VOV4.K’ho- Jăt Sở Giáo dục mờ Đào tạo càr Dăk Lăk yal, ală tiah tàm càr do gam mhar lơh gơs broă rơcang ai nam bơsram pa 2021-2022 in. Tơngai do, ală tiah kung neh sền wơl, bơtơl phan bơto bơsram, phan ngui, phan nhơl; lơh pa; lơh wơl, lơh niam wơl phan bơna hìu bơsram, ơdŭ bơsram. Kuơ màng, tàm bơta kòp Covid-19 gam gơtìp kal ke den broă rơcang sơndră mờ kòp mờ gàr niam ờ do ờ dă ai kơnòm bơsram, kuang bàng, cau pơgru in sùm geh ai lài.

Nàng chờ gờm rơlao 400 nă kơnòm bơsram bơh 10 ơdŭ mầm non nam bơsram 2021-2022, hìu bơsram mầm non Hoa Ban, xã tiah ngài Cư̆ Kbang, kơnhoàl Ea Súp neh sơng, lơh niam wơl ală jơdŭ bơsram, lơh ala pa uă jơnờng, jơgĕ nggui, lơh niam wơl ală tiah nhơl hờ bơdìh ƀlàng, pơs wàs kloh niam jơh gùt ƀlàng tàm hìu bơsram.

Ală hìu bơsram mầm non tàm tiah nhàr dà lơgar kơnhoàl Ea Súp neh rơcang nàng chờ gờm kơnòm bơsram mŭt bơram

Pơgru Nguyễn Thị Hoá, kuang atbồ hìu bơsram yal: “Tàm tŭ UBND xã geh ngui hìu bơsram lơh tiah tam cah is tơrgùm bal nàng rơcang sơndră mờ kòp gơtờp, den hìu bơsram lơh ngan ai tơngai nàng bơyai lơh broă rơwah mŭt bơsram. Tus ngai 20 nhai 8 lài do, tŭ UBND xã jào wơl, den hìu bơsram neh bơyai lơh niam wơl, ƀồm sơnơm lơh kloh vi khuẩn jơh tàm ƀlàng gùt dar hìu bơsram. Bè phan bơto mờ bơsram, hìu bơsram kung neh geh gơnoar atbồ sền gròi blơi uă phan nhơl hờ bơdìh ƀlàng, 49 nơm kơƀàng jơgĕ pa bal mờ uă phan ndai tai”.

Tàm xã tiah nhàr dà lơgar Ea Bung, pơgru Nguyễn Thành Đông, Kuang atbồ hìu bơsram cấp 2 Ea Bung pà git, nam bơsram 2021-2022 hìu bơsram geh 220 nă kơnòm bơsram. Lồi nhai 7 lài do, xã Ea Bung neh gŏ 7 nă cau gơtìp kòp Covid-19, xã pal ngui Chỉ thị sồ 16 bơh Chính phủ nàng rơcang sơndră mờ kòp gơtờp. Den tàng, ală broă rơcang tàm nam bơsram pa gơtìp ơm ing. Tơnơ̆ mờ tơngai tam cah ngài mpồl bơtiàn, mờ broă dong kờl bơh ală cấp, ală gah lơh broă, broă rơcang nam bơsram pa kung gam mờr geh lơh gơs. “Pa do hìu bơsram geh UBND kơnhoàl dong kờl priă lơh niam wơl 8 jơdŭ bơsram, tàm hơ̆ geh 6 jơdŭ bơsram tàm tiah 2 cờn mờ 2 jơdŭ tàm hìu bè ờs mờ tŭ do neh lơh gơs; gam tus do geh lơh niam wơl hìu lơh broă. Mìng is hìu bơsram den neh blơi tơl phan, phan lơh broă, sră nggal kung neh yal tus cau mè bèp kơnòm bơsram bơh tàm zalo, facebook bè rơndăp broă mŭt bơsram bơh Sở Giáo dục ai tàm ngai 01 nhai 9 tus”.

