VOV4.K’ho - Sở Nông nghiệp mờ Phát triển Nông thôn càr Dăk Lăk neh bơyai lơh tơn jơh broă lơh sa nam 2021, lơh jăt kơnòl nam 2022. Jăt jơnau yal tàm pơrjum, nam 2021, bŭ lah pơn jăt tai gơtìp uă kal ke tài kòp Kovid-19, bơta kòp gơtờp tàm broă ròng phan kung gam gơtìp, khà priă, broă kă bro ờ uă bơta phan bơh broă lơh sa suơn sre ờ hềt ring niam mơya ală khà tơrgùm bal bơh gah lơh sa suơn sre ndrờm geh mờ sơrlèt mờ rơndăp broă geh ai.

                                      Phan geh lơh bơh broă lơh sa suơn sre càr Dăk Lăk

Tàm hơ̆, khà geh kuơ phan geh lơh bơh broă lơh sa suơn sre, brê bơnơm, phan tàm dà gơguh mờr 4% pơn drờm mờ nam 2020; tam brê geh rơlao 146% khà rơndăp broă; kòp gơtờp tàm phan tam, phan ròng geh sền gròi niam; khà xã geh khà ƀòn lơgar pa là rơlao 46%. Ală cồng nha do neh pơgồp bal kuơ màng tàm broă gơguh mờ tơnguh bơtàu broă lơh sa mpồl bơtiàn bal càr dê. Jăt Sở Nông nghiệp mờ Phát triển Nông thôn càr yal, nam 2022 càr Dăk Lăk pơn jăt tai lơh ngan chồl pràn broă bơ̆t bơtàu wơl broă lơh sa suơn sre, ai geh mờ lơh jăt di pal mờ khà gơguh lơh sa geh ai là 4,56%.

Cau mblàng Ndong Brawl