VOV4.K’ho - Kàl pĭc plai kơphe nam 2021-2022 rơcang tàm kàl tơnhào tờm, càr Dăk Lăk kờñ git nđờ rơhiang rơbô nă cau nàng pĭc plai kơphe. Mơya, tàm tơngai kòp Covid-19 kung gam gơtìp kal ke den broă ntrờn cau lơh broă nàng geh tơl cau pĭc plai kơphe, gàr niam kòp gơtờp, gam là bơta sền gròi ngan bơh làng bol lơh broă sa bal mờ gơnoar atbồ tàm càr Dăk Lăk dê.

Mờ 2 lồ ù tam kơphe, pah nam tŭ tus tàm kàl tơnhào, hìu nhă ồng Hoàng Đoàn, kis tàm ƀòn Kty 4, xã Chư Kbô, kơnhoàl Krông Buk pal kờñ bơh 4 tus 5 nă cau pĭc plai tàm pơgăp 2 nhai. Hìu geh bàr nă ùr bơklao, oh kòn lòt bơsram den tàng ồng pal ơpah tai 2 nă cau pĭc plai hơ̆ sồng di tơngai mờ bơta niam kơphe.

                     Làng bol lơh broă sa tàm càr Dăk Lăk rơcang mŭt tàm kàl pĭc plai kơphe 2021-2022

Mơya tàm nam do, ồng geh ờ uă jơnau ờ sŭk ơm tài tus tŭ do kung gam ờ hềt jòi geh cau pĭc plai. Ală nam cau pĭc plai geh uă tus bơh càr Gia Lai, Phú Yên, Bình Định. Mơya nam do tài bơta kòp Covid-19 gơtìp kal ke, broă lòt rê gơtìp gơmù, den tàng cau pĭc plai kơphe tàm kàl lơh sa do di gơlan ờ tơl. “Di lah bè pĭc plai lir ir den plai ờ hềt dum uă ngan lơh gơmù cồng nha, mờ tŭ lời pĭc neh dum ir den khà plai gơtìp tu kung uă, bơta niam plai kung gơmù. Tàm nggùl nhai 11 sơn đờm pĭc. Di lah 1 hìu geh bơh 7 tus 8 tấn, 4 nă cau nàng pĭc ndrờm bal den pal tàm 2 nhai. Den tàng di lah pơn drờm bè nam do gơtìp kòp, den broă kờñ cau lơh broă gơtìp kal ke ngan mờ hìu nhă bol añ”.

Kung ndrờm bal mờ nùs nhơm ờ sŭk ơm hơ̆, ồng Phan Trọng Ký, Kuang atbồ Hợp tác xã broă lơh drơng ala broă lơh sa suơn sre Chư Kbô, xã Chư Kbô, kơnhoàl Krông Buk pà git, hợp tác xã geh 230 lồ kơphe gam tàm tơngai geh plai, broă lơh kơphe geh bơta niam uă den tàng pal kờñ geh uă cau lơh broă mờ tơngai pĭc plai kơphe rơlao mờ broă lơh kơphe bè ờs. Ală nam, ală cau tàm hợp tác xã geh crơng gơs ală mpồl lơh broă bal nàng dong kờl bal pĭc plai kơphe mờ ơpah tai di pơgăp 20% mpồl cau bơh bơdìh. Mơya tàm nam do, tềng đăp mờ bơta kal ke bơh kòp gơtờp, khà cau lơh broă ơpah bơh bơdìh geh gơtìp kal ke. “Tàm hợp tác xã suơn tam phan là bơh ală hìu cau tàm mpồl dê, broă git nền nòn bơh tơl nă cau tàm mpồl geh 2 nă cau lơh broă tờm hơ̆ là bè ờs ờ gŏ di tàm kàl tơnhào pal kờñ geh tai bơh 2 tus 3 nă cau dong kờl, den tàng cau lơh broă tờm ờ tơl 50% tŭ do ờ git jòi cau pĭc plai kơphe. Ală nam tàm tŭ do cau tus bơh ală tiah bè: Quảng Ngãi, Krông Pa càr Gia Lai... mờ nam do kòp gơtờp bè do, khà cau lơh broă tus bơh càr Bình Dương, Sài Gòn tus ờ tơl, mờ khà cau bơh ală den tŭ do gam ờ git bè lơi, gơtìp kal ke ngan, mờ di gơlan là gơtìp kal ke ngan”.

