VOV4.K’ho - Ngai òr (27/07), càr Dak Nông neh gŏ tai 4 nă cau tàm kơnhoàl Dak Mil là cau lơh sơnơm gơtìp mờ kòp Covid-19 ndrờm là F1 bơh cau kòp sồ 98494. Ală cau kòp do ndrờm là cau lơh sơnơm lài mờ hơ̆ neh tìp rềp mờ cau kòp sồ 98494, mờ ndrờm geh ai mẫu xét nghiệm mờ phan lơh broă Realtime RT-PCR, ai geh cồng nha geh gŏ mờ virus Sars CoV-2 tàm tŭ 10 jơ 25 phút drim ngai 27 nhai 7.

Tơnơ̆ mờ tŭ geh cồng nha geh gŏ mờ virus Sars CoV-2, gah lơh sơnơm bal mờ mpồl lơh broă geh gơnoar neh tam cah is mờ pơn diang cau kòp mờ rơndeh sơnơm tus hờ hìu sơnơm lơh ing sồ 1 (Anih lơh sơnơm kơnhoàl Dak Mil). Mờ bơyai ƀồm sơnơm lơh kloh vi khuẩn jơh hìu ơm cau kòp, ală anih cau kòp neh tus mờ ală anih di gơlan gơtờp gơrềng bal. Ală mpồl lơh broă neh mhar jòi geh 42 nă cau F1 tìp rềp mờ ală cau kòp. Tŭ do, gah lơh sơnơm gam mhar lùp sền gùng lòt, ală anih cau kòp neh geh tŭ lòt, tus, ơm tàm 14 ngai lài mờ pơn jăt tai sền wơl, jòi ală cau neh tìp rềp. Tus tŭ do, càr Dak Nông neh dờp geh 46 nă cau gơtìp kòp Covid-19.

Cau mblàng Ndong Brawl