là tiah drà tờm Tây Nguyên dê

Bơt bơtàu ƀòn dờng tơlir ờ mìng tàm gùng lòt, kông viên mờ bơta do gam ai tơnggŏ tàm ală ƀlàng bơh ală anih lơh broă, mpồl, gah broă lơh mờ tơl hìu bơnhă làng bol, ƀòn lơgar. Ală anih lơh broă dà lơgar pah tŭ lơh pa, lơh niam wơl ndrờm gròi sền tus broă gàr wơl tờm chi jŏ sơnam mờ tam tai tờm chi pa. Ai tàm ală ƀòn tàm ƀòn dờng, dà tơlir bơh tờm chi dê sùm là bơta tờm ngan nàng lơh gơlik tềl lời wơl bè niam chài bơh ù tiah Tây Nguyên dờng ơning ơnàng dê.

Ồng Võ Kỳ, Phó Kwang atbồ cơldŭ lơh broă atbồ tiah drà ƀòn dờng Buôn Ma Thuột pà git, jat Nghị quyết bơh Quôk hội dê bè tam pà tiah drà, gơ wèt mờ ƀòn dờng khà 1 gơ wèt càr, bă ù tam chi tơlỉ rtàm mpồl bơtiàn tiah dơlam ƀòn dờng geh bơh 5 tus 6 thơk vuông tàm dùl nă cau. Tàm tŭ hơ̆, khà tờm chi tơlir tàm dơlam ƀòn dờng Buôn Ma Thuột tus jơh nam 2021 neh geh 8,11 thơk vuông tàm dùl nă cau mờ jơh gùt ƀòn dờng là 17,4 thơk vuông tàm dùl nă cau. Mờ cồng nha do, Buôn Ma Thuột tŭ do là dùl tàm ală ƀòn dờng geh khà tờm chi tơlir uă ngan rlau jơh gùt lơgar. Lơh jat broă lơh 1 tơlak tờm chi tơlir bơh Cíñ phủ dê, nam lài, ƀòn dờng kung neh jơh nùs lam lơh mờ cồng nha là neh tam geh rlau 6 rbô tờm chi. Jơnau kờñ tàm nam 2022 do geh pơn jat tai tơnguh tai mờ ală bơta tờm chi tờm ngan là tờm chi geh bơh jŏ tàm tiah do geh pơn rơ ngan bơh ù tiah Tây Nguyên dê: “Tŭ do tam tờm chi tàm ƀlàng tam bơkàu, kông viên tàm ƀòn dờng Buôn Ma Thuột uă ngan là tơrgùm tàm ală bơta tờm chi geh bơh jŏ tàm tiah do, cèng bơta niam krơi is bơh tiah drà Buôn Ma Thuột dê kung bè tiah Tây Nguyên dê. Ngui ală bơta tờm chi bè Sao, Kơ Te, Giáng Hương, Kơm Lai halà tờm chi Kơ Nia, do là 2, 3 bơta tờm chi mờ bol hi neh cribơyai mờ Thành ủy, Ủy ban Ñân zân tam tàm ƀòn dờng.”

Kông nhân lơh niam wơl ƀlàng tam bơkàu tàm rùp mòn Bác Hồ mờ kơnòm dềt tàm gùng Lê Duẩn

Ồng Vũ Văn Hưng, Củ tịc Ủy ƀan Ñân zân ƀòn dờng Buôn Ma Thuột pà git, nàng bơt bơtaù ƀòn dờng tơlir geh bè tŭ do, sùm tàm nđờ jơt nam do, ală rơnàng kwang đơng lam bồ bơh càr, ƀòn dờng dê neh sùm gròi sền mờ geh broă wèt sền, geh broă rơndap ù tiah tam tờm chi dùl bă niam ngan. Tus tŭ do, broă wèt sền hơ̆ gam pơn jat tai geh tơnguh nàng bơt bơtàu Buôn Ma Thuột di pal mờ tiah drà chi che, brê bơnơm, cèng bơta niam chài mờ tam gơl pa jat Jơnau đơs pơn dut sồ 67 bơh Ƀộ Cíñ trị dê bè bơt bơtàu, bơtàu tơnguh Buôn Ma Thuột tus nam 2030, broă wèt sền tus nam 2045. Jat broă lam lơh jat Nghị quyết pơrjum dờng Đảng ƀộ ƀòn dờng dơ̆ 15, tơngai lơh broă bơh nam 2020 tus nam 2025, kờp jơh bă ù tam tờm chi mpồl bơtiàn tàm dơlam ƀòn dờng tus lồi tơngai lơh broă geh tơnguh tus 9 thơk vuông tàm dùl nă cau. Do là kơnòl broă kal ke tŭ khà kờp làng bol ngai sơlơ gơguh uă tàm tŭ khà ù mpồl bơtiàn mờ kes priă ờ uă, mơya ƀòn dờng pin dờn geh lơh gơtùi mờ ală broă lơh, broă rơndap lơh ngan ngồn: “Gùng dà bơh ƀòn dờng dê là pal pơn jat tai tơnguh jơnhua, rlau 9 thơk vuông tàm dùl nă cau tàm dơlam tiah drà mờ 18 thơk vuông tàm dùl nă cau jơh gùt ƀòn dờng. Mờ ngan là tơnguh den kal ke ngan tài khà kờp làng bol gơguh uă mờ bă ù ai tờm chi in ngai sơlơ gơmù. Den pal hòi jà kwang bàng, kông nhân, viên cứk pah nam geh ngai sa tềp lam lơh tam chi, den êt ngan rlau jơh tơl nă cau tam geh dùl tờm chi. Mờ ală tiah drà pa geh lơh den geh gròi sền tus tă priă lơh niam ƀlàng tam bơkàu, jơh ală ƀlàng tam bơkàu ndrờm geh broă bơcri ndrờm bal.”

Mờ broă rơndap lơh, rơndap lài ù tiah niam ngan bal mờ bơta sền gròi tă priă bơcri dipal, Buôn Ma Thuột gam hời rơhời geh bơt bơtàu nàng dipal tiah drà tờm bơh Tây Nguyên dê. Tàm ală cồng nha bơh ƀòn dờng dê, bơta pơn rơ gam geh tơnggŏ hŏ là ală tờm chi geh pơn yơ bè brê tàm ƀòn dờng, lơh gơlik ù tiah dipal ngan nàng kis ai làng bol in mờ gơ hòi gơ jà nac nhơl chờ.

Cau mblàng K’Duẩn