VOV4.K’ho - Di tơnkah 131 nam tờm ngai deh Chủ tịch Hồ Chí Minh, drim òr (19/05), tàm xã Dak Nia, ƀòn dờng Gia Nghĩa, UBND càr Dak Nông bơyai lơh lam sồr “Satềp tam chi rài rài kah ưn ngài Bác Hồ” mờ tam chi tam cah nam 2021.

Dơ̆ pơrjum lam sồr tam chi

Tàm dơ̆ lam sồr, kuang đơng lam càr Dak Nông hòi jà tơl nă kuang bàng, công chức, cau ling mờ làng bol tam ờ uă ngan 1 tờm chi, tus bal tam chi jăt jơnau bơto sồr bơh Bác Hồ dê nàng sền gàr tiah kis, tơnguh bơta niam tơlir ƀòn drà.

Tơnơ̆ mờ dơ̆ lam sồr, geh 350 tờm klòng mờ tờm bằng lăng neh geh tam tàm tiah Lơh sa suơn sre ngui công nghệ cao, xã Dak Nia, ƀòn dờng Gia Nghĩa. Di tàm dơ̆ do, ală tiah tàm càr Dak Nông kung neh tam geh di pơgăp 51 rơbô tờm chi. Ồng Lê Trọng Yên, Phó Chủ tịch UBND càr Dak Nông pà gĭt, tàm càr Dak Nông, brê ngai sơlơ gơmù jơh bè bă brê mờ bơta niam brê. UBND càr kơ̆p kờñ ală anih lơh broă, gah mpồl lơh broă bal mờ làng bol tơnguh uă jơnau gĭt wă tàm broă sền gàr tiah kis, tus bal tam tờm chi, sền gàr brê, tơnguh uă bơta niam tiah kis.

Cau mblàng Ndong Brawl