VOV4.K’ho - Tơnơ̆ mờ tŭ gŏ mpồl cau gơtờp virus Sars CoV-2 tàm mpồl bơtiàn xã Quảng Tín, kơnhoàl Dăk Rlấp, Phó Chủ tịch UBND càr Đăk Nông mò Tôn Thị Ngọc Hạnh neh kĭ kơrnoăt ngui ờ uă broă lơh jal mhar tàm broă rơcang sơndră mờ kòp Covid-19 tàm kơnhoàl do.

Jăt mờ hơ̆, càr Dăk Nông neh tơlik kơrnoăt wàng se jơh kơnhoàl Dăk Rlấp bơh 12 jơ ngai 07 nhai 9 mờ ngui nền nòn ală broă lơh jăt Chỉ thị sồ 16. Sồr làng bol ơm tàm hìu, mìng lik lòt hờ bơdìh tàm bơta mùl màl geh kuơ. Ơm ing jơh ală broă lơh mpồl bơtiàn. Tơmù uă ngan broă lơh bơh ală rơndeh cau dùl nă să is, gàr niam broă lơh geh niam mờ pơn diang phan kă bro, phan lơh broă sa. Jăt jơnau yal bơh Mpồl đơng lam rơcang sơndră mờ kòp tàm kòn bơnus kơnhoàl Đăk Rlấp yal, bơh ngai 05 nhai 9, tơnơ̆ mờ tŭ cau gơtìp kòp sơnrờp ngan tàm xã Quảng Tín, tus drim ngai 07 nhai 9, gùt kơnhoàl neh dờp geh 52 nă cau geh gŏ mờ virus Sars CoV-2 tàm hơ̆ tơrgùm uă ngan tàm ƀòn Bu Dzách, Bu Bir gơwèt xã Quảng Tín. Tŭ do, gah lơh sơnơm gam lơh broă broă lùp sền, jòi cau neh tìp rềp, ai mẫu xét nghiệm rơlao 6 rơbô 200 nă cau gơrềng, tìp rềp in nàng geh tam cah is ală cau gơtìp kòp lĭk bơdìh mpồl bơtiàn.

Cau mblàng Ndong Brawl