VOV4.K’ho - Tàm ƀòn dờng Buôn Ma Thuột, Sở Y tế càr Dăk Lăk neh dờp geh 5 rơndeh cit sơnơm vaccine ntrờn geh Công ty cổ phần ô tô THACO Trường Hải dong kờl nàng drơng tàm broă rơcang sơndră mờ kòp Covid-19 gam gơtìp kal ke tàm càr do.

Ồng Nay Phi La Kuang atbồ Sở Y tế càr Dăk Lăk dờp rơndeh bơh công ty cổ phần ô tô THACO Trường Hải pà

Rơndeh do geh lơh di pal mờ bơta kờñ drơng tàm broă cit sơnơm vaccine ờ do ờ dă, geh cồng nha tàm ală tiah kờñ lòt rê gam gơtìp kal ke, mờ geh ngui nàng lòt lơh broă ai mẫu xét nghiệm kòp Covid-19. Tàm rơndeh geh thùng prăp gàr sơnơm vaccine mờ ală phan sền gròi bơta mrềt tàm broă prăp gàr sơnơm vaccine. Sở Y tế càr Dăk Lăk pà git: tàm 1 tơlăk 362 rơbô 176 nă cau rơlao 18 sơnam, càr Dăk Lăk mìng rơ̆p cit geh sơnơm vaccine rơcang sơndră mờ kòp Covid-19 ding sơnrờp geh 64%, mờ ding dơ̆ 2 geh 9,41%. Nàng kơrian mờ bơta gơtờp bơh kòp gam gơtìp kal ke, càr Dăk Lăk pal chồl pràn broă cit sơnơm vaccine. Den tàng broă dong kờl 5 rơndeh cit sơnơm vaccine ntrờn là geh kuơ, dong kờl càr gơtùi cit mhar tus tàm tiah ngài mờ ală tiah geh ƀòn lơgar ngài mờ hìu sơnơm.

Cau mblàng Ndong Brawl