VOV4.K’ho – Tàm thị trấn Kiến Đức, kơnhoàl Dak Rlâp, drim òr (17/4), UBND càr Daknông bơyai lam lơh nhai lơh broă tài ờ do ờ dă phan sa nam 2018 mờ tơngume “Sơlơ tơnguh kơnòl bơh cau lơh gơlik, kă bro phan sa”.

Nhai lơh broă tài ờ do ờ dă phan sa, càr Daknông rơcang lam lơh uă broă lơh lùp sền, lòt sền ală anih lơh gơlik, kă bro phan sa; sền gròi broă lơh atbồ dà lơgar bè ờ do ờ dă phan sa mơkung lòt sền ngan ngồn tàm ală anih lơh gơlik, tac phan sa. Nhai lơh broă tài ờ do ờ dă phan sa nam 2018 geh bơyai lơh kờ` sơlơ tơnguh rlau tai broă atbồ đơs bal kung bè jơnau git wă bơh làng bol dê gơwèt mờ broă lơh gàr niam ờ do ờ dă phan sa; mơkung tơnguh kơnòl bơh gơnoar atbồ ală kơnă, bơh cau lơh gơlik, tac phan sa, cau ngui sa dê tàm broă lơh gàr kloh niam ờ do ờ dă phan sa.