VOV4.K’ho - Tơngai do, càr Dăk Lăk neh geh rơlao 17 rơbô nă cau bơh ală càr hờ đah jum rê, pal tam cah is jăt mờ kơrnoăt geh ai tàm broă rơcang sơndră mờ kòp Covid-19. Bal mờ hơ̆ là git nđờ jơ̆t rơbô nă cau rê tus tàm tiah tàm gùl lơgar, tus tàm tiah hờ đah tô dà lơgar ngài ngan, kung lòt gan càr Dăk Lăk sơl. Ală gah, mpồl lơh broă bal mờ làng bol tàm càr neh tă bal phan sa, phan ngui, dong kờl dơ̆ saò ai cau lòt gùng bal mờ cau tam cah is nàng iang nùs tàm broă rơcang sơndră mờ kòp gơtờp. broă lơh do neh pơgồp bal tàm broă “dong kờl” ai dơ̆ rê gam uă kal ke, glar bòl in.

Tàm gùng lòt bơh ƀòn dờng Hồ Chí Minh rê tus càr Quảng Nam, lŏ Đỗ Thị Thanh Châu neh geh broă “dong kờl” bè phan bơna bal mờ nùs nhơm. Tŭ ơm rơlô tềng anih dong kờl piang sào mờ dà hùc tềng đăp hìu bơsram cấp 2 Trần Phú, xã Hoà Phú, ƀòn dờng Buôn Ma Thuột, càr Dăk Lăk, lŏ ngoh rơngăc ngan đơs: “Geh piang sào, geh dà, dà toh hùc tơl. Drim ti kung geh 2, 3 nă cau pà priă kòn añ in. Añ gŏ gơlơh geh uă nùs nhơm tàm sơnđàc bal ngan. Tŭ sơnrờp lòt den moăt ngan, tŭ neh lòt hơ̆ sồng gŏ nùs nhơm tàm sơnđàc bal uă ngan den tàng kung lơh nùs nhơm añ chờ hờp ngan mờ kah sùm nùs nhơm tàm gơboh bal bơh ală bi dong kờl”.

               Ală cau lơh broă nùs nhơm dong kờl trŭ sa tàm ală hìu trŭ sa lơh broă nùs nhơm dong kờl

Tơngai do, Hội chữ thập đỏ càr Dăk Lăk pơgồp bal mờ ală mpồl lơh broă nùs nhơm dong kờl neh trŭ git nđờ rơbô khà piang sào pah ngai, dong kờl mpồl cau bơh ală càr hờ đah jum dà lơgar rê. Ală pò piang, kơl dung pòr ha là ƀañ mi neh pơgồp bal bơnah lơi tơn jơh bơta glar bòl bơh ală làng bol tàm gùng rê. Mò Trần Thị Phương Thu, Phó Chủ tịch Hội chữ thập đỏ càr Dăk Lăk pà git: pah ngai geh bơh 5 rơbô tus 6 rơbô khà phan sa geh ală mpồl lơh broă nùs nhơm dong kờl, hìu trŭ sa nùs nhơm dong kờl tàm ală anih dong kờl tàm gùng 14 (gơwèt xã Hoà Phú, ƀòn dờng Buôn Ma Thuột). Hội neh bơyai lơh đơng lam, tam pà tơngai mờ anih dờp nàng tơmù broă làng bol tơrgùm gal ir tàm dùl anih. “Tŭ do, tàm ală anih gròi sền kòp gơtờp bơh bồ ƀòn dờng Buôn Ma Thuột, càr neh đơng lam mìng yal mờ wah gùng ai ală kơnhoàl in rò làng bol rê tus ală kơnhoàl, bơyai lơh xét nghiệm mhar mờ rơwah nàng tam cah is. Tềng đăp mờ bơta do, Hội chữ thập đỏ càr neh đơng lam ală hội tàm kơnhoàl, thị xã, ƀòn dờng pơn jăt tai dong kờl ai làng bol bè phan sa mờ dà hùc. Mờ lơh gùng dà broă lam sồr, ai ngui ală hìu trŭ sa nàng dong kờl broă sơcang sơndră mờ kòp tàm càr in”.

                               Ală hộp piang geh klơm nền nòn nàng jun tus tàm ală anih dong kờl

Ờ mìng tàm ƀòn dờng Buôn Ma Thuột, ală ngai do tàm ală kơnhoàl tàm càr Dăk Lăk jăt gah gùng 14 lòt gan, uă mpồl lơh broă nùs nhơm dong kờl, cau lơh broă nùs nhơm dong kờl mờ ală mpồl lơh broă kung neh pơgồp bal bơyai lơh uă anih dong kờl nàng dong kờl mpồl cau rê hờ ƀòn lơgar tờm lòt gan.

