VOV4.K’ho– Tàm tơngai ƀòn dờng Buôn Ma Thuột lơh kràñ gròi sền broă lòt rê tàm 5 ngai nàng tơrgùm jơh bơta pràn lơh xét nghiệm mhar kháng nguyên Sars CoV-2, gơnoar atbồ ƀòn dờng, uă mpồl lơh sa kă bro, anih tờm kă bro neh rơcang lài khà lơh gơlik, tac phan sa mờ tac tus tê làng bol in tơn.

Chờ hờp dờp kơldung phan sa geh biap, poac, tap bơh cau tàm Mpồl Covid-19 mpồl bơtiàn bơh Tổ dân phố 7, sơnah ƀòn Tân An, ƀòn dờng Buôn Ma Thuột lòt drà ala, bi Trần Thị Hằng ơm tàm gùng Nguyễn Xuân Nguyên pà git, hìu bơnhă bi geh pà sră cih mat lài lòt drà ala tàm mang ngai 26/8. Tàm àng drim ngai 27/8, bi neh pơyua mơ sră lòt drà tàm mpồl Zalo bơh sơnah ƀòn dê mờ dờp geh phan kờñ blơi tàm trồ mho: “Añ gŏ broă sơnah ƀòn lam lơh lòt drà ala làng bol in tàm tŭ tơngai ƀòn dờng gam ngui Jơnau sồr sồ 16 nàng gròi sền kòp là geh cồng nha ngan. Bol hi kờñ blơi phan lơi mìng kờñ hòi điện thoại sồr sơnah ƀòn den geh cau lòt blơi ala mờ jun tus tàm hìu tơn nàng hìu bơnhă bol hi ơm tàm hìu rơcang sơndră kòp. Añ gŏ đoàn viên hơ̆ sồng ală bi ùr jơh nùs ngan tàm broă gròi sền làng bol in”.

Ƀòn dờng Buôn Ma Thuột neh lam lơh ơm yah ngài mpồl bơtiàn jat jơnau sồr sồ 16 bơh 6 jơ mang ngai 26/8. Jat hơ̆, tàm 5 ngai sơn rờp, ƀòn dờng sồr làng bol ờ gŏ di lik bơh hìu nàng tơrgùm jơh bơta pràn lơh xét nghiệm mhar ai jơh mờr 375 rbô nă làng bol in, kờñ mhar tam cah F0 lik bơh mpồl bơtiàn. Tàm tơngai do, Ủy ban Nhân dân ƀòn dờng Buôn Ma Thuột jàu ală xã, sơnah ƀòn crơng gơs “siêu thị 0 đông” nàng drơng ală hìu bơnhă làng bol kal ke, mờ kung lam lơh broă lơh “Lòt drà dong làng bol”. Lam lơh broă lơh do tàm sơnah ƀòn Thống Nhất, ồng Nguyễn Khắc Sơn, Bí thư Chi bộ mờ là kuang atbồ Tổ dân phố 1 pà git: “Ală hìu bơnhă làng bol geh pà sră lòt drà bal mờ đah tơnơ̆ sră dê là cih ală jơnau sồr mùl màl den làng bol geh cih ală bơta phan ngui sa pal geh tàm gah tơnơ̆. Làng bol cùp mờ pơyua tàm mpồl Zalo tổ dân phố bol hi dê in. Tổ dân phố bol hi tơrgùm wơl mờ pơyua Ủy ban Nhân dân sơnah ƀòn in nàng Ủy ban Nhân dân sơnah ƀòn lam lơh broă lơh blơi phan làng bol in”.

Bơta krơi is tàm broă tac phan làng bol tàm tơngai tŭ do là dơ̆ sơn rờp, ală siêu thị, anih tờm kă bro tàm ƀòn dờng Buôn Ma Thuột lam lơh tac phan jat ală “combo phan sa pal geh” geh cih lài mờ ală khà priă bơh 100 rbô tus 500 rbô đông nàng drơng jơnau kờñ ngui sa bơh làng bol dê. Tơl combo sùm geh ală bơta phan bè: poac, ka, biap, kơnuh, plai chi, tơngi, phan tĕ, dà màn, tap, dà toh, phe, ală phan sền gròi să jan, hìu bơnhă... Tŭ do geh 5 anih tac phan tàm ƀòn dờng geh Siêu thị GO Buôn Ma Thuột, siêu thị Co.opmart Buôn Ma Thuột, siêu thị MM Mega Buôn Ma Thuột, ròt anih tac phan Vinmart, ală siêu thị Bách hóa xanh geh ngui broă lơh tac phan online, tac jat combo mờ lam lơh broă gàr kơ̆ kơljap khà priă gơ wèt tus mờ uă phan ngui sa pal geh.

