VOV4.K’ho- Mŭt tàm kàl mìu càl dờng, dà tih dà cò, bal mờ broă sùm sền gròi lơh niam wơl gùng che ồs đèng, Công ty điện lực Dak Lak neh rơcang phan, măi mŏk rơcang lài nàng sơndră.

Công ty Điện lực Dak Lak lơh niam wơl nàng gàr ờ do ờ dă tàm ală tiah gơtìp mờ niam

Công ty do kung neh ai tơl mpồl lơh broă sơndră mờ rềs àr, jòi dong klàs cau geh 40 nă, mhar bơsong tŭ gơtìp ală bơta ờ niam bè ồs đèng. Ồng Lê Văn, kuang bàng lơh broă tàm anih ờ do ờ dă, Công ty điện lực Dak Lak pà gĭt: “Tàm càr Dak Lak den geh càl pồt bồ kàl, hơ̆ sồng geh tiah tàm ală kơnhoàl Krông Ana, Krông Bông, Cư̆ Kuiñ, Krông Păc ală nam pa do sùm gơtìp gơbam dà, hơ̆ sồng ală tiah gơtìp mìu càl dờng bè Ea Súp, Buôn Đôn..., den bol añ neh lơh gùng dà broă lơh, sền wơl jơh ală tiah gơtìp ờ pràn nàng lơh gùng che ồs đèng kơl jăp ờ do ờ dă tàm kàl mìu càl dờng.

 Mờ ờ mìng ală tiah geh uă, mờ gam tus jơh ală tiah den Công ty điện lực Dak Lak neh geh gùng dà broă lơh mùl màl, rơcang phan lơh broă lài, phan ngui kung bè kòn bơnus, sơnơm sơm ba, mờ ală gùng dà broă dong klàs bal mờ ală mpồl lơh broă pơgồp bal, gơnoar atbồ tàm ală tiah, nàng rơcang drơng mờ sơndră di tŭ, tŭ gơtìp ờ niam bơh trồ tiah lơh aniai”.

Cau mblàng Ndong Brawl