VOV4.K’ho - Jơnau yal bơh Mpồl đơng lam rơcang sơndră mờ kòp Covid-19 bơh càr Dăk Lăk pà git, kờp tus tŭ do, càr Dăk Lăk neh dờp geh 12 dơ̆ ai sơnơm vaccine rơcang sơndră mờ kòp Covid-19 bơh Bộ Y tế mờ rơlao 1 tơlăk 230 rơbô ding sơnơm vaccine tàm khà rơlao 2 tơlăk 700 rơbô ding sơnơm kờñ geh cit, ai rơlao 1 tơlăk 400 rơbô nă cau bơh 18 sơnam rơlao hờ đang tàm càr in cit.

Càr Dăk Lăk kờñ geh tai 1 tơlăk 800 rơbô ding sơnơm vaccine nàng gơ glòm geh 80% khà kờp làng bol tàm gùt càr geh cit sơnơm vaccine

Kờp tus ngai 08 nhai 11, gùt càr Dăk Lăk neh cit geh mờr 1 tơlăk 128 rơbô ding sơnơm vaccine, tàm hơ̆, cit ding sơnrờp là rơlao 993 rơbô ding, geh rơlao 70% mờ cit ding dơ̆ 2 rơlao 128 rơbô ding, geh 9%. Geh 5 tàm 15 kơnhoàl, ƀòn dờng cit ding dơ̆ sơnrờp rơlao 80%, geh ƀòn dờng Buôn Ma Thuột (84,8%), kơnhoàl Krông Búk (84,7%), kơnhoàl Ea H’ leo (86,7%), kơnhoàl Cư̆ Kuiñ (84,4%) mờ thị xã Buôn Hồ (80,1%). Ồng Nay Phi La, Kuang atbồ Sở Y tế càr Dăk Lăk pà git: Nàng tơl tus lồi nam 2021 càr Dăk Lăk geh gơ glờm sơnơm vaccine gơwèt mờ rơlao 80% khà kờp làng bol bơh 12 sơnam rơlao hờ đang, càr pal geh tai 1 tơlăk 890 rơbô ding, tàm hơ̆ broă kờñ cit tàm nhai 11 là rơlao 1 tơlăk ding mờ nhai 12 là 667 rơbô 600 ding sơnơm.

Cau mblàng Ndong Brawl