VOV4.K’ho - Bŭ lah nam bơsram 2021-2022 neh rơlao mờr nggùl tơngai bơh dơ̆ bơsram kỳ 1, mơya tus tŭ do, kung gam uă kơnòm bơsram tàm càr Dăk Lăk gơtìp kòl tàm ală tiah ndai ờ hềt rê nàng lòt bơsram mờ kung geh uă kơnòm bơsram tàm ală càr ndai gam pal bơsram ing tàm càr Dăk Lăk.

                                                              Kơnòm bơsram càr Dăk Lăk

Nàng gàr niam gơnoar kuơ broă bơsram kơnòm bơsram in, gah bơto bơtê mờ bơsram càr Dăk Lăk gam ai tơl ală bơta niam ngan nàng ală kơnòm bơsram ờ gơtìp koh gơl tàm broă bơsram bŭ lah tàm ală tiah lơi. Jăt Sở Giáo dục mờ Đào tạo càr Dăk Lăk yal, tơnơ̆ mờ 1 nhai bơh tŭ kơnòm bơsram gùt càr mùl màl mŭt tàm nam bơsram pa, tus tŭ do, gam 1 rơbô 270 nă kơnòm bơsram ală cấp càr Dăk Lăk dê ờ hềt rê nàng bơsram mờ rơlao 660 nă kơnòm bơsram bơh ală tiah ndai gam bơsram ing tàm ală hìu bơsram càr Dăk lăk. Gơwèt mờ ală kơnòm bơsram do, Sở đơng lam ală hìu bơsram dờp, rơndăp săp sèng ơdŭ di pal ai kơnòm bơsram in, ai tơl bơta niam nàng ală kơnòm bơsram in tus bal bơsram bŭ lah bơsram pờ tàm internet ha là bơsram tơn tàm ơdŭ.

Cau mblàng Ndong Brawl