Jăt ồng Phan Hoàng Lâm, Phó Chủ tịch UBND kơnhoàl Krông Buk yal, gùt kơnhoàl geh di pơgăp 20 rơbô 600 lồ ù tam kơphe, khà geh kờp dŭ geh 60 rơbô tấn kơphe gar tàm 1 nam. Bơh broă sền gròi mùl màl ală nam pa do, mpồl cau lơh broă tàm kơnhoàl do tus pĭc plai kơphe tàm kơnhoàl mìng di pal mờ pơgăp bơh 75 tus 80%, gam tai pal kờn geh broă tus bal bơh ală càr ndai, mìng là pĭc ală hìu nhă cau geh bă ù kơphe uă in. Gam di pơgăp nggùl nhai tai, plai kơphe tàm kơnhoàl geh mŭt tàm kàl pĭc plai mờ kờñ geh dùl khà cau gal ngan. Den tàng, broă kờñ geh tơl cau pĭc plai mờ rơcang sơndră mờ kòp ờ do ờ dă neh geh kơnoàl bơ̆t bơtàu loh làng, pleh mờ bơta ờ sŭk tus mờ làng bol bè broă ờ tơl cau pĭc plai kơphe. Tàm hơ̆ uă ngan là kơnhoàl neh bơ̆t bơtàu gùng dà broă dong kờl ai làng bol pĭc plai kơphe tàm bơta kòp Covid-19, tàm hơ̆ uă ngan là tàm ală tiah di gơlan gơtìp kòp uămờ tiah gơtìp wàng se, kơrian. “Di lah bè broă kờñ pĭc plai kơphe tàm ƀòn gơtìp wàng se, ƀòn gơtìp kơrian den bol añ geh ngui mpồl lơh broă mờ 4 tàm tiah hơ̆ tơn bơh xã hơ̆ dê nàng dong kờl broă pĭc plai kơphe ai làng bol in. Ngui mpồl ling gàr ƀòn, đoàn ơruh pơnu, cau lơh broă nùs nhơm dong kờl làng bol tàm broă pĭc plai kơphe”.

Jăt jơnau yal bơh Sở Nông nghiệp mờ Phát triển Nông thôn càr Dăk Lăk yal, kàl lơh kơphe 2021-2022, càr Dăk Lăk geh rơlao 209 rơbô lồ, mờ khà geh di pơgăp geh rơlao 500 rơbô tấn. Nàng gàr niam broă pĭc plai kơphe kàl lơh sa pa geh bơyai lơh niam, ală kơnhoàl pal rơcang bơ̆t bơtàu gùng dà broă lơh nàng hòi jà cau pĭc plai kơphe di pal mờ ală bơta kòp gơtờp di lah gơtìp. Tàm hơ̆, ală tiah pal rơcang ngăc tus mờ ală tiah geh khà yal lài 3 mờ tiah geh khà yal lài 4, tài ờ mìng pĭc plai kơphe mờ broă bơyai lơh sa suơn sre, tơnhào ală bơta phan geh lơh bơh broă lơh sa suơn sre ndai kung gơtìp kal ke. Ồng Vũ Đức Côn, Phó Kuang atbồ Sở Nông nghiệp mờ Phát triển Nông thôn càr Dăk Lăk pà git: UBND càr jào Sở Nông nghiệp mờ Phát triển Nông thôn in đơng lam, pơgồp bal mờ ală sở, gah lơh broă tơrgùm jơnau tơngit, bơyai lơh, bơto sồr UBND ală kơnhoàl, thị xã, ƀòn dờng bơ̆t bơtàu gùng dà broă lơh nàng pĭc plai kơphe ờ do ờ dă, geh cồng nha. “Càr neh geh sră nggal sồr ală kơnhoàl tàm hơ̆ geh bal ală tiah gơtìp kơrian den kung pal geh gùng dà broă lơh nàng ai tơl bơta niam nàng bol in lòt pĭc plai kơphe, di lah pal ai sră den kung pal geh jơnau bơto sồr nền nòn, mùl màl xã mờ kơnhoàl geh lơh. Broă pĭc plai kơphe tàm suơn geh ờ gơrềng uă ngan di lah pơn drờm mờ tàm tiah lơh sa mờ măi mŏk, den tàng nàng geh lơh broă là pal geh bơyai lơh, geh gùng dà bơto sồr”.

Dùl kàl tơnhào pa tus tai, tàm bơta kòp gơtờp gam gơtìp kal ke, cau tam kơphe đơs is mờ làng bol lơh broă sa càr Dăk Lăk đơs bal gam bal mờ gơnoar atbồ lơh ngan jòi geh broă hòi jà cau pĭc plai kơphe di pal mờ bơta kòp gơtờp, gàr niam kơrnoăt, jơnau kờñ rơcang sơndră mờ kòp Covid-19.

Cau cih Hương Lý-Cau mblàng Ndong Brawl