VOV4.K’ho - UBND ƀòn dờng Gia Nghĩa, càr Dăk Nông pà gĭt, mpồl lơh broă geh gơnoar pa gŏ 10 nă cau geh 2 nă cau măi rơndeh “gùng tơlir” pơn diang bơh tiah gơtìp kòp tus tàm ƀòn dờng Gia Nghĩa ờ yal broă lơh sơnơm tàm mang ngai 01 nhai 8.

10 nă cau do là làng bol kòn cau bơh 18 tus 24 sơnam, geh hìu ơm kis tàm kơnhoàl Lăk, càr Dăk Lăk gam lòt jơng rê bơh càr Bình Dương. Tàm mang hơ̆ tơn, 2 nă cau măi rơndeh mờ 10 nă cau do neh mhar geh cèng tam cah is tàm tiah tam cah is tơrgùm bal ƀòn dờng Gia Nghĩa dê, ai mẫu xét nghiệm virus Sars CoV-2. Mờ Mpồl đơng lam rơcang sơndră mờ kòp gơtờp ƀòn dờng Gia Nghĩa neh sồr lơh glài mhar 2 nă cau măi rơndeh pơn diang phan geh ƀằng sồ 48C-045.83 di jăt mờ kơrnoăt geh ai, di lah lơh gơtờp kòp geh lơh sră nggal lơh glài di jăt mờ adăt boh lam. Gơwèt mờ 10 nă cau bơh càr Dăk Lăk, ƀòn dờng Gia Nghĩa geh pơgồp bal mờ gơnoar atbồ ƀòn ơm kis ală cau do nàng lơh glài broă gơtìp tìs mờ ală kơrnoăt bè broă rơcang sơndră mờ kòp Covid-19.

Cau mblàng Ndong Brawl