VOV4.K’ho - Mờ jơnau kờñ gàr niam ờ do ờ dă ai broă tĕ khà in, mpồl Kuang àng càr Dak Lak gam lơh jăt ndrờm bal ală broă lơh nàng gàr niam bơta lơngăp lơngai ờ do ờ dă mpồl bơtiàn drơng broă tĕ khà kuang bàng Quốc hội khoă 15 mờ kuang bàng HĐND ală cấp tơngai lơh broă bơh nam 2021 tus 2026.

                                                          Kuang àng càr Dak Lak lĭk lơh broă

Jăt Đại tá Lê Vinh Quy, Kuang atbồ gah Kuang àng càr Dak Lak yal, mpồl kuang àng càr gam pơn jăt tai lơh jăt dơ̆ lĭk lơh broă uă nàng kơrian ală cau tìs, ală broă lơh tìs mờ adăt boh lam, tơn jơh ală tiah gơtìp kal ke bè bơta lơngăp lơngai ờ do ờ dă tus mờ dơ̆ tĕ khà kuang bàng Quốc hội khoă 15 mờ kuang bàng HĐND ală cấp tơngai lơh broă bơh nam 2021 tus 2026.

Ală mpồl lơh broă bơ̆t bơtàu rơndăp broă tam pà, ai mpồl lơh broă di jăt ală gơl gùng, tiah geh uă bơta ờ niam. Mpồl cảnh sát sền gàr gùng lòt, Cảnh sát cơ động, Cảnh sát 113 geh tus tàm ală tiah, tơnguh broă lòt sền gròi, sền nàng gàr niam bơta ờ do ờ dă tàm mpồl bơtiàn, ờ do ờ dă tàm gùng lòt, gàr niam ờ do ờ dă tàm ală tiah bơyai lơh tìp mờ cau tĕ khà mờ tĕ khà.

Cau mblàng Ndong Brawl