VOV4.K’ho- Ngai òr (12/07), càr Dak Nông pơn jăt tai gŏ cau gơtờp mờ virus Sars CoV-2 rê bơh ƀòn dờng Hồ Chí Minh. Cau kòp sồ 31604 là lŏ C.T.Q, deh nam 1966, kis tàm xã Dak Wer, kơnhoàl Dak Rlấp.

Jăt broă lùp sền kòp, di pơgăp 3 jơ drim ngai 8 nhai 7, lŏ Q ơpah rơndeh sơnơm pơn diang bơklao là P.T.T, deh nam 1962, lòt xạ trị tàm hìu sơnơm Bình Dân, sồ hìu 371 gùng Điện Biên Phủ, sơnah ƀòn 4, quận 3, ƀòn dờng Hồ Chí Minh. Tàm hìu sơnơm do jơh 2 nă ùr bơklao geh lơh xét nghiệm mhar mờ ai geh cồng nha ờ gŏ mờ kòp Covid-19. Tus tàm tŭ 9 jơ ngai bal, lŏ Q ơpah rơndeh sơnơm pơn diang bơklao rê (ờ hềt gĭt rơndeh sơnơm bal mờ cau măi).

Drim ngai 09 nhai 7, lŏ Q tus hìu sơnơm xã Dak Wer yal mờ geh bơto sồr tàm broă tam cah is tàm hìu. Tus 11 jơ 30 phút mang ngai 11 nhai 7, anih tờm gròi sền kòp tê jê să càr Dak Nông dờp geh jơnau yal lŏ Q geh cồng nha gŏ mờ virus Sars CoV-2. Tàm mang hơ̆ tơn, mpồl lơh sơnơm càr Dak Nông neh cèng lŏ Q lòt tam cah is, ai mẫu kòp tus 10 jơ ngai 12 nhai 7 cồng nha xét nghiệm RT-PCR geh dờp lŏ Q geh gŏ mờ kòp Covid-19. Bè hơ̆, tus mho ngai 12 nhai 7, càr Dak Nông neh dờp geh 3 nă cau gơtìp mờ kòp Covid-19, ndrờm là ală cau rê bơh ƀòn dờng Hồ Chí Minh.

Cau mblàng Ndong Brawl