Cau tàm mpồl lơh broă Covid-19 mpồl bơtiàn lòt drà ala ai làng bol tàm ƀòn dờng Buôn Ma Thuột in

Mò Trần Thị Thành Nhân, Phó Kuang atbồ siêu thị Co.opmart Buôn Ma Thuột pà git, siêu thị neh rơcang lài tam pà phe, phan sa, phan ngui sa pal geh, rơndap ai mpồl cau lơh broă jàu phan nàng di tŭ drơng jơnau kờñ bơh cau blơi dê: “Siêu thị kung rơcang combo ală bơta phan ngui sa pal geh bè biap, kơnuh, plai chi, poac, ka nàng drơng làng bol in blơi phan dùl bă ƀuơn ƀuài mờ sơbac mhar. Ai bè mat phan blơi online den ală gah mblàng jơnau bè facebook, zalo, sồ điện thoại lơh broă sùm den siêu thị rơndap ai cau lơh broă nàng lam lơh broă dờp sră blơi phan mờ broă jòi pha kung bè jàu phan cau blơi in geh sơbac mhar mờ di tŭ”.

Ồng Lưu Văn Khôi, Kuang atbồ Sở Công thương càr Dăk Lăk pà git, jat kờp dŭ bơh Sở Công thương dê, anih lơh gơlik is càr dê den sur geh 830 rbô nơm; rơpu, kơnrồ geh 305 rbô nơm; iar, ơda geh mờr 13 tơlak nơm; biap, kơnuh, plai chi geh 10 rbô 500 lồ... gơtùi rơcang lài lơh gơlik phan sa kis, ris tàm càr tơn. Bal mờ hơ̆, phe mờ ală bơta phan sa ndai kung neh geh rơcang lài uă rlau 3 dơ̆ pơndrờm mờ bè ờs. Khà phan pal geh pah ngai geh gàr tơl nàng làng bol in iang nùs bal mờ dà lơgar rơcang sơndră kòp: “Khà phan den li la ngan mờ ală siêu thị, anih tờm kă bro neh geh broă rơndap lơh rơcang lài phan tac wil tơl, iang nùs nhơm. Ngai lài mờ tŭ lơh jat jơnau sồr sồ 16 den dơ̆ do kung ờ gam gơlik geh bơta làng bol lòt blơi phan tơrgùm uă tàm dùl tŭ tơngai tai, sền bal den làng bol kung iang nùs ngan”.

Pa do, Ủy ban Nhân dân ƀòn dờng Buôn Ma Thuột, càr Dăk Lăk geh sră nggal bè broă lam lơh tac phe, phan sa tàm tơngai ơm yah ngài mpồl bơtiàn jat jơnau sồr sồ 16 bơh Thủ tướng Chính phủ dê. Jat hơ̆, gơ wèt mờ broă tac phe, phan sa jat broă lơh blơi phan online den geh lam lơh jat 2 broă lơh. Lài ngan là làng bol cih mat blơi tơn bơh mpồl tac phan, cau jàu phan bơh mpồl tac phan dê geh cèng phan tus tàm hìu ai làng bol in, priă blơi phan geh tơm tàm internet halà tơm tơn tŭ jàu mờ dờp phan. Dơ̆ 2, làng bol cih mat blơi phan mờ pơyua priă blơi phan ala bơh Mpồl dong kờl tàm thôn, ƀòn, tổ dân phố tàm ală xã, sơnah ƀòn. Mờ broă lơh do, rơndeh jàu phan bơh mpồl tac phan dê jàu tus tàm ală mpồl dong kờl xã, sơnah ƀòn halà Ủy ban Nhân dân xã, sơnah ƀòn ai cau, rơndeh rơndồ dờp phan tơn tàm ală mpồl tac phan (dilah mpồl tac phan ờ di tŭ rơcang ai rơndeh rơndồ jàu phan), tơnơ̆ hơ̆ jàu phan wơl làng bol in.

Rơndeh rơndồ jàu phan là rơndeh jàu phan bơh mpồl tac phan sa dê halà rơndeh bơh gơnoar atbồ tàm bòn lơgar dờp. Cau jàu phan bơh mpồl tac phan pal geh phan soh ndrờm bal bơh mpồl tac phan dê mờ geh cồng nha xét nghiệm ờ bơtờp kòp.

Cau mblàng K’Duẩn