VOV4.K’ho - Mang ngai 25 nhai 04, mpồl ling sền gàr tiah nhàr dà lơgar càr Dak Lak neh gŏ mờ tam cah di tŭ 13 nă làng bol rê bơh lơgar Campuchia. 13 nă cau do là ală cau kis tàm kơnhoàl Ea Súp, tus tàm lơgar Campuchia lơh broă.

 Dùl anih sền gàr tiah nhàr dà lơgar Ia Rvê, kơnhoàl Ea Súp, càr Dak Lak

Tŭ kòp Covid-19 gơtìp tàm lơgar Campuchia mờ gơtìp kal ke, mpồl cau do neh rê hờ lơgar Việt Nam bơh gùng ù tàm gơl gùng nhàr dà lơgar đah lơgar Việt Nam mờ Campuchia. Tŭ 12 jơ mang ngai 25 nhai 4, tŭ mpồl cau do rơ̆p mŭt tàm ù tiah lơgar he neh gơtìp mpồl ling sền gàr tiah nhàr dà lơgar Ia Rvê, kơnhoàl Ea Súp lòt sền gròi mờ gŏ.

Tơnơ̆ mờ hơ̆ tơn, jơh 13 nă cau do geh cèng rê tam cah tơrgùm bal tàm hìu sơnơm kơnhoàl Ea Súp mờ geh ai phan xét nghiệm. Cồng nha xét nghiệm bơh anih tờm sền gròi kòp tê jê să càr tàm mang ngai 25 nhai 4 pà gŏ, jơh 13 nă cau do ờ geh mờ virus SARS-COV-2 dơ̆ sơnrờp.

Cau mblàng Ndong Brawl