                         Kơnhoàl Ea Súp tă rơlao 12 tơmàn đong nàng lơh niam wơl ală jơdŭ bơsram

Kơnhoàl tiah nhàr dà lơgar Ea Súp tŭ do geh 48 hìu bơsram ală cấp bơh mầm non tus cấp 3 mờ giáo dục thường xuyên. Nam bơsram 2021-2022, ală hìu bơsram geh 19 rơbô 350 nă kơnòm bơsram. Jăt ồng Nguyễn Văn Khoá, Kuang atbồ phòng Giáo dục mờ Đào tạo kơnhoàl Ea Súp pà git, rơcang nam bơsram pa, dà lơgar bơcri rơlao 12 tơmàn đong nàng lơh niam wơl, lơh pa, blơi tai phan bơna ai ală hìu bơsram in. Tus tŭ do, ală hìu bơsram neh rơcang tơl phan bơna, cau pơgru bơto ha là rơndăp broă bơto, rơcang mŭt sơn đờm nam bơsram pa. “Phòng Giáo dục mờ Đào tạo kơnhoàl neh lơh ală rơndăp broă ai bơh tàm ală sră nggal đơng lam bơh gơnoar atbồ nàng lơh jăt tus jơh ală kuang atbồ hìu bơsram bè broă bơto mờ bơsram kung bè rơcang sơndră mờ kòp gơtờp. Ală hìu bơsram neh lơh ală gùng dà broă lơh, rơndăp broă lơh; crơng gơs ală mpồl rơcang sơndră mờ kòp nàng mŭt tàm nam bơsram pa ờ do ờ dă ai cau pơgru, cau lơh broă bal mờ kơnòm bơsram in”.

Ồng Phạm Đăng Khoa, Kuang atbồ Sở Giáo dục mờ Đào tạo càr Dăk Lăk pà git, nàng rơcang nam bơsram pa 2021-2022, ală hìu bơsram neh sền wơl, bơtơl phan bơto, phan ngui, phan nhơl; lơh, lơh niam wơl, tơnguh niam wơl phan bơna hìu bơsram, ơdŭ bơsram, ai lài ală broă lơh bè jơdŭ bơsram, thư viện, hìu yă brê, broă lơh dà kloh; gàr niam phan bơna, phan bơto drơng tàm broă lơh jăt broă bơto phổ thông pa gơwèt mờ ơdŭ 1, 2, 6; sền wơl, rơndăp săp sèng mpồl cau pơgru tơl bè khà, ndrờm bal mờ broă geh ai mờ geh khà niam bè bơta ngăc ngar.

Nàng gàr niam broă sơn đờm nam bơsram pa 2021-2022 di jăt mờ tơngai nam bơsram geh UBND càr ai, UBND càr Dăk Lăk sồr UBND ală kơnhoàl, thị xã, ƀòn dờng lơh jăt broă sền wơl khà làng bol gam lơh jăt broă tam cah lơh sơnơm tàm ală tiah mờ khà ală hìu bơsram geh ngui nàng lơh anih tam cah is lơh sơnơm geh ală tiah atbồ nàng rơndăp wơl ală tiah tam cah is, ai wơl hìu bơsram nàng kơnòm bơsram in bơsram sră. Ồng Phạm Đăng Khoa, Kuang atbồ Sở Giáo dục mờ Đào tạo càr Dăk Lăk pà git tàm kòp Covid-19 dơ̆ 4, càr Đăk Lăk geh 113 hìu bơsram geh ngui nàng lơh tiah tam cah is, dong kờl broă lơh xét nghiệm, cit sơnơm vaccine. Nam bơsram pa neh mờr tus, broă lơh jal mhar tŭ do là gàr niam ală bơta niam ờ do ờ dă ngan ai kơnòm bơsram bal mờ cau pơgru in tŭ kòp Covid-19 kung gam gơtìp kal ke ngan. Tàm hơ̆ uă ngan là tàm ală hìu bơsram neh geh tŭ ngui nàng lơh kơnòl tam dră mờ kòp gơtờp. “UBND càr neh geh sră nggal sồr ală tiah ơm broă ngui ală phan bơna tàm ală hìu bơsram nàng drơng ai broă rơcang sơndră mờ kòp gơtờp in, nàng ală hìu bơsram geh tơngai pơs wàs kloh niam, lơh niam wơl phan bơna ai nam bơsram pa in. Bol añ kung neh rơcang sền wơl, nàng git ală phan bơna nàng lơh niam wơl, blơi tai phan ai nam bơsram pa in”.

Bal mờ hơ̆, Sở giáo dục-Đào tạo pơgồp bal mờ Sở Y tế lơh jăt niam broă pơs wàs, rào kloh niam, lơh kloh vi khuẩn di jăt mờ kơrnoăt geh ai mờ ia wơl di bè ờs phan bơna hìu bơsram nàng ală hìu bơsram rơcang ai broă sơn đờm nam bơsram pa in, gàr niam ờ do ờ dă ai kơnòm bơsram, cau pơgru in tŭ tus bơto mờ bơsram tàm hìu bơsram.

Cau mblàng Ndong Brawl