Bal mờ broă dong kờl cau lòt gùng, tơngai do, ală mpồl lơh broă bal mờ làng bol kis tàm càr Dăk Lăk kung neh bơyai lơh ală hìu trŭ sa ờ sa priă nàng dong kờl ală cau pal tam cah is tơrgùm bal. Mò Hoàng Thị Thu Hương, Chủ tịch Mpồl tam klăc cau ùr xã Xuân Phú, kơnhoàl Ea Kar drơng broă “hìu sa 0 đong” tàm do pà git, tŭ do hìu sa geh rơlao 100 nă cau tus bal, pah ngai geh bơh 5 tus 10 nă oh mi cau ùr tàm ala bal trŭ sa. Tus tŭ do, ală oh mi cau ùr neh drơng rơlao 10 rơbô khà piang sào ờ sa priă nàng dong kờl cau tam cah is tơrgùm bal. “Bơh mùl màl làng bol lòt lơh broă ngài rê hờ ƀòn lơgar tờm den kal ke ngan mờ hìu nhă kis tàm tiah ngài ờ tơl bơta nàng jun piang jun dà. Den bol añ lơh hìu trŭ sa 0 đong mờ ală mpồl lơh broă lòt lam sồr làng bol tă phan bal mờ priă nàng trŭ sa, geh sùm bơh tŭ gơtìp kòp tus tŭ do. Nùs nhơm lơh broă bơh oh mi cau ùr cau lơi kung ñhăp ñhar, geh tŭ geh uă oh mi cau ùr tàm bol añ ờ duh pal lam sồr, cau lơi ru den tus nàng dong kờl, sền bè broă lơh tàm hìu nhă tờm. Lài ngan bol añ lam sồr ală hìu nhă geh oh kòn, geh cau tàm hìu nhă tam cah is tàm ƀòn tus bal nàng trŭ sa, nàng git bol añ trŭ sa geh tơl niam, bơkah, kloh lah ờ”.

                                      Ai piang sào ờ sa priă dong kờl cau rê iang nùs tam cah is

Jăt ồng Đào Đức Hoàn, Chủ tịch UBND xã Xuân Phú yal, tơngai do geh rơlao 100 nă cau rê bơh ală càr hờ đah jum dà lơgar tus tàm xã, gam lơh jăt broă tam cah is tơrgùm bal tàm ală hìu pơrjum tàm ală ƀòn. Nàng làng bol iang nùs tam cah is, gơnoar atbồ xã mờ ală mpồl lơh broă neh lam sồr mpồl lơh sa kă bro, ală cau geh nùs nhơm niam tă priă nàng “hìu trŭ sa 0 đong” geh lơh broă, drơng ală tiah tàm cah is tơrgùm bal in. “Ală làng bol rê tŭ sơnrờp gơtìp kal ke ngan. Mơya mìng tơnơ̆ mờ 1, 2 ngai den ală cau do gŏ broă lơh bơh ală hìu trŭ sa bal kung bè nùs nhơm bơh xã dê bè broă rơcang sơndră mờ kòp den tàng ală cau do iang nùs, lơh jăt niam ală kơrnoăt geh ai bè broă rơcang sơndră mờ kòp Covid-19. Tus tŭ do, xã Xuân Phú neh wă rò geh rơlao 1 rơbô nă tàm aloă dơ̆ rê tam cah is tàm xã. Jơh ală cau do ờ pal tă phan lơi tàm ală dơ̆ sào tàm tiah tam cah is. Tŭ do, broă rơcang sơndră mờ kòp gơtờp tàm xã bol añ tìp uă bơta niam tài làng bol tus bal nàng dong kờl ală làng bol lòt lơh broă ngài rê nàng geh piang sào”.

Ală khà piang sào, jơlŭ pòr ha là ƀañ mi, khàr dà geh pà tềng tê cau lòt gùng mờ ală cau pal tam cah is tơrgùm bal ndrờm geh tơlik nùs nhơm jơh nùs bơh làng bol càr Dăk Lăk dê gơwèt mờ ală cau geh rài kis gơtìp kal ke. Broă lơh nùs nhơm dong kờl do bơh làng bol càr Dăk Lăk neh pơgồp bal tàm broă “dong kờl” ai dơ̆ rê hờ ƀòn lơgar tờm gam uă ngan kal ke in.

Cau mblàng Ndong Brawl