VOV4.K’ho - Drim òr (01/07), Mpồl đơng lam dơ̆ pơrlòng jơh bơsram cấp 3 càr Dak Lak neh lòt sền gròi broă rơcang bơyai lơh pơrlòng jơh bơsram cấp 3 nam 2021 tàm ală anih pơrlòng tàm ƀòn dờng Buôn Ma Thuột. Dơ̆ pơrlòng jơh bơsram cấp 3 nam 2021, càr Dak Lak geh 1 mpồl duh broă pơrlòng, 32 anih pơrlòng mờ rơlao 19 rơbô 800 nă kơnòm bơsram tus pơrlòng.

Mpồl đơng lam dơ̆ pơrlòng jơh bơsram cấp 3 càr Dak Lak sền gròi broă rơcang bơyai lơh pơrlòng tàm ală anih pơrlòng

Mìng is ƀòn dờng Buôn Ma Thuột geh 9 anih pơrlòng. Tus tŭ do, ală hìu bơsram neh lơh gơs ală bơta bè phan bơna, cau lơh broă nàng bơyai lơh dơ̆ pơrlòng. Tềng đăp mờ bơta kal ke bơh kòp Covid-19, nàng gàr niam bơta pràn kơl dang să jan ai kơnòm bơsram, kuang bàng, cau pơgru, cau lơh broă in, bơdìh mờ broă tam cah is kơnòm bơsram lài mờ dơ̆ pơrlòng, ală anih pơrlòng neh bơ̆t bơtàu gùng dà broă ƀồm sơnơm lơh kloh vi khuẩn tơnơ̆ mờ tơl dơ̆ pơrlòng, ai tiah was bơta duh să jan, anih rào tê, chèo mờ geh 2 anih pơrlòng rơcang lài.

Tus tŭ do, càr Dak Lak ờ hềt geh dờp kuang bàng, cau lơh broă drơng broă pơrlòng ha là ală kơnòm bơsram tus pơrlòng gơtìp tàm bơta pal tus bal pơrlòng dơ̆ 2.

Cau mblàng Ndong Brawl