VOV4.K’ho - Ngai òr (05/01), Ƀan Thường vụ Tỉñ ủy Dăk Lăk bơyai lơh pơrjum pờ tơlik tàm internet lơh jăt ală sră nggal bơh Dà lơgar mờ Tỉñ ủy ai kwang bàng tờm càr dê.

                  Ală kwang bàng tus pơrjum lơh jăt Nghị quyết tàm anih pờ tơlik Tỉñ ủy Dăk Lăk

Jăt ồng Phạm Minh Tấn, Phó Ƀí thư Thường trực Tỉñ ủy Dăk Lăk yal, tềng đăp mờ bơta kal ke bơh kòp Kovid-19, Tỉñ ủy, HĐÑZ, UɃÑZ càr neh ai ală kal ke, tơlòng geh ai mờ di tŭ tơlik, lơh niam wơl, bơtơl, uă sră nggal nàng đong lam, lam sồr lơh jăt “jơnau kờñ dơ̆ lĕ” rơcang sơndră mờ kòp Kovid-19 mờ geh sùm, tơnguh bơtàu lơh sa mpồl bơtiàn. Tơn jơh nam 2021, gơguh lơh sa 5,1%, GDP tơl nă cau kờp dŭ geh mờr 50 tơlăk đong tàm 1 nă. Kờp jơh khà priă tăc phan mờ lơgar bơdìh geh rơlao 1 rơbô 100 tơlăk dolar Mỹ. Tàm pơrjum do, kwang bàng tờm càr Dăk Lăk geh bơsram, lam sồr, lơh jăt 12 pang sră bơh Dà lơgar mờ bơh càr gơrềng tus mờ ală tơngu me: tơnguh broă đơng lam, lam sồr broă rơcang sơndră mờ kòp Kovid-19 tàm bơta pa; broă bơsong yal yă yal khài Đảng; jơnau đơs pơn dŭt bơh Ƀộ Cíñ trị bè broă lam sồr sền gàr kwang bàng ñhăp ñhar, bơceh lơh tài bơta kwơ bal; cỉ thị bơh Ƀan Thường vụ tỉñ ủy bè broă tơnguh uă bơta niam cau geh đảng tàm tơngai tŭ do mờ ală nam pơn jăt tai...

Cau mblàng Ndong Brawl