VOV4.K’ho - Jăt Mpồl đơng lam rơcang sơndră mờ rềs àr bơh trồ tiah lơh aniai càr Dăk Lăk yal, tài gơrềng bơh mìu càl dờng sồ 5 bal mờ càl bơh đah măt tơngai mŭt khồm tus đah jum, ală ngai do trồ tiah neh lơh gơtìp mìu sơr mờ lơh gơbam dà tàm ờ uă tiah mờ lơh gơtìp tơrlah ù jăt gah dà dờng jăt gùng lòt bơh xã Nam Ka-Ea Rbin (kơnhoàl Lăk).

                              Tiah gơtìp tơrlah tàm gùng lòt bơh xã Nam Ka- Ea Rbin, kơnhoàl Lăk 

Càr neh đơng lam ală gah lơh broă, ală tiah tơnguh rơlao tai ală broă rơcang sơndră mờ rềs àr bơh trồ tiah, tàm hơ̆ uă ngan là tàm bơta kòp Covid-19 gam gơtờp kal ke, gàr niam ờ do ờ dă màng kis mờ tơmù hoàc huơr phan bơna làng bol in. Ală mpồl lơh broă, ală tiah sền wơl, tơrgùm, bơtơl ală gùng dà broă rơcang sơndră mờ mìu dà tih dà còp di pal mờ bơta mùl màl jăt gùng dà broă lơh 4 tơn tàm tiah hơ̆, tàm hơ̆ uă ngan là tàm ală tiah geh broă lơh tờm bè gơbam dà, broă di gơlan gơtìp tơrlah uă ù. Mpồl đơng lam rơcang sơndră mờ rềs àr bơh trồ tiah mờ jòi dong klàs cau càr Dăk Lăk pà git, càr neh tơrgùm tơl rơlao 180 mpồl lam lài tàm ală tiah nàng mhar rơcang sơndră mờ rềs àr bơh trồ tiah lơh aniai.

Cau mblàng Ndong